ଦୁଇ ଅଭିଯୁକ୍ତଙ୍କୁ ମଧ୍ୟପ୍ରଦେଶ ହାଇକୋର୍ଟ ଏମିତି ସଜା ଦେଇଛନ୍ତି, ଜାଣିଲେ ପ୍ରଶଂସା ନ କରି ରହିପାରିବେନି। ଦୁଇ ଅଭିଯୁକ୍ତ ଏକ ସ୍କୁଲ ନିକଟରେ ଗୁଳି ଚଳାଇଥିଲେ। ତେବେ କୋର୍ଟ ଏହାର ବିଚାର କରି ଅଭିଯୁକ୍ତ ଦ୍ୱୟଙ୍କୁ ସେହି ସ୍କୁଲ ଏବଂ ଆଖପାଖରେ ଗଛ ଲଗାଇବାକୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ଶୀଲ୍ ନାଗୁ ଅଭିଯୁକ୍ତ ଦ୍ୱୟଙ୍କୁ ୧୦୦ଟି ଫଳଗଛ ଲଗାଇବାକୁ ଆଦେଶରେ ସ୍ପଷ୍ଟ କରିଛନ୍ତି। ଖାଲି ଏତିକି ନୁହେଁ ଗଛ ଲଗାଇବା ସହ ଏଥିରେ ବର୍ଷେ ପର୍ଯ୍ୟନ୍ତ ପାଣି ମଧ୍ୟ ଦେବାକୁ ନିର୍ଦ୍ଦେଶ ଦେଇଛନ୍ତି। ନିଜ ଖର୍ଚ୍ଚରେ ଗଛ ଚାରିପଟେ ବାଡ଼ ବୁଜିବାକୁ ନିର୍ଦ୍ଦେଶ ରହିଛି। କୋର୍ଟ ଆଦେଶ ଠିକ୍ ଭାବରେ ପାଳନ ହେଉଛି କି ନାହିଁ ଏହାକୁ ତଦାରଖ ପାଇଁ ବରିଷ୍ଠ ସରକାରୀ ଓକିଲ ସ୍କୁଲକୁ ଯାଇ ଟ୍ରାଏଲ କୋର୍ଟରେ ରିପୋର୍ଟ ଦାଖଲ କରିବାକୁ ମଧ୍ୟ ନିର୍ଦ୍ଦେଶ ରହିଛି।
ପ୍ରକାଶଥାଉ କି, ଭିଣ୍ଡ୍ ଜିଲା ଗୋହଦ ତହସିଲ ଅନ୍ତର୍ଗତ ଖନେତା ଗ୍ରାମ ନିବାସୀ ସିକନ୍ଦର ଏବଂ ଲଲୁ ୨୬ ଜାନୁଆରୀ ୨୦୧୯ରେ ସ୍କୁଲ ନିକଟରେ ଗୁଳି ଚାଳନା କରିଥିବା ଅଭିଯୋଗ ହୋଇଥିଲା। ୧୬ ଫେବୃୟାରୀରେ ପୋଲିସ ଦୁଇ ଅଭିଯୁକ୍ତଙ୍କୁ କୋର୍ଟଚାଲାଣ କରିଥିଲା। ଦୁଇଜଣ ୫୦ ହଜାର ଟଙ୍କା ଲେଖାଏ ଦେଇ ସର୍ତ୍ତରେ ଜାମିନରେ ଆସିଥିଲେ। ମଧ୍ୟପ୍ରଦେଶର କୋର୍ଟଙ୍କ ଉପରୋକ୍ତ ଆଦେଶକୁ ସାଧାରଣରେ ଢେର ପ୍ରଶଂସା କରାଯାଇଛି। ଏପରି ଆଦେଶ ଦେବା ଦ୍ୱାରା ସାମାଜିକ କାର୍ଯ୍ୟ ପ୍ରତି ଅଭିଯୁକ୍ତଙ୍କ ମନୋ ନିବେଶ ସହ ପରିବେଶ ସୁରକ୍ଷା ହୋଇପାରିବ। ଅନ୍ୟମାନେ ମଧ୍ୟ ଏଥିରୁ ସଚେତନ ହେବେ ବୋଲି ଜଷ୍ଟିସ ନାଗୁ କହିଛନ୍ତି।
