ଖଇରା, ୨୪।୩(ଡି.ଏନ.ଏ.)-ବାଲେଶ୍ୱର ଜିଲାର ଖଇରା ତଥା ପଡୋଶୀ ଆଗରପଡା, ସୋର, ବାହାନଗା ଏବଂ ଔପଦା ଅଞ୍ଚଳରୁ ତୀର୍ଥଯାତ୍ରାରେ ଯାଇଥିବା ୬୧ଯାତ୍ରୀ ଗୁଜୁରାଟର ଅହମ୍ମଦାବାଦରେ ଫସି ରହିଛନ୍ତି । ପ୍ରଶାସନିକ ସ୍ତରରେ ଉଦ୍ୟମ କରାଯାଇ ସେମାନଙ୍କୁ ଘରକୁ ଫେରାଇ ଆଣିବାକୁ ପରିବାର ତରଫରୁ ନିବେଦନ କରାଯାଇଛି । ୪୫ବର୍ଷରୁ ଊର୍ଦ୍ଧ୍ୱ ଏହି ୬୧ଜଣ ବ୍ୟକ୍ତି ଫେବୃୟାରୀ ୧୩ ତାରିଖରେ ତୀର୍ଥ କରିବାକୁ ଉତ୍ତର ଓ ପଶ୍ଚିମ ଭାରତ ଯାଇଥିଲେ । ଫେରିବା ବେଳେ ପ୍ରଧାନମନ୍ତ୍ରୀଙ୍କ ଜନତା କର୍ଫ୍ୟୁ ତଥା ଲକଡାଉନ ଯୋଗୁ ୨୩ ତାରିଖରୁ ଅହମ୍ମଦାବାଦ ଷ୍ଟେଶନରେ ଅଟକି ରହିଥିଲେ । ପରିବାର ଲୋକେ ଭାଜପା ଯୁବମୋର୍ଚ୍ଚାର ରାଷ୍ଟ୍ରୀୟ ଉପସଭାପତି ତଥା ଖଇରା ବ୍ଲକ ବାସିନ୍ଦା ଠାକୁର ରଣଜିତ ଦାସଙ୍କୁ ଜଣାଇବା ପରେ ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଜରିଆରେ ଅହମ୍ମଦାବାଦ ଜିଲାପାଳଙ୍କୁ ଅବଗତ କରାଯାଇଥିଲା । ସେଠାକାର ଜିଲାପାଳ ଫସି ରହିଥିବା ଏହି ତୀର୍ଥଯାତ୍ରୀଙ୍କୁ ଦିଲଦରବାଜା ଅତିଥିଭବନରେ ରଖାଇବାର ବ୍ୟବସ୍ଥା କରିଛନ୍ତି । ସେମାନେ ଭଲରେ ଅଛନ୍ତି । ପରିବାର ଲୋକ ବ୍ୟସ୍ତ ନ ହେବାକୁ ଠାକୁର ଦାସ ନିବେଦନ କରିଛନ୍ତି ।
