ଏନ୍‌ଏଚ୍‌ ମରାମତି ପାଇଁ ଜିଲାପାଳଙ୍କୁ ଦାବିପତ୍ର
10:22 pmJune 11, 2020 / 52

ଯୋଡ଼ା, ୧୧।୬ (ଡି.ଏନ.ଏ.)-କେନ୍ଦୁଝର ଜିଲାର ଜୀବନ ରେଖା କୁହାଯାଉଥିବା ୫୨୦ନଂ ଜାତୀୟ ରାଜପଥର ମରାମତି ପାଇଁ ଯୋଡା ବ୍ଲକ ଅନ୍ତର୍ଗତ ୫ଟି ପଞ୍ଚାୟତର ସରପଞ୍ଚ କେନ୍ଦୁଝର ଜିଲାପାଳଙ୍କୁ ଲିଖିତ ଦାବିପତ୍ର ଦେଇଥିବା ଜଣାପଡିଛି। ଏଥିରେ ଦର୍ଶାଯାଇଛି ଯେ, ଏହି ଜାତୀୟ ରାଜପଥ ଦେଇ ଦୈନିକ ହଜାର ହଜାର ଟ୍ରକ, ଡମ୍ପର, ବଡ ବଡ ଭାରିଯାନ ଖଣିଜ ପରିବହନ କରୁଛନ୍ତି। ଦୀର୍ଘ ବର୍ଷେ ହେଲା ଏହି ଜାତୀୟ ରାଜପଥର ମରାମତି ଅଭାବରୁ ବିଭିନ୍ନ ସ୍ଥାନରେ ଖାଲଖମା ସୃଷ୍ଟି ହୋଇ ଜାତୀୟ ରାଜପଥଟି ମରଣଯନ୍ତା ପାଲଟିଛି। ଧୂଳିଧୂଆଁ ଉଡି ଅଞ୍ଚଳକୁ ପ୍ରଦୂଷିତ କରୁଛି। ଏହା ସହିତ ବିଭିନ୍ନ ସ୍ଥାନରେ ବଡ ବଡ ଗାତ, ଖାଲ ଯୋଗୁ ବଡ ବଡ ଭାରିଯାନ ଫଶି ରହି ଟ୍ରାଫିକ ସମସ୍ୟା ଉପୁଜୁଛି। ରାସ୍ତାର ଦୁରାବସ୍ଥା ଯୋଗୁ ଅନେକ ସମୟରେ ଦୁର୍ଘଟଣା ଘଟି ଜୀବନ ହାନି ହେଉଛି।  ଏହି ରାସ୍ତାର ନିର୍ମାଣ କାର୍ଯ୍ୟ ଏକ ଠିକାସଂସ୍ଥାକୁ ଦିଆଯାଇଥିଲେ ହେଁ, ରାସ୍ତା ନିର୍ମାଣରେ ବିଳମ୍ବ ହେବା ହେତୁ ରାସ୍ତାର ଅବସ୍ଥା ଜରାଜୀର୍ଣ୍ଣ ହୋଇପଡିଛି।  ଫଳରେ ଏହି ରାସ୍ତା ଦେଇ ସାଧାରଣ ବାଇକ୍‌ ଚାଳକଟିଏ ଯାତାୟାତ କରିବା ମଧ୍ୟ କଷ୍ଟକର ହୋଇପଡିଛି। ଏହା ଫଳରେ ଲୋକେ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ଏଣୁ ଜିଲାପାଳ ଏହି ରାସ୍ତାର ମରାମତି ଦିଗରେ ଦୃଷ୍ଟି ଦେବେ ବୋଲି ଦେଓଝର ସରପଞ୍ଚ ମଙ୍ଗଲ ମୁଣ୍ଡା, ସମିତି ସଭ୍ୟ ଯୁଧିଷ୍ଠିର, ଚମକପୁର ସରପଞ୍ଚ ନରହରି ନାଏକ , ବିରିକଳା ସରପଞ୍ଚ ରମେଶ ଚନ୍ଦ୍ର ନାଏକ ପ୍ରମୁଖ ଦସ୍ତଖତ ସମ୍ବଳିତ ଦାବିପତ୍ର ଜିଲାପାଳଙ୍କୁ ପ୍ରଦାନ କରିଛନ୍ତି।