ବ୍ରହ୍ମପୁର ଅଫିସ,୧୦ା୭-ସାହାରା ଇଣ୍ଡିଆ ଚିଟଫଣ୍ଡ ସଂସ୍ଥା ଅଧୀନରେ କାର୍ଯ୍ୟ କରୁଥିବା ଏଜେଣ୍ଟ(କ୍ଷେତ୍ର କର୍ମଚାରୀ) ଓ ଜମାକାରୀଙ୍କୁ ଦୀର୍ଘ ମାସ ଧରି ମିଳିନି ମାଚୁରିଟି, ଏମ୍ଆଇଏସ (ମାସିକ ଇନ୍କମ ସ୍କିମ) ଟଙ୍କା। ଅଥଚ କମ୍ପାନୀ ଗ୍ରାହକଙ୍କଠାରୁ ବିଭିନ୍ନ ସ୍କିମରେ ଅର୍ଥ ନେଇ ମାର୍କେଟରୁ ଟଙ୍କା ଉଠାଉଥିବା ଅଭିଯୋଗ ହୋଇଛି। ଏପରି ଅଭିଯୋଗ କରିଛନ୍ତି ବ୍ରହ୍ମପୁର ଶାଖା ଅଧୀନରେ କାର୍ଯ୍ୟରତ ଏଜେଣ୍ଟ ଏବଂ ଗ୍ରାହକ। କମ୍ପାନୀ ପକ୍ଷରୁ ସ୍ଥାୟୀ ଭାବେ ନିଯୁକ୍ତ କର୍ମଚାରୀଙ୍କୁ ନିୟମିତ ଦରମା ପ୍ରଦାନ କରାଯାଉଛି। କିନ୍ତୁ ଏଜେଣ୍ଟ ଓ ଗ୍ରାହକଙ୍କ ମାଚୁରିଟି ଟଙ୍କା ମାସ ମାସ ଧରି ବାକି ରଖିଥିବା ସେମାନେ ଅଭିଯୋଗ କରିଛନ୍ତି। ଏନେଇ ଗତ ଜୁନ ୧୧ରୁ ଶାଖା ଅଧୀନରେ କାର୍ଯ୍ୟରତ ଏଜେଣ୍ଟ ଓ ଗ୍ରାହକମାନେ କାର୍ଯ୍ୟବନ୍ଦ ଆନ୍ଦୋଳନ କରିବା ସହ ଶାଖା କାର୍ଯ୍ୟାଳୟରେ ମଧ୍ୟ ସମସ୍ତ କାର୍ଯ୍ୟ ବନ୍ଦ କରି ଦେଇଥିବା ଜଣାପଡିଛି। ତୁରନ୍ତ ମାଚୁରିଟି ଓ ଗ୍ରାହକଙ୍କ ଏମଆଇଏସ୍ ସ୍କିମ ଟଙ୍କା ପ୍ରଦାନ କରିିବାକୁ କମ୍ପାନୀ ପରିଚାଳନା ମୁଖ୍ୟଙ୍କୁ ବାରମ୍ବାର ଅବଗତ କରାଇଛନ୍ତି। କିନ୍ତୁ କୋର୍ଟରେ କେସ ଚାଲିଥିବା ଆଳରେ କମ୍ପାନୀ ପରିଚାଳନା ମୁଖ୍ୟ ଭୂତାଉଥିବା ଏଜେଣ୍ଟମାନେ ଅଭିଯୋଗ କରିଛନ୍ତି।
ଏଜେଣ୍ଟଙ୍କ କହିବା ପ୍ରକାରେ, ସାହାରା ଇଣ୍ଡିଆର ହାଉସିଂ ଏଣ୍ଡ ରିୟଲିଷ୍ଟିକ ସ୍କିମ୍ ଉପରେ ସୁପ୍ରିମ କୋର୍ଟରେ କେସ ଚାଲିଥିବା ବେଳେ ଅନ୍ୟ କୌଣସି ସ୍କିମ ଉପରେ କୋର୍ଟ ରହିତାଦେଶ ଲଗାଇ ନାହାନ୍ତି। ଏହାସତ୍ତ୍ୱେ କୋର୍ଟରେ କେସ ଚାଲିଥିବା ଆଳ ଦେଖାଇ କମ୍ପାନୀ ଏଜେଣ୍ଟଙ୍କ ଜରିଆରେ ଜମାକାରୀଙ୍କଠାରୁ ବିଭିନ୍ନ ସ୍କିମରେ ଟଙ୍କା ଆଦାୟ କରୁଛି। କିନ୍ତୁ ଏମ୍ଆଇଏସ୍ ଭଳି ବିଭିନ୍ନ ସ୍କିମର ମାଚୁରିଟି ଟଙ୍କା ପ୍ରଦାନ କରିବାରେ ଅବହେଳା କରୁଛି। ଗତ ୧୦ମାସ ଧରି ଜମାକାରୀ ଓ ଏଜେଣ୍ଟଙ୍କୁ ଏମଆଇଏସର ମାସିକ ବେନିଫିଟ ଅନ୍ୟାନ୍ୟ ବେନିଫିଟ ଟଙ୍କା ପ୍ରଦାନ କରାଯାଇ ନାହିଁ। ଏଣୁ ଏଜେଣ୍ଟଙ୍କୁ ନାନା ସମସ୍ୟାର ସମ୍ମୁଖୀନ ହେବାକୁ ପଡୁଛି। ବ୍ରହ୍ମପୁର ଶାଖାରେ ୨୦୧୪ରୁ ଜମାକାରୀଙ୍କୁ ବିଭିନ୍ନ ସ୍କିମରେ ପ୍ରାୟ ୨୫ କୋଟିର ମାଚୁରିଟି ବକେୟା ରହିଛି। ଏପରିକି ମୃତ୍ୟୁ, ବିବାହ, ସ୍ବାସ୍ଥ୍ୟ ପାଇଁ ବିଭିନ୍ନ ସ୍କିମରେ ପ୍ରଦାନ କରାଯିବାକୁ ଥିବା ଟଙ୍କା ମଧ୍ୟ କମ୍ପାନୀ ପ୍ରଦାନ କରିବାକୁ ଅମଙ୍ଗ ହେଉଥିବା ବରିଷ୍ଠ ଏଜେଣ୍ଟ ବିଜୟ କୁମାର ପାଢୀ କହିଛନ୍ତି। ଅନ୍ୟପକ୍ଷରେ ଗତ ଏକମାସ ମଧ୍ୟରେ ଏସ୍ପି, ଜିଲାପାଳ, ଉପଜିଲାପାଳ, ଏସ୍ଡିପିଓଙ୍କୁ ଏନେଇ ଅବଗତ କରିବା ସହ କମ୍ପାନୀର ଆଞ୍ଚଳିକ କାର୍ଯ୍ୟାଳୟ, କମାଣ୍ଡ ଅଫିସ, ଜୋନାଲ ଅଫିସ, ଟେରିଟୋରିଆଲ ଅଫିସରେ ଏଜେଣ୍ଟମାନଙ୍କ ପକ୍ଷରୁ ଦାବିପତ୍ର ପ୍ରଦାନ କରାଯାଇଥିଲେ ମଧ୍ୟ କେହି ଶୁଣୁ ନାହାନ୍ତି। ଗତ ଜୁନ ୧୧ରୁ ବ୍ରହ୍ମପୁର ଶାଖାର ସମସ୍ତ ଏଜେଣ୍ଟ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇଛନ୍ତି। ବକେୟା ତଥା ମାଚୁରିଟି ଟଙ୍କା ତୁରନ୍ତ ପ୍ରଦାନ କରା ନ ଗଲେ ଆଗାମୀ ଦିନରେ ଏଜେଣ୍ଟ ଓ ହିତାଧିକାରୀ ରାଜରାସ୍ତାକୁ ଓହ୍ଲାଇବାକୁ ଚେତାବନୀ ଦେଇଛନ୍ତି। ଆନ୍ଦୋଳନରେ ବ୍ରହ୍ମପୁର ଶାଖାର ଏଜେଣ୍ଟ ଅମୂଲ୍ୟ କୁମାର ସାହୁ, ରବି ବାରିକ, ଦିଲ୍ଲୀପ କୁମାର ପାତ୍ର, ପ୍ରଣବ କୁମାର ପଣ୍ଡା, ବିପିନ ସାମଲ, ସୁଦାମ ସାହୁ, ଅମୀୟ କୁମାର ନାୟକ, ଦେବେନ୍ଦ୍ର ବେହେରାଙ୍କ ସମେତ ସମସ୍ତ ଏଜେଣ୍ଟ ସାମିଲ ହୋଇଛନ୍ତି।
