ଆୟ ବହିର୍ଭୂତ ସମ୍ପତ୍ତି ଠୁଳ ମାମଲା : ପୋଲିସ ଏସ୍‌ଆଇଙ୍କୁ ଜେଲ, ଜରିମାନା
6:53 amDecember 24, 2019 / 21

ବ୍ରହ୍ମପୁର ଅଫିସ,୨୪ା୧୨-ଗଞ୍ଜାମ ଜିଲା ସ୍ବତନ୍ତ୍ର ଭିଜିଲାନ୍ସ ଜଜ ସୁବ୍ରତ ମହାନ୍ତି ସୋମବାର ଏକ ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାର ବିଚାର କରି ତତ୍କାଳୀନ ଗଜପତି ଜିଲା ଅଡ଼ବା ଥାନା ଭାରପ୍ରାପ୍ତ ଅଧିକାରୀ ତଥା ବର୍ତ୍ତମାନ ଭୁବନେଶ୍ୱର ଉତ୍ତରା ଫାଣ୍ଡି ଅଧିକାରୀ ଥିବା ପ୍ରମୋଦ କୁମାର ସାହୁଙ୍କୁ ୧ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି। ଏହା ସହିତ ୧୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟ ଅଧିକ ୩ ମାସ ଜେଲ ଦଣ୍ଡ ଭୋଗିବା ପାଇଁ ମଧ୍ୟ ନିର୍ଦ୍ଦେଶ ରହିଛି। ସେହିପରି ଅଭିଯୁକ୍ତ ପ୍ରମୋଦଙ୍କଠାରୁ ମିଳିଥିବା ୧ ଲକ୍ଷ ୧୭ ହଜାର ଆୟ ବହିର୍ଭୂତ ଟଙ୍କା ବାଜ୍ୟାପ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଥିବା ଭିଜିଲାନ୍ସ ସ୍ବତନ୍ତ୍ର ପିପି ତପନ କୁମାର ଦାସ ସୂଚନା ଦେଇଛନ୍ତି।
ଘଟଣାରୁ ପ୍ରକାଶ, ପ୍ରମୋଦ ଗଜପତି ଜିଲା ଅଡବା ଥାନାରେ ଥିବା ବେଳେ ରବୀନ୍ଦ୍ର ନାହାକଙ୍କଠାରୁ ଲାଞ୍ଚ ନେଇ ଭିଜିଲାନ୍ସ ହାତରେ ଧରା ପଡି ଗିରଫ ହୋଇଥିଲେ। ପରେ ଭିଜିଲାନ୍ସ ପ୍ରମୋଦଙ୍କ ଥାନା କ୍ବାର୍ଟର୍ସ, ପୈତୃକ ବାସଭବନ ସମେତ ୫ ସ୍ଥାନରେ ଚଢାଉ କରି ୩ ଲକ୍ଷ ୪୨ ହଜାର ୪୭୦ ଟଙ୍କାର ସମ୍ପତ୍ତି ଠାବ କରିଥିଲା। ଭିଜିଲାନ୍ସ ଅଭିଯୁକ୍ତ ପୋଲିସଙ୍କୁ ମାମଲା ନଂ. ୧୭/୦୬ରେ କୋର୍ଟ ଚାଲାଣ କରିଥିଲା। ପୋଲିସ ଅଧିକାରୀ ପ୍ରମୋଦଙ୍କ ଆୟ ବହିର୍ଭୂତ ସମ୍ପତ୍ତି ୧ ଲକ୍ଷ ୧୭ ହଜାର ଟଙ୍କା ଯାହାକି ତାଙ୍କ ଆୟର ଶତକଡା ୬୭ ଭାଗ ଅଧିକ ବୋଲି ଭିଜିଲାନ୍ସ ଆକଳନ କରିବା ସହ ତାଙ୍କ ବିରୋଧରେ ଆଉ ଏକ ମାମଲା ରୁଜୁ କରିଥିଲା। ମୁଦାଲାଙ୍କ ପକ୍ଷରୁ ହାଇକୋର୍ଟ ଓକିଲ ସନ୍ତୋଷ କୁମାର ମୁଣ୍ଡୁ ମକଦ୍ଦମା ପରିଚାଳନା କରିଥିଲେ।