ମୁମ୍ବାଇ,୨୧।୧୧- ଦଳ ଅଲଆଉଟ୍ ହେଲା ପୁଣି କୌଣସି ବ୍ୟାଟ୍ସମ୍ୟାନ ରନ୍ଟିଏ ବି କରିପାରିଲେନି। ଏହା ଆଶ୍ଚର୍ଯ୍ୟ ଲାଗୁଥିଲେବି ସତ। ଏଭଳି ଘଟଣା ଘଟିଛି ମୁମ୍ବାଇରେ। ସ୍ଥାନୀୟ ଅନ୍ଧେରୀସ୍ଥିତ ଚିଲଡ୍ରେନ ଓ୍ବେଲଫେୟାର ସ୍କୁଲ ଏଭଳି ଏକ ଅଲୋଡ଼ା ରେକର୍ଡର ଅଧିକାରୀ ହୋଇଛି। ହାରିସ ଶିଲ୍ଡ ଟୁର୍ନାମେଣ୍ଟର ପ୍ରଥମ ରାଉଣ୍ଡରେ ବୋରିବଲିସ୍ଥିତ ସ୍ବାମୀ ବିବେକାନନ୍ଦ ଇଣ୍ଟରନ୍ୟାଶନାଲ ସ୍କୁଲ (ଏସ୍ଭିଆଇଏସ୍) ବିପକ୍ଷ ମ୍ୟାଚ୍ରେ ଅନ୍ଧେରୀ ଦଳର କୌଣସି ବ୍ୟାଟ୍ସମ୍ୟାନ ଖାତା ଖୋଲିପାରି ନ ଥିଲେ। ୬ ଓଭର ଖେଳିଥିବାବେଳେ ଅତିରିକ୍ତ ରନ୍ (୬ ଓ୍ବାଇଡ୍ ଓ ଏକ ବାଇ )ଯୋଗୁ ଏହି ଦଳ ୭ ରନ୍ରେ ପହଞ୍ଚିଥିଲା। ଫଳରେ ଚିଲଡ୍ରେନ୍ସ ଓ୍ବେଲଫେୟାର ଦଳ ଅବିଶ୍ୱସନୀୟ ୭୫୪ ରନ୍ର ବ୍ୟବଧାନରେ ପରାଜୟ ବରଣ କରିଛି। ବିଶ୍ୱାସ କରାଯାଉଛି, ପାରମ୍ପରିକ ଇଣ୍ଟର ସ୍କୁଲ କ୍ରିକେଟ ଟୁର୍ନାମେଣ୍ଟ ଇତିହାସରେ ଏହା ସର୍ବବୃହତ୍ ପରାଜୟ। ଆଜାଦ ମେଦାନର ନ୍ୟୁ ଇରା ଗ୍ରାଉଣ୍ଡରେ ପ୍ରଥମେ ବ୍ୟାଟିଂ କରିଥିବା ଏସ୍ଭିଆଇଏସ୍ ମିତ୍ ମାୟେକରଙ୍କ ଅପରାଜିତ ତ୍ରିଶତକ ବଳରେ ଧାର୍ଯ୍ୟ ୩୯ ଓଭରରେ ୪ ଉଇକେଟ ହରାଇ ୭୬୧ ରନ୍ କରିଥିଲା। ଦଳ ପାଇଁ ମାୟେକର ୧୩୪ ବଲର ସମ୍ମୁଖୀନ ହୋଇ ୩୩୮ ରନ୍ କରି ଅପରାଜିତ ଥିଲେ। ତାଙ୍କ ଇନିଂସରେ ୫୬ ଚୌକା ଓ ୭ ଛକା ସାମିଲ ଥିଲା। ପ୍ରତିପକ୍ଷ ଚିଲଡ୍ରେନ୍ସ ଓ୍ବେଲଫେୟାର ଧାର୍ଯ୍ୟ ୩ ଘଣ୍ଟାରେ ୬ ଓଭର କମ୍ ବୋଲିଂ କରିଥିଲେ। ଏହି ତ୍ରୁଟି ପାଇଁ ପେନାଲ୍ଟି ବାବଦକୁ ଏସ୍ଭିଆଇଏସ୍ ଦଳକୁ ୧୫୬ ରନ୍ ମିଳିଥିଲା। ଅନ୍ୟମାନଙ୍କ ମଧ୍ୟରେ କ୍ରିଷ୍ଣା ପାର୍ଟେ ୯୫ ଓ ଈଶାନ ରୟ ୬୭ ରନ୍ କରିଥିଲେ।
