ତାଳଚେର,୨୫ା୯(ନି.ପ୍ର.)- କୋଇଲା ଉଦ୍ୟୋଗରେ ଶତ ପ୍ରତିଶତ ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶ (ଏଫ୍ଡିଆଇ)କୁ ବିରୋଧ ସହ ତୁରନ୍ତ ଏହାକୁ ପ୍ରତ୍ୟାହାର ଦାବିରେ ମଙ୍ଗଳବାର ୪ ଗୋଟି ଶ୍ରମିକ ସଙ୍ଗଠନ ପକ୍ଷରୁ ତାଳଚେରରେ ଖଣିବନ୍ଦ ଆନ୍ଦୋଳନ କରାଯାଇଛି। ଫଳରେ ଏମ୍ସିଏଲ୍ର ଏଠାରେ ଥିବା ହିଙ୍ଗୁଳା, ବଳରାମ, ଜଗନ୍ନାଥ, ଲିଙ୍ଗରାଜ, ଭୁବନେଶ୍ୱରୀ, ଭରତପୁର, ଅନନ୍ତ, କଣିହଁା ସମେତ ୯ ଗୋଟି ଖଣିରୁ କୋଇଲା ଉତ୍ତୋଳନ, ପରିବହନ ଠପ୍ ହୋଇଯାଇଛି।
ସକାଳୁ ଆଇଏନ୍ଟିୟୁସି, ବିଏମ୍ଏସ୍, ଏଚ୍ଏମ୍ଏସ୍, ଏଆଇଟିୟୁସି ଆନ୍ଦୋଳନକାରୀ ବିଭିନ୍ନ କୋଇଲା ଖଣିର ଜେନେରାଲ ମ୍ୟାନେଜରଙ୍କ ଅଫିସ, ପ୍ରକଳ୍ପ ଅଧିକାରୀଙ୍କ ଅଫିସ, ଟାଇମ ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଖଣି କାର୍ଯ୍ୟ ବନ୍ଦ କରାଇଛନ୍ତି। ଫଳରେ ଏମ୍ସିଏଲ୍ର ଏଠାରେ ଥିବା ସମସ୍ତ ୯ ଗୋଟି ଖଣିରୁ କୋଇଲା ଉତ୍ତୋଳନ ଓ ପରିବହନ ବନ୍ଦ ରହିଛି। ଆଇଏନ୍ଟିୟୁସିର ସାଧାରଣ ସମ୍ପାଦକ ସୌଭାଗ୍ୟ ପ୍ରଧାନ, ବିଏମ୍ଏସ୍ର ସାଧାରଣ ସମ୍ପାଦକ ସଞ୍ଜୟ ମାଝି, ଏଚ୍ଏମ୍ଏସ୍ ସାଧାରଣ ସମ୍ପାଦକ ଶଙ୍କର ପ୍ରସାଦବେହେରା, ଏଆଇଟିୟୁସି ସଦସ୍ୟଗଣ, କୋଇଲା ମହାସଂଘର ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟ ବାଦଲ ମହାରଣା, ଅରୁଣ କୁମାର ପ୍ରଧାନ, ବିଜୟ କୁମାର ସାହୁ ପ୍ରମୁଖ ବିଭିନ୍ନ ସ୍ଥାନରେ ଆନ୍ଦୋଳନର ନେତୃତ ୍ବନେଉଛନ୍ତି।
ଅପରପକ୍ଷରେ ଏମ୍ସିଏଲ୍ ପକ୍ଷରୁ ଏହି ଆନ୍ଦୋଳନକୁ ବେଆଇନ ବୋଲି ଦର୍ଶାଯାଇଛି। ତାଳଚେର ଓ ଇବ୍ଭ୍ୟାଲିରେ ଥିବା ୧୯ଟି କୋଇଲା ଖଣି ମଧ୍ୟରୁ ୯ଟି ଚାଲୁ ରହିଛି। ଶ୍ରମିକମାନେ ଆନ୍ଦୋଳନରେ ସାମିଲ ନ ହୋଇ ତୁରନ୍ତ କାର୍ଯ୍ୟରେ ଯୋଗ ଦେବାକୁ ଏମ୍ସିଏଲ୍ର ସିଏମ୍ଡି ବି.ଏନ. ଶୁକ୍ଳା ଅନୁରୋଧ କରିଛନ୍ତି। ଏହି ଆନ୍ଦୋଳନ ଯୋଗୁ ଏମ୍ସିଏଲ୍ର ୨.୪୪ ଲକ୍ଷ ଟନ କୋଇଲା ଉତ୍ପାଦନ ବାଧାପ୍ରାପ୍ତ ହୋଇଛି ବୋଲି ଏମ୍ସିଏଲ୍ ଏକ ପ୍ରେସ୍ ବିବୃତିରେ ପ୍ରକାଶ କରିଛି।
