କଟକ ଅଫିସ,୬।୧୨:ଟ୍ରେନ୍ ଟିକେଟ୍ ଇନ୍ସପେକ୍ଟର(ଟିଟିଆଇ) ଡ୍ୟୁଟି ଅତ୍ୟନ୍ତ କଷ୍ଟକର। ଡ୍ୟୁଟିବେଳେ ଅନେକ ସମୟରେ ପ୍ରତିକୂଳ ପରିସ୍ଥିତି ସାମ୍ନା କରିବାକୁ ପଡ଼ିଥାଏ। ଗୋଟିଏ ଜୋନ୍ରୁ ଅନ୍ୟ ଜୋନ୍କୁ ଯିବାକୁ ପଡ଼େ। ବିନା ଟିକେଟ୍ରେ ଯାତ୍ରା କରୁଥିବା ଯାତ୍ରୀଙ୍କ ସହ ପାଟିତୁଣ୍ଡ ହେବାର ମଧ୍ୟ ସମ୍ଭାବନା ରହିଥାଏ। ତେଣୁ ମହିଳାଙ୍କ ଅପେକ୍ଷା ପୁରୁଷ ଏହି ଡ୍ୟୁଟିରେ ନିଯୁକ୍ତ ଥାନ୍ତି। କେତେଜଣ ମହିଳାଙ୍କୁ ଟିଟିଆଇ ଡ୍ୟୁଟି ମିଳିଥିଲେ ମଧ୍ୟ ସେମାନେ କେବଳ ରେଲ୍ୱେ ଷ୍ଟେଶନରେ ହିଁ ଏହି ଡ୍ୟୁଟି କରନ୍ତି। ତେବେ ଇଷ୍ଟକୋଷ୍ଟ ରେଲ୍ୱେରେ ଏବେ ଜଣେ ମହିଳାଙ୍କୁ ଓପନ ଡ୍ୟୁଟି କରୁଥିବା ଦେଖିବାକୁ ମିଳୁଛି। ସେ ହେଲେ ଓଡ଼ିଶାର ଅନ୍ୟତମ ଅନ୍ତର୍ଜାତୀୟ ଆଥ୍ଲେଟ୍ ପାର୍ବତୀ ସେଠୀ। ପ୍ରାୟ ୧ମାସ ହେବ ପାର୍ବତୀ ଏହି ଡ୍ୟୁଟି କରୁଥିବାବେଳେ ପ୍ରତିଦିନ କଟକ ରେଲ୍ୱେ ଷ୍ଟେଶନ୍ରୁ ବିଭିନ୍ନ ସ୍ଥାନକୁ ଯାଉଛନ୍ତି। ପାର୍ବତୀଙ୍କ ଏହି ପଦକ୍ଷେପ ପୂର୍ବତଟ ରେଲ୍ୱେରେ ଚର୍ଚ୍ଚାର ବିଷୟ ହୋଇଛି।
କିଛିଦିନ ତଳେ ଇଟାଲୀରୁ ଅନ୍ତର୍ଜାତୀୟ ମେଡାଲ ଧରି ପାର୍ବତୀ ଓଡ଼ିଶା ଫେରିଥିଲେ। ୧୯୯୯ରୁ ଇଷ୍ଟକୋଷ୍ଟ ରେଲ୍ୱେ ଚାକିରି କରିଥିବା ପାର୍ବତୀ ଇଟାଲୀରୁ ଫେରିବା ପରେ ଖୋର୍ଦ୍ଧା ଡିଭିଜନ ଡିଆର୍ଏମ୍ ଶଶିକାନ୍ତ ସିଂଙ୍କୁ ଭେଟିଥିଲେ। ଏହି ସମୟରେ ପାର୍ବତୀ ଖେଳ ଅଭ୍ୟାସ ପାଇଁ ଅଧିକ ସମୟ ଦେବାକୁ ଡିଆର୍ଏମ୍ଙ୍କୁ ନିବେଦନ କରିଥିଲେ। ଷ୍ଟେଶନରେ ରହିଲେ ତାଙ୍କୁ ପୂରା ୮ଘଣ୍ଟା ଡ୍ୟୁଟି କରିବାକୁ ପଡୁଥିବାରୁ ସେ ଓପନ ଡ୍ୟୁଟି କରିବା ପାଇଁ ଡିଆର୍ଏମ୍ଙ୍କୁ ଅନୁରୋଧ କରିଥିଲେ। ହେଲେ ଡିଆର୍ଏମ୍ ତାଙ୍କୁ ଏହି ଡ୍ୟୁଟି ନ କରିବା ପାଇଁ କହିଥିଲେ। ମାତ୍ର ନିଜେ ନିଜର ସୁରକ୍ଷା କରିପାରିବେ ଓ ଯେ କୌଣସି ଅପ୍ରୀତିକର ପରିସ୍ଥିତିକୁ ସମ୍ମୁଖୀନ ହେବାର ଦକ୍ଷତା ରଖିଛନ୍ତି ବୋଲି ସେ ତାଙ୍କୁ ଜଣାଇଥିଲେ। ଫଳରେ ଡିଆର୍ଏମ୍ ତାଙ୍କୁ ସାବାସୀ ଦେବା ସହ ଏହି ଡ୍ୟୁଟି ଦେବା ପାଇଁ ସିନିୟର ଡିସିଏମ୍ ପି.କେ. ସାମଲଙ୍କୁ ନିର୍ଦ୍ଦେଶ ଦେଇଥିଲେ। ସେବେଠାରୁ ପାର୍ବତୀ ଏହି ଡ୍ୟୁଟି କରି ଆସୁଛନ୍ତି। ତେବେ ଓପନ ଡ୍ୟୁଟିରେ କୌଣସି ନିର୍ଦ୍ଦିଷ୍ଟ ସମୟସୀମା ନାହିଁ। ନିର୍ଦ୍ଦିଷ୍ଟ କାମ ଶେଷ ହେବା ପରେ ଡ୍ୟୁଟି ସରିଥାଏ ବୋଲି ରେଳ ବିଭାଗର ନିୟମ ରହିଛି। ଏ ସମ୍ପର୍କରେ ପାର୍ବତୀ କହନ୍ତି, ମୁଁ ଜଣେ ଆଥ୍ଲେଟ୍, ଯେ କୌଣସି ପରିସ୍ଥିତିକୁ ସମ୍ମୁଖୀନ ହେବାକୁ ସାହସ ରଖିଛି। ଘରେ ୯ବର୍ଷର ପୁଅ ଓ ସ୍ବାମୀ ରହିଥିବାବେଳେ ସମସ୍ତଙ୍କ ଦାୟିତ୍ୱ ଠିକ୍ ସମୟରେ ତୁଲାଇବାରେ କୌଣସି ଅସୁବିଧା ହେଉନାହିଁି। ଅନ୍ୟ ଝିଅମାନେ ଏହି ଡ୍ୟୁଟି କରିବାରେ କୌଣସି ଅସୁବିଧା ନାହିଁ, କେବଳ ନିଜର ଇଚ୍ଛାଶକ୍ତି ଓ ସାହସ ରହିବା ଆବଶ୍ୟକ।
