ଓ୍ବାଶିଂଟନ,୨୮।୨: ଇରାନ ଉପରେ ଆମେରିକା ଓ ଇସ୍ରାଏଲର ମିଳିତ ସାମରିକ ଆକ୍ରମଣ ପରେ ମଧ୍ୟପ୍ରାଚ୍ୟରେ ଯୁଦ୍ଧ ଭୟଙ୍କର ରୂପ ନେଇଛି। ଏହି ଆକ୍ରମଣର କିଛି ଘଣ୍ଟା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଏହି ସାମରିକ ଅଭିଯାନର ମୁଖ୍ୟ ଉଦ୍ଦେଶ୍ୟ ହେଉଛି ଇରାନର ସାଧାରଣ ଜନତାଙ୍କୁ “ସ୍ବାଧୀନତା” ବା ମୁକ୍ତି ପ୍ରଦାନ କରିବା।
ଓ୍ବାଶିଂଟନ ପୋଷ୍ଟକୁ ଟ୍ରମ୍ପ ଫୋନ ଯୋଗେ ଜଣାଇଛନ୍ତି ଯେ “ମୁଁ କେବଳ ଲୋକମାନଙ୍କ ପାଇଁ ସ୍ବାଧୀନତା ଚାହୁଁଛି। ମୁଁ ଏକ ସୁରକ୍ଷିତ ଦେଶ ଚାହୁଁଛି ଏବଂ ଆମେ ତାହା ହାସଲ କରିବୁ।” ଆକ୍ରମଣ ପୂର୍ବରୁ ଟ୍ରମ୍ପ ଇରାନ ସେନାକୁ ଅସ୍ତ୍ରଶସ୍ତ୍ର ତ୍ୟାଗ କରି ଆତ୍ମସମର୍ପଣ କରିବାକୁ କହିଥିଲେ। ନଚେତ “ନିଶ୍ଚିତ ମୃତ୍ୟୁ”ର ସମ୍ମୁଖୀନ ହେବାକୁ ଚେତାବନୀ ଦେଇଥିଲେ।
ଏବେ ଟ୍ରମ୍ପ ଇରାନବାସୀଙ୍କୁ ଘର ଭିତରେ ସୁରକ୍ଷିତ ରହିବାକୁ କହିଛନ୍ତି, କାରଣ ‘ସବୁଆଡ଼େ ବୋମା ମାଡ଼ ହେବ।’ ସେ ଏହାକୁ ନିଜ ସରକାର ବିରୋଧରେ ସ୍ବର ଉତ୍ତୋଳନ କରିବାର ଏକ ଐତିହାସିକ ସୁଯୋଗ ବୋଲି ଦର୍ଶାଇଛନ୍ତି।
ଏୟାରବସ ଡିଫେନ୍ସ ଏଣ୍ଡ ସ୍ପେସ ପକ୍ଷରୁ ଜାରି ହାଇ-ରିଜୋଲ୍ୟୁସନ ସାଟେଲାଇଟ ଚିତ୍ରରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ସରକାରୀ ବାସଭବନ ପରିସରରେ ବ୍ୟାପକ କ୍ଷୟକ୍ଷତି ଦେଖିବାକୁ ମିଳିଛି। ବାସଭବନ କମ୍ପାଉଣ୍ଡର ଅନେକ ଗୁରୁତ୍ୱପୂର୍ଣ୍ଣ ଅଟ୍ଟାଳିକା ସମ୍ପୂର୍ଣ୍ଣ ରୂପେ ଭୁଶୁଡ଼ି ପଡ଼ିଥିବା ଏବଂ ସେଠାରୁ କଳା ଧୂଆଁ ବାହାରୁଥିବା ଦେଖାଯାଉଛି।
ଇରାନ ବୈଦେଶିକ ମନ୍ତ୍ରୀ ସୟଦ ଅବ୍ବାସ ଅରାଗଚି ଅଭିଯୋଗ କରିଛନ୍ତି ଯେ, ଏହି ଆକ୍ରମଣରେ ଏକ ବାଳିକା ପ୍ରାଥମିକ ସ୍କୁଲ ଉପରେ ବୋମାମାଡ଼ ହୋଇଛି, ଯେଉଁଥିରେ ପ୍ରାୟ ୫୦ ଜଣଙ୍କର ମୃତ୍ୟୁ ଘଟିଛି। ଆମେରିକା ଓ ଇସ୍ରାଏଲର ଆକ୍ରମଣର କିଛି ସମୟ ପରେ ଇରାନ ମଧ୍ୟ ମଧ୍ୟପ୍ରାଚ୍ୟରେ ଥିବା ଆମେରିକୀୟ ସୈନ୍ୟ ଘାଟିଗୁଡ଼ିକ ଉପରେ ଜବାବୀ ମିସାଇଲ ମାଡ଼ କରିଛି।
