ଏବେ ବି ବିପଦସଙ୍କୁଳ ଅବସ୍ଥାରେ ହଷ୍ଟେଲ କୋଠା
7:23 amSeptember 7, 2019 / 21

ବ୍ରହ୍ମପୁର ଅଫିସ ୭ା୯-ବ୍ରହ୍ମପୁର ବିଶ୍ୱବିଦ୍ୟାଳୟ ପରିସରରେ ଥିବା ସାବେରୀ ଛାତ୍ରୀନିବାସର ୩ ମହଲା ବିଶିଷ୍ଟ ଶୌଚାଳୟ କୋଠା ଭୁଶୁଡିବା ଘଟଣା ଏକମାସରୁ ଊର୍ଦ୍ଧ୍ୱ ବିତିଲାଣି। ତଥାପି ବିପଦସଙ୍କୁଳ ଅବସ୍ଥାରେ ଥିବା ଅନ୍ୟ ଛାତ୍ରୀନିବାସ ଓ ଛାତ୍ରାବାସ ସୁରକ୍ଷା ଦିଗରେ କର୍ତ୍ତୃପକ୍ଷ ଅବହେଳା କରୁଛନ୍ତି ା ପୁରୁଣା ତଥା ଭଗ୍ନ ଅବସ୍ଥାରେ ଥିବା ହଷ୍ଟେଲଗୁଡିକର ମରାମତି ଦିଗରେ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ବିଶ୍ୱବିଦ୍ୟାଳୟ କ୍ୟାମ୍ପସରେ ଛାତ୍ର ଅଶାନ୍ତି ଦେଖାଦେଇଛି ା
ଛାତ୍ରୀ ନିବାସ, ଛାତ୍ରାବାସର ଅନ୍ତେବାସୀମାନେ ନିଜ ସୁରକ୍ଷାକୁ ନେଇ ପ୍ରଶ୍ନ ଉଠାଇଛନ୍ତି ା ହଷ୍ଟେଲ ସମସ୍ୟାର ସମାଧାନ ଓ ମରାମତି ଦାବି ନେଇ ଶୁକ୍ରବାର ଛାତ୍ରୀଛାତ୍ରମାନେ ସ୍ନାତକୋତ୍ତର ଅଧ୍ୟକ୍ଷା ପ୍ରଫେସର ଅରୁନ୍ଧତୀ ରଥଙ୍କୁ ଘେରାଉ କରିଛନ୍ତି। ସାବେରୀ ଛାତ୍ରୀନିବାସ ଶୌଚାଳୟ କୋଠା ଭୁଶୁଡିବା ପରେ ବି କାହିଁକି ଅନ୍ୟ ହଷ୍ଟେଲ ଭଙ୍ଗା କାନ୍ଥର ମରାମତି, କାନ୍ଥରେ ଉଠିଥିବା ଗଛ କଢ଼ାଯାଉ ନାହଁ ବୋଲି ସେମାନେ ପ୍ରଶ୍ନ କରିଥିଲେ। ହଷ୍ଟେଲ ସମସ୍ୟା ବୁଝିବାକୁ ନିୟମିତ ୱାର୍ଡେନ ପରିଦର୍ଶନରେ ଆସୁ ନ ଥିବା ମଧ୍ୟ କହିଥିଲେ। ଏଥିସହ ହଷ୍ଟେଲ ଓ ବିଭିନ୍ନ ବିଭାଗରରେ ରହିଥିବା ଶୌଚାଳୟ ନିୟମିତ ସଫେଇ ବ୍ୟବସ୍ଥା କରିବା, ବିଶୁଦ୍ଧ ପାନୀୟ ଜଳବ୍ୟବସ୍ଥା, କ୍ୟାମ୍ପସରେ ୱାଇଫାଇ ସେବା, ଏକ ବର୍ଷିଆ ପରୀକ୍ଷା କ୍ୟାଲେଣ୍ଡର ଛାତ୍ରୀଛାତ୍ରଙ୍କୁ ପ୍ରଦାନ କରିବା, ପିଏଚ୍‌ଡି ଥେସିସ ଓ ନାମଲେଖା ପ୍ରକ୍ରିିୟା ପାଇଁ ଉଚ୍ଚସ୍ତରୀୟ କମିଶନ ଗଠନ କରିବା, ହଷ୍ଟେଲ ଆଲର୍ଟମେଣ୍ଟ ପ୍ରକ୍ରିିୟା ପାଇଁ ସିଙ୍ଗଲ ୱିଣ୍ଡୋ ପ୍ରକ୍ରିିୟା ଲାଗୁ କରିବା ଦିଗରେ ତୁରନ୍ତ ପଦକ୍ଷେପ ନେବାକୁ ଦାବି କରାଯାଇଛି। ଏ ନେଇ ସ୍ନାତକ ପରିଷଦ ଅଧ୍ୟକ୍ଷା ପ୍ରଫେସର ରଥଙ୍କୁ ଛାତ୍ରୀଛାତ୍ରମାନେ ୯ ଦଫା ଦାବି ସମ୍ବଳିତ ଦାବିପତ୍ର ପ୍ରଦାନ କରିଥିଲେ ା
୭ ଦିନ ମଧ୍ୟରେ ଦାବି ପୂରଣ ଦିଗରେ ପଦକ୍ଷେପ ଗ୍ରହଣ କରା ନ ଗଲେ ଆନ୍ଦୋଳନକୁ ଓହ୍ଲାଇବେ ବୋଲି ଛାତ୍ରୀଛାତ୍ରମାନେ ଚେତାବାନୀ ଦେଇଛନ୍ତି। ତୁତୁନ ପାତ୍ର, ଆଲୋକ ନାୟକ, ହରିଶ ବେହେରା, ସତ୍ୟଜିତ ନାୟକ, ଅନନ୍ତ ପ୍ରଧାନ, ଛୋଟରାୟ ହାଂସଦା, ନବୀନ ପଣ୍ଡା, ମୁକେଶ ବିଶ୍ୱାଳ ପ୍ରମୁଖ ଦାବିପତ୍ର ପ୍ରଦାନ ବେଳେ ଉପସ୍ଥିତ ଥିଲେ। ଅନ୍ୟପକ୍ଷରେ ଛାତ୍ରୀଛାତ୍ରଙ୍କ ଦାବି ସମ୍ପର୍କରେ କୁଳସଚିବ ଓ ହଷ୍ଟେଲ ୱାର୍ଡେନଙ୍କୁ ଅବଗତ କରାଇବା ସହ ୭ ଦିନ ମଧ୍ୟରେ ସମସ୍ତ ସମସ୍ୟା ସମାଧାନ ପାଇଁ ପଦକ୍ଷେପ ନିଆଯିବ ବୋଲି ସ୍ନାତକୋତ୍ତର ପରିଷଦ ଅଧ୍ୟକ୍ଷା ପ୍ରଫେସର ରଥ କହିଛନ୍ତି ା