ନୂଆଦିଲ୍ଲୀ,୭ା୩- ଇଂଲଣ୍ଡ ଅଲରାଉଣ୍ଡର କ୍ରିସ୍ ଓ୍ବକ୍ସ ଆଗାମୀ ଆଇପିଏଲ୍ରେ ଖେଳିବେ ନାହିଁ। ତାଙ୍କୁ ଦିଲ୍ଲୀ କ୍ୟାପିଟାଲ୍ସ ଫ୍ରାଞ୍ଚାଇଜ ଦେଢ଼ କୋଟି ଟଙ୍କାରେ କିଣିଥିଲା। କିନ୍ତୁ ସେ ଆଇପିଏଲରେ ଖେଳିବା ପରିବର୍ତ୍ତେ ଆଗାମୀ ସିଜନ ପାଇଁ ଫ୍ରେଶ ରହିବାକୁ ନିଷ୍ପତ୍ତି ନେଇଛନ୍ତି। ତେବେ ସେ ପାରିବାରିକ ସମସ୍ୟା କାରଣରୁ ଓହରିବାକୁ ନିଷ୍ପତ୍ତି ନେଇଥିବା ଫ୍ରାଞ୍ଚାଇଜକୁ ଜଣାଇ ଦେଇଛନ୍ତି। ସେ ଅନ୍ତିମ ଥର ୨୦୧୮ ଅଗଷ୍ଟରେ ଟି୨୦ ଖେଳିଥିଲେ। ଆଉ ଇଂଲଣ୍ଡ ପକ୍ଷରୁ ୨୦୧୫ ନଭେମ୍ବରରେ ଶେଷ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଥିଲେ। ଆଇପିଏଲ୍ରେ ଓ୍ବକ୍ସଙ୍କ ମିଶ୍ରିତ ରେକର୍ଡ ରହିଛି। ସେ ୨୦୧୭ରେ କେକେଆର ପାଇଁ ୧୭ ଉଇକେଟ ନେଇଥିଲେ। କିନ୍ତୁ ୨୦୧୮ରେ ଆରସିବି ପକ୍ଷରୁ ମାତ୍ର ୫ ମ୍ୟାଚ୍ ଖେଳିବାକୁ ସୁଯୋଗ ପାଇଥିଲେ। ସେଥର ଓଭର ପିଛା ୧୦.୩୬ ହାରରେ ରନ୍ ବ୍ୟୟ କରିଥିଲେ। ଯଦି ସେ ଆଇପିଏଲ୍ରେ ଖେଳିଥାନ୍ତେ, ତେବେ ମଧ୍ୟ ଦିଲ୍ଲୀ ଦଳର ଚୂଡ଼ାନ୍ତ ଏକାଦଶରେ ତାଙ୍କ ସ୍ଥାନ ପକ୍କା ନ ଥିଲା। କାରଣ ଦଳ ନିକଟରେ ଜାସନ ରୟ, ମାର୍କସ ଷ୍ଟୋଇନିସ, ଆଲେକ୍ସ କାରେ, କିମୋ ପଲ୍, ସନ୍ଦୀପ ଲାମିଚାନେ, କାଗିସୋ ରାବାଡା ଓ ଶିମରନ ହେଟମାୟରଙ୍କ ଭଳି ବିଦେଶୀ ଖେଳାଳି ଥିଲେ। ଏମାନଙ୍କ ମଧ୍ୟରୁ ଦଳ କେବଳ ୪ ଜଣଙ୍କୁ ଖେଳାଇ ପାରିଥାନ୍ତା।
