ଝରିଗାଁ,୭।୯(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲା ଝରିଗାଁ ବ୍ଲକ ଅନ୍ତର୍ଗତ ସାନଟେମରା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଅନ୍ତେବାସୀଙ୍କ ହଷ୍ଟେଲ ଛାଡିବା ଘଟଣାକୁ ଏହାରି ମଧ୍ୟରେ ମାସେ ବିତିଯାଇଛି । ତଥାପି ଜିଲା ପ୍ରଶାସନ ପକ୍ଷରୁ ଅନ୍ତେବାସୀଙ୍କ ମୌଳିକ ସୁବିଧା ପାଇଁ କୌଣସି ଦୃଷ୍ଟାନ୍ତ ମୂଳକ ପଦକ୍ଷେପ ଗ୍ରହଣ କରାଯାଇନାହିଁ।
ସୂଚନା ଯୋଗ୍ୟଯେ, ୨୦୧୭ ମସିହାରେ ଏହି ବିଦ୍ୟାଳୟରେ ବିନା ଭିତ୍ତଭୂମିରେ ଛାତ୍ରାବାସ ଖୋଲା ଯାଇଥିଲା। ସେହି ସମୟରେ ବିଦ୍ୟାଳୟର ଷଷ୍ଠ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ଅନ୍ତେବାସୀ ଶ୍ରେଣୀ ଗୃହରେ ରହୁଥିଲେ। ପରବର୍ତ୍ତୀ ସମୟରେ ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରମାନଙ୍କୁ ଅନ୍ତେବାସୀ ଭାବେ ବିଦ୍ୟାଳୟର ତିନୋଟି ଶ୍ରେଣୀ ଗୃହରେ ରଖାଯାଇଛି । ଗୋଟିଏ ଛାତ୍ରାବାସ ଖୋଲିବା ନେଇ ଅବଶ୍ୟକୀୟ ଭିତ୍ତଭୂମି ହେଉଛି ଉନ୍ନତ ମାନର ସୁରକ୍ଷିତ ଛାତ୍ରାବାସ, ଆବଶ୍ୟକୀୟ ଶୌଚାଳୟ , ରୋଷେଇ ଗୃହ, ଡାଇନିଙ୍ଗ ହଲ୍ , ବିଶୁଦ୍ଧ ପାନୀୟଜଳ ଇତ୍ୟାଦିର ଆବଶ୍ୟକତା ରହିଥାଏ ।
କିନ୍ତୁ ଏହି ବିଦ୍ୟାଳୟରେ ଛାତ୍ରାବାସ ଖୋଲିଯିବା ନାଁରେ ଆଜକୁ ନଅ ବର୍ଷ ବିତିଯାଇଥିଲେ ମଧ୍ୟ ଏହି ସବୁ ମୌଳିକ ସୁବିଧାରୁ ବଞ୍ଚିତ ହୋଇରହିଛନ୍ତି ଆଦିବାସୀ ପିଲାମାନେ । ଏଥିପାଇଁ ସମ୍ପୃକ୍ତ ଜିଲା ଶିକ୍ଷା ବିଭାଗ ତଥା ଜିଲା ପ୍ରଶାସନ ଦାୟୀ ରହିଥିବା ନେଇ ବୁଦ୍ଧିଜୀବୀ ମାନେ ମତ ପ୍ରକାଶ କରିଛନ୍ତି। ଅନ୍ତେବାସୀଙ୍କ ହଷ୍ଟେଲ ଛାଡିବା ଘଟଣା ପରେ ଜିଲା ଯୋଜନା ବୋର୍ଡ ଅଧ୍ୟକ୍ଷ ଗୌରୀଶଙ୍କର ମାଝୀ, ଜିଲାପାଳ ମହେଶ୍ୱର ସ୍ୱାଇଁ, ଜିଲା ଶିକ୍ଷାଧିକାରୀ ଛତ୍ରପତି ସାହୁ, ଜିଲା ମଙ୍ଗଳ ଅଧିକାରୀ ପାଲକା ରବୀନ୍ଦ୍ର ପ୍ରମୁଖ ଘାଟଣାର ତଦନ୍ତ କରିବାକୁ ଆସିଥିଲେ । ସେହି ସମୟରେ ଉପଜିଲାପାଳଙ୍କ ନେତୃତ୍ୱରେ ଏକ କମିଟି ଗଠନ କରାଯାଇ ପୁଙ୍ଖନୁପୁଙ୍ଖନ ଭାବେ ତଦନ୍ତ କରାଯିବ ବୋଲି କୁହାଯାଇଥିଲା । କିନ୍ତୁ ଇତି ମଧ୍ୟରେ ଆଜକୁ ଏକ ମାସ ସମୟ ବିତିଯାଇଥିଲେ ମଧ୍ୟ ଏଯାବତ୍ କୌଣସି କମିଟି ତଦନ୍ତକୁ ଆସିନାହାନ୍ତି । ଅପରପକ୍ଷରେ ଯଥାପୂର୍ବମ ତଥାପରମ୍ ଭଳି ଶ୍ରେଣୀ ଗୃହରେ ହିଁ ରହୁଛନ୍ତି ଅନ୍ତେବାସୀ ।
