ପର୍ଲା,୧୪।୧(ଡି.ଏନ୍.ଏ.)-
କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଜୟନ୍ତପୁର ଗଁାର ଗୟାଧର ଲୋହାର(୨୫)। ସେ ଅନେକ୍ ଦିନ୍ ହେଲା କେହେନ୍ସି ଗୁଟେ ଅଜନା ରୋଗ୍ରେ ପୀଡ଼ିତ ଅଛନ୍। ହେଲେ ଟଁକା ପଏସା ଅଭାବୁ ଚିକିଛା କରେଇ ନାଇଁପାରି କରି ଭଗବାନ ଭରସାରେ ଘରେ ପଡ଼ି ରହିଛନ୍।
ସୂଚନା ଅନ୍ସାରେ ଜୟନ୍ତପୁର ଗଁାର ଧନସିଂ ଲୋହାର(୬୫)କଁର ପରିବାର କହେଲେ ମାଏକିନା ଧନମତି(୫୫), ଦୁଇ ପୁଓ କେଶରୀ(୩୦), ଗୟାଧର(୨୫)କୁଁ ନେଇ ସଁସାର। ପରିବାରଟା ନିହାତି ଗରିବ୍। ବାପ୍ ପୁଓ ସଭେ ମିଶି ଲୁହୁରା ସାଲେ କାମ୍ କରୁଛନ୍। ସେଥ୍ରୁ ଯାହା କମାନି ହେଉଛେ ପରିବାରର ତେଲ୍ନୁନ୍ ଚଲୁଛେ। ଘରେ ଅଭାବ ଅନାଟନ ସବୁବେଲେ ଲାଗି ରହିଛେ। ସରକାରୀ ସାହାଯ୍ ହିସାବେ ପରିବାରକେ ଫିମାସ ପଁଚେତ୍ରୁ ୨୦ କେ.ଜି. ଚାଉଲ ମିଲୁଛେ। ଏନ୍ତାଥି ଗଲା ୪ ବଛର ତଲେ ସାନ୍ ପୁଓ ଗୟାଧରକଁର ଛାତିରେ ଗୁଟେ ଘା’ ହେଇଥିଲା। ପରିବାର ଲୋକ୍ ତାହାକୁ ଆସର ପାସର ଡାକ୍ତରଖାନାରେ ଚିକିଛା କରେଇ ନିରାଶ ହେଇଛନ୍। ଇଆଡ଼େ ଡାକ୍ତରକଁର କହେବାର ହେଲା ଉଚ ଚିକିଛା କଲେ ଗୟାଧରକଁର ରୋଗ୍ ଭଲ ହେଇଯିବା। ହେଲେ ଟଁକା ପଏସା ଅଭାବୁ ପରିବାର ଲୋକ୍ ଗୟାଧରକଁର ଉଚ ଚିକିଛା କରେଇ ନାଇଁପାରବାର। ଇଆଡ଼େ ଗୟାଧରକଁର ଛାତିର ଘା’ ଦିନୁଦିନ୍କେ ଚହଟି ଛାତି ସାରା ହେଇଗଲାନ। ଦରଦ୍ରେ ସେ ଅନେକ୍ ସମିଆରେ କିଲ୍ବିଲେଇ ଯାଉଛନ୍। ପରିବାର ପାସେ ରାଷ୍ଟ୍ରୀୟ ସ୍ବାସ୍ଥ୍ୟ ବୀମା କାର୍ଡ ରହିଛେ। ହେଲେ ସେଟା କାମେ ନାଇଁ ଲାଗୁଥିବାର ପରିବାର ଲୋକ୍ ଅଭିଯୋଗ କରିଛନ୍। ଗଲା ମାସ୍କେତେ ତଲେ ପରିବାର ଲୋକ୍ ଗୟାଧରକୁଁ ନେଇ ଜିଲା ମୁଖିଆ ଡାକ୍ତରଖାନା ଆର ନବରଙ୍ଗପୁର ଡାକ୍ତରଖାନାରେ ଚିକିଛା କରେଇଥିଲେ। ହେଲେ ଦିନାକେତେ ଚିକିଛା କରାଲା ଉତାରୁ ଟଁକା ପଏସା ଅଭାବୁ ତାହାକୁ ଘରକେ ଫିରେଇ ଆନ୍ଲେ। ପରିବାର ଲୋକ୍ ଡାକ୍ତରଖାନା କତୁରପକ୍ଷକୁଁ ରାଷ୍ଟ୍ରୀୟ ସ୍ବାସ୍ଥ୍ୟ ବୀମା କାର୍ଡ ଦେଖେଇଥିଲେ ବି କାମେ ନାଇଁଲାଗି ବଲି କହିଛନ୍। ଇଆଡ଼େ ଉଭଏ କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖିକଁର ଚିକିଛା ସୁବିଧା ଲାଗି ଅନେକ୍ ଲାଭ୍କାରୀ ଯୋଜନା କାଯ୍କାରୀ କରୁଥିଲାବେଲେ ଗୟାଧର ଲେଖେଁ ଝନେ ନିହାତି ଗରିବ୍ ପିଲା ଚିକିଛା ସୁବିଧାରୁ ବଁଚିତ୍ ହେଇ ରହିଛନ୍। ପୁଓର ଚିକିଛା ସାହାଯ୍ ଲାଗି ଧନସିଂ ଥାନୀଅ ସରପଁଚ୍ ରମଣୀ ଦୁରିଆକୁଁ ଗୁହାରି କରିଛନ୍। ସେ ଇ ବାବ୍ଦେ ଉପଜିଲାପାଲକଁୁ କହି ରେଡ୍କ୍ରସରୁ କିଛା ଟଁକା ପଏସା ସାହାଯ୍ ଲାଗି କହିମି ବଲି କଥା ଦେଇଛନ୍। ସେନ୍ତା ଇ ବାବ୍ଦେ ପର୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧ୍କାରୀ ସଞ୍ଜୀବ କୁମାର ନାଏକକୁଁ ପଚ୍ରାଲାରୁ ଯେତେ ଜଲ୍ଦି ହେବା ଗୟାଧରକଁର ଉଚ ଚିକିଛା ଲାଗି ବେବସ୍ତା କରାଯିବା ବଲି ସେ କହିଛନ୍।
