କଟକ ଅଫିସ,୨୧ା୧୦- ହଳଧର ଦାସ ରାଜ୍ୟ କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ସେ ଆଉ ରାଜ୍ୟ ଦଳରୁ ଖେଳିବେ ନାହିଁ ବୋଲି ସ୍ପଷ୍ଟ କରିଛନ୍ତି। ଏ ନେଇ ହଳଧର ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ସମ୍ପାଦକ ସଞ୍ଜୟ ବେହେରାଙ୍କୁ ରବିବାର ଏକ ଚିଠି ମାଧ୍ୟମରେ ଅବଗତ କରାଇଛନ୍ତି। ୨୦୧୬ ମସିହାରୁ ହଳଧର ରାଜ୍ୟ କ୍ରିକେଟ ଦଳରୁ ଦୂରେଇ ଥିବା ବେଳେ ଅବସର ଘୋଷଣାର ଠିକ କାରଣ ଜଣାପଡ଼ିନାହିଁ । ତେବେ ଆଗାମୀ ଦିନରେ ହେବାକୁ ଥିବା ଓସିଏର ଖେଳାଳି ସଂଘ ନିର୍ବାଚନ ନିମନ୍ତେ ହଳଧରଙ୍କୁ ପ୍ରାର୍ଥୀ ଭାବେ ପ୍ରସ୍ତୁତ କରାଯାଉଛି ବୋଲି ବିଶେଷ ସୂତ୍ରରୁ ଜଣାପଡ଼ିଛି ।
୧୯୮୬ ମସିହା ଡିସେମ୍ବର ୧୦ ତାରିଖରେ ହଳଧରଙ୍କ ଜନ୍ମ। ଢ଼େଙ୍କାନାଳରେ ଜନ୍ମିତ ହଳଧର ୨୦୦୬ ମସିହାରେ ଓଡ଼ିଶା ସିନିୟର ଦଳରେ ସ୍ଥାନ ପାଇଥିଲେ । ଉଇକେଟ କିପର ଓ ଧୂଆଁଧାର ବ୍ୟାଟ୍ସମ୍ୟାନ ଭାବେ ତାଙ୍କୁ ଦଳରେ ନିଆଯାଇଥିଲା। ୨୦୦୬ ଫେବୃୟାରୀ ୧୧ରେ ଧାନବାଦରେ ଝାଡ଼ଖଣ୍ଡ ବିପକ୍ଷ ଏକଦିବସୀୟ ମ୍ୟାଚ୍ରେ ସେ ପଦାର୍ପଣ କରିଥିଲେ। ଓଡ଼ିଶା ୩୯ ରନରେ ପରାସ୍ତ ହୋଇଥିବା ବେଳେ ହଳଧର ୧୭ ରନରେ ଅପରାଜିତ ଥିଲେ। ଏହି ବର୍ଷ ନଭେମ୍ବର ୨୩ରେ ଘରୋଇ ମାଟିରେ ହଳଧର ରଣଜୀ ପଦାର୍ପଣ କରିଥିଲେ। ପଦାର୍ପଣ ମ୍ୟାଚ୍ରେ ହଳଧରଙ୍କ ସ୍କୋର ଥିଲା ୮୬ ରନ। ଏହା ମଧ୍ୟରେ ୯ଟି ଚୌକା ଓ ଗୋଟିଏ ଛକା ଥିଲା। ଉଇକେଟ କିପିଂ କରି ୫ଟି କ୍ୟାଚ୍ ମଧ୍ୟ ଧରିଥିଲେ। ହଳଧରଙ୍କ ଗୁରୁତ୍ୱପୂର୍ଣ୍ଣ ଇନିଂସ ଯୋଗୁ ଓଡ଼ିଶା ଅଗ୍ରଣୀ ନେଇ ୨ ପଏଣ୍ଟ ପାଇଥିଲା। ସର୍ଭିସେସ ପ୍ରଥମ ଇନିଂସ ୩୪୬ରେ ଅଲଆଉଟ ହୋଇଥିବା ବେଳେ ଓଡ଼ିଶା ୩୯୯ କରିଥିଲା। ପୂର୍ବତନ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତିଙ୍କ ପ୍ରଥମ ଶ୍ରେଣୀ କ୍ରିକେଟର ସର୍ବାଧିକ ସ୍କୋର(୯୭ ରନ) ମଧ୍ୟ ଏହି ମ୍ୟାଚ୍ରେ ଦେଖିବାକୁ ମିଳିଥିଲା। ହଳଧର ପ୍ରଥମ ଶ୍ରେଣୀ କ୍ରିକେଟରେ ୪୭ ମ୍ୟାଚ୍ରୁ ୧୮୩୫ ରନ କରିଛନ୍ତି। ଏହା ମଧ୍ୟରେ ୨ଟି ଶତକ ଓ ୧୦ଟି ଅର୍ଦ୍ଧଶତକ ରହିଛି। ପ୍ରଥମ ଶ୍ରେଣୀ କ୍ରିକେଟରେ ତାଙ୍କର ସର୍ବାଧିକ ସ୍କୋର ୧୪୪ । ଏହାଛଡ଼ା ପ୍ରଥମଶ୍ରେଣୀ କ୍ରିକେଟରେ ୧୪୦ଟି କ୍ୟାଚ୍ ଓ ୯ଟି ଷ୍ଟମ୍ପିଂ ମଧ୍ୟ ସେ କରିଛନ୍ତି । ଲିଷ୍ଟ-ଏ ଫର୍ମାଟ କ୍ରିକେଟରେ ୨୮ ମ୍ୟାଚ୍ରୁ ୬୩୩ ରନ କରିଛନ୍ତି ହଳଧର । ଏହା ମଧ୍ୟରେ ୪ଟି ଅର୍ଦ୍ଧଶତକ ରହିଛି । ଅପରାଜିତ ୮୮ ହେଉଛି ତାଙ୍କର ସର୍ବାଧିକ ସ୍କୋର । ୧୮ ଟି-୨୦ ମ୍ୟାଚ୍ରୁ ୧୮୪ ରନ କରିଥିବା ବେଳେ ସର୍ବାଧିକ ସ୍କୋର ହେଉଛି ୫୯ । ୨୦୧୬ ମସିହାରେ ବିଦର୍ଭ ବିପକ୍ଷରେ ସେ ଅନ୍ତିମ ରଣଜୀ ମ୍ୟାଚ ଖେଳିଥିଲେ। ଏହା ପୂର୍ବରୁ ୨୦୧୩ ମସିହାରେ ଶେଷ ଏକଦିବସୀୟ ଓ ୨୦୧୪ ମସିହାରେ ଶେଷ ଟି୨୦ ମ୍ୟାଚ୍ ସେ ଖେଳିଛନ୍ତି । ଆଇପିଏଲ୍ ଖେଳିବାରେ ସେ ଓଡ଼ିଶାର ପ୍ରଥମ କ୍ରିକେଟର୍ ଥିଲେ।
