ଭୁବନେଶ୍ୱର, ୬।୧(ବନ୍ଦନା ସେଠୀ) : ନୂଆବର୍ଷରେ ସହରବାସୀଙ୍କ ଉପରେ ୟୁଜର୍ ଫି’ ବୋଝ ଲଦିଛି ଭୁବନେଶ୍ୱର ମହାନଗର ନିଗମ (ବିଏମ୍ସି)। ଏଣିକି ଅଳିଆ ଦେବେ, ଟଙ୍କା ଗଣିବେ ରାଜଧାନୀବାସୀ। ଆବାସିକ ଘର, ଦୋକାନ, ହୋଟେଲ, ଗେଷ୍ଟହାଉସ୍, ଅନୁଷ୍ଠାନ, ଶିକ୍ଷାନୁଷ୍ଠାନ, ଶପିଂ ମଲ୍, ହାଟ, ହେଲ୍ଥ କେୟାର ୟୁନିଟ୍, ବିୟୁଟି ପାର୍ଲର, ସ୍ପା, ବିବାହ ମଣ୍ଡପ, କଲ୍ୟାଣ ମଣ୍ଡପ, ଭେଣ୍ଡିଂଜୋନ୍ ବ୍ୟବସାୟୀ, ଢାବା, ମଦ ଦୋକାନ, ମିଠା ଦୋକାନ, କଫି ଶପ୍, ପ୍ରିଣ୍ଟିଂ ପ୍ରେସ୍, ଇଣ୍ଡଷ୍ଟ୍ରିଜ୍, ପେଟ୍ରୋଲ ପମ୍ପ୍ ଆଦିରୁ ଅଳିଆ ଉଠାଇବାକୁ ମାସିକ ୟୁଜର୍ସ ଫି’ ଆଦାୟ କରିବ ବିଏମ୍ସି। ସବୁ ବର୍ଗ ପାଇଁ ଅଲଗା ଫି’ ଦର ଧାର୍ଯ୍ୟ ହୋଇଛି। ଫି’ ତାଲିକା ପ୍ରକାଶ କରାଯିବା ସହ ୨୦୧୮ ବାଇ ଲ’ ଅନୁଯାୟୀ ଫି’ ଆଦାୟ ଆରମ୍ଭ ହୋଇଛି। ଏନେଇ ‘ସଫା’ ଆପ୍ ଏବଂ ହ୍ବାଟ୍ସଆପ୍ ନଂ. ୭୬୫୩୦୧୧୮୩୨ ମାଧ୍ୟମରେ ଲୋକମାନେ ଅଧିକ ସୂଚନା ପାଇପାରିବେ ବୋଲି ସୋମବାର ବିଏମ୍ସି ମୁଖ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ମେୟର ସୁଲୋଚନା ଦାସ ସୂଚନା ଦେଇଛନ୍ତି। ଏଥିସହ ସ୍ବଚ୍ଛ ସର୍ବେକ୍ଷଣ ୨୦୨୫-୨୬ ଏବଂ ବର୍ଜ୍ୟବସ୍ତୁ ପରିଚାଳନା ପାଇଁ ଉପଭୋକ୍ତା ଦେୟ (ୟୁଜର ଫି) ଦେବାକୁ ସେ ଅନୁରୋଧ କରିଛନ୍ତି। ଅଳିଆ ସଂଗ୍ରହ ପାଇଁ ବିଏମ୍ସିର କୋଟି କୋଟି ଟଙ୍କା ଖର୍ଚ୍ଚ ହେଉଛି। ତେଣୁ ଏଥିରେ ସହରବାସୀଙ୍କ ସହଯୋଗ ଲୋଡିଛନ୍ତି ମେୟର।
ବିଏମ୍ସି ପକ୍ଷରୁ ଧାର୍ଯ୍ୟ ହୋଇଥିବା ଫି’ ଅନୁଯାୟୀ, ଇଡବ୍ଲ୍ୟୁଏସ୍/ଏଲ୍ଆଇଜି ବର୍ଗ (୮୦୦ବର୍ଗ ମି. କ୍ଷେତ୍ର) ପାଇଁ ମାସକୁ ୫୦ ଟଙ୍କା ଧାର୍ଯ୍ୟ ହୋଇଛି। ସେହିଭଳି ଏମ୍ଆଇଜି ବର୍ଗ (୮୦୦ ବର୍ଗ ମି.ରୁ ୧୨୦୦ବର୍ଗ ମି.) ପାଇଁ ୭୫ ଟଙ୍କା ଏବଂ ଏଚ୍ଆଇଜି ବର୍ଗ ପାଇଁ ୧୨୫ଟଙ୍କା ୟୁଜର ଫି’ ରଖାଯାଇଛି। ଆର୍ଏଓ୍ବାଇ ଓ ପିଏମ୍ଏଓ୍ବାଇ ଯୋଜନାରେ ମିଳିଥିବା ଘର ପାଇଁ ୨୦ଟଙ୍କା ଏବଂ ଅନ୍ୟାନ୍ୟ ଯୋଜନାରେ ଘର ପାଇଥିବା ହିତାଧିକାରୀଙ୍କଠାରୁ ବର୍ଗଫୁଟକୁ ୫୦ ପଇସା ପର୍ଯ୍ୟନ୍ତ ଦେବାକୁ ପଡିବ। ସେହିପରି ଘରୋଇ ଶିକ୍ଷାନୁଷ୍ଠାନ ୧୦୦ ଛାତ୍ରୀଛାତ୍ର ପର୍ଯ୍ୟନ୍ତ ୧୦୦୦ଟଙ୍କା, ୧୦୧ରୁ ୫୦୦ ଛାତ୍ରୀଛାତ୍ର ଥିଲେ ୩୦୦୦ଟଙ୍କା ଏବଂ ୫ଶହରୁ ଊର୍ଦ୍ଧ୍ୱ ଛାତ୍ରୀଛାତ୍ର ଥିଲେ ପ୍ରାୟ ୪୦୦୦ ଟଙ୍କା ଫି’ ଧାର୍ଯ୍ୟ କରାଯାଇଛି। ମହାନଗର ନିଗମ ଅଧୀନରେ ଥିବା ବିଭିନ୍ନ ହାଟରୁ ମଧ୍ୟ ୟୁଜର ଫି’ ଆଦାୟ ହେବ। ରାସ୍ତାକଡ଼ ଦୋକାନୀ ତଥା ଭେଣ୍ଡିଂ ଜୋନ୍ ବ୍ୟବସାୟୀଙ୍କ ପାଇଁ ୫୦ଟଙ୍କା ଅଥବା ଦୈନିକ ୨ଟଙ୍କା, ହାଟରେ ଥିବା ଦୋକାନ (୨ଶହ ବର୍ଗଫୁଟ ପର୍ଯ୍ୟନ୍ତ) ପାଇଁ ୧୦୦ ଟଙ୍କା, ୨୦୧ରୁ ୫୦୦ ବର୍ଗଫୁଟ ବିଶିଷ୍ଟ ଦୋକାନ ପାଇଁ ୨୫୦ଟଙ୍କା ଏବଂ ୫୦୦ ବର୍ଗଫୁଟରୁ ଅଧିକ ଦୋକାନ ଘର ପାଇଁ ୫୦୦ଟଙ୍କା ୟୁଜର୍ସ ଫି’ ଧାର୍ଯ୍ୟ କରାଯାଇଛି। ସେହିଭଳି ଏଥର ସ୍ବଚ୍ଛ ସର୍ବେକ୍ଷଣରେ ଭୁବନେଶ୍ୱରକୁ ଦେଶର ଶ୍ରେଷ୍ଠ ସହର ଭାବେ ଗଢ଼ିତୋଳିବା ପାଇଁ ମେୟର ବିଏମ୍ସି ପକ୍ଷରୁ ଲୋକଙ୍କ ସହଯୋଗ କାମନା କରିଛନ୍ତି। ସ୍ବଚ୍ଛ ପରିବେଶ ସହ ସ୍ବଚ୍ଛ ବାୟୁ ଆମ ପାଇଁ ଅତ୍ୟନ୍ତ ଜରୁରୀ ହୋଇପଡିଛି। ସେଥିପାଇଁ ବିଏମ୍ସି ଜାତୀୟ ସ୍ବଚ୍ଛ ବାୟୁ କାର୍ଯ୍ୟକ୍ରମ (ଏନ୍ସିଏପି)ର ନିୟମ ଅନୁଯାୟୀ ବିଭିନ୍ନ ପଦକ୍ଷେପ ନେଉଛି। ଏହିକ୍ରମରେ ସ୍ବଚ୍ଛସାଥୀମାନେ ନିଜ ୱାର୍ଡରୁ ୨୦୧୮ ମସିହାରେ ବିଏମ୍ସି ଦ୍ୱାରା ଧାର୍ଯ୍ୟ ୟୁଜର ଫି’ ଆଦାୟ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଜାନୁଆରୀ ୧ରୁ ସହରବାସୀଙ୍କଠାରୁ ୟୁଜର ଫି’ ଆଦାୟ ଆରମ୍ଭ ହୋଇଥିବାବେଳେ ଏବେଠାରୁ ଫୁଲ୍ ଫେଜ୍ରେ ଆଦାୟ କରାଯିବ ବୋଲି ଅତିରିକ୍ତ କମିଶନର କୈଳାସ ଚନ୍ଦ୍ର ଦାସ ସୂଚନା ଦେଇଛନ୍ତି। ସମ୍ମିଳନୀରେ ଅତିରିକ୍ତ କମିଶନର ରତ୍ନାକର ସାହୁ, ରାଜସ୍ବ ଡେପୁଟି କମିଶନର ଅଜୟ ମହାନ୍ତି ଏବଂ ପରିମଳ ଡେପୁଟି କମିଶନର ଏନ. ଗଣେଶ ବାବୁ ଉପସ୍ଥିତ ଥିଲେ।
