ଭୁବନେଶ୍ୱର,୨୪।୫(ବ୍ୟୁରୋ): ଗୋଟିଏ ପଟେ ରାଜ୍ୟକୁ ଫେରୁଥିବା ପ୍ରବାସୀଙ୍କ ସଂଖ୍ୟା ବଢ଼ିବାରେ ଲାଗିଥିବା ବେଳେ ଅନ୍ୟପକ୍ଷେ ବଢ଼ୁଛି ସଂକ୍ରମିତଙ୍କ ଗଣନା। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ପୂର୍ବରୁ ଥିବା ୧୪ ଦିନିଆ କ୍ୱାରାଣ୍ଟାଇନ୍ ଅବଧିକୁ ୨୧ ଦିନ ବଢ଼ାଇଥିଲେ। ହେଲେ ରବିବାର ପୁଣି ଏହି କ୍ୱାରାଣ୍ଟାଇନ୍ ନିୟମରେ ପରିବର୍ତ୍ତନ କରାଯାଇଛି। ଏହି ଅବଧି ୨୧ ଦିନରୁ ୧୪ ଦିନକୁ ହ୍ରାସ ପାଇଛି। ବାହାରୁ ଆସୁଥିବା ଗ୍ରାମାଞ୍ଚଳ ଲୋକ ୧୪ ଦିନ କ୍ୱାରାଣ୍ଟାଇନ୍ରେ ରହିବେ। ପ୍ରଥମ ୭ ଦିନ କ୍ୱାରାଣ୍ଟାଇନ୍ ସେଣ୍ଟରରେ ଏବଂ ବାକି ୭ ଦିନ ହୋମ୍ କ୍ୱାରାଣ୍ଟାଇନ୍ରେ ରହିପାରିବେ। ଲକ୍ଷଣ ନ ଥିଲେ ପ୍ରବାସୀଙ୍କୁ କ୍ୱାରାଣ୍ଟାଇନ୍ ସେଣ୍ଟରରୁ ଛାଡ଼ି ଦିଆଯିବ। କ୍ୱାରାଣ୍ଟାଇନ୍ ସେଣ୍ଟରରୁ ଛାଡ଼ିବା ନେଇ ସ୍ଥାନୀୟ ପ୍ରଶାସନିକ ଅଧିକାରୀ ନିଷ୍ପତ୍ତି ନେବେ। ହେଲେ ସମ୍ପୃକ୍ତ ବ୍ୟକ୍ତିଙ୍କ ଦ୍ୱାରା କରୋନା ବ୍ୟାପିବା ଆଶଙ୍କା ଥିଲେ ଏହି ଅବଧିକୁ ବଢ଼ାଯିବ। ସେହିଭଳି ସହରାଞ୍ଚଳକୁ ଆସୁଥିବା ବ୍ୟକ୍ତି ୧୪ ଦିନ ହୋମ୍ କ୍ୱାରାଣ୍ଟାଇନ୍ରେ ରହିବେ ବୋଲି ଏସ୍ଆର୍ସି ପ୍ରଦୀପ ଜେନା ଖବରଦାତା ସମ୍ମିଳନୀରେ କହିଛନ୍ତି।
ସେ କହିଛନ୍ତି, ଆଗାମୀ ଦିନରେ ରାଜ୍ୟକୁ ଅଧିକ ପ୍ରବାସୀ ଆସିବେ। ଏଣୁ କରୋନା ମୁକାବିଲା ହେତୁ କ୍ୱାରାଣ୍ଟାଇନ୍ ବ୍ୟବସ୍ଥାକୁ କଡ଼ାକଡ଼ି ଭାବେ ପାଳନ କରିବାକୁ ପଡ଼ିବ। ଆଗକୁ ମଧ୍ୟ ସରକାରଙ୍କୁ ସହଯୋଗ କରିବାକୁ ପଡ଼ିବ। ଫଳରେ ଗୋଷ୍ଠୀ ସଂକ୍ରମଣ ହେବ ନାହିଁ। ଏବେ ୧୪ ଦିନିଆ ବାଧ୍ୟତାମୂଳକ କ୍ୱାରାଣ୍ଟାଇନ୍ ବ୍ୟବସ୍ଥା ଲାଗୁ କରାଯାଇଛି। ଗ୍ରାମାଞ୍ଚଳକୁ ଆସୁଥିବା ପ୍ରବାସୀ ଓଡ଼ିଆ ୭ ଦିନ ପଞ୍ଚାୟତସ୍ତରୀୟ କ୍ୱାରାଣ୍ଟାଇନ୍ରେ ରହିବାକୁ ବାଧ୍ୟ। ଏହାପରେ ସେମାନଙ୍କଠାରେ ଲକ୍ଷଣ ପ୍ରକାଶ ନ ପାଇଲେ ଘରେ ଆଉ ୭ ଦିନ କ୍ୱାରାଣ୍ଟାଇନ୍ରେ ରହିବାର ଅନୁମତି ରହିଛି। ହେଲେ ବ୍ୟକ୍ତିଙ୍କ ଘରେ ସେଭଳି ବ୍ୟବସ୍ଥା ନ ଥିଲେ ପୁଣି ୭ ଦିନ ସେମାନେ କ୍ୱାରାଣ୍ଟାଇନ୍ ସେଣ୍ଟରରେ ରହିପାରିବେ ବୋଲି ଏସ୍ଆର୍ସି କହିଛନ୍ତି।
