ରାଞ୍ଚି,୪ା୧(ଆଇଏଏନ୍ଏସ୍): ଝାଡ଼ଖଣ୍ଡରେ ନୂଆ ସରକାର ଦାୟିତ୍ୱ ଗ୍ରହଣକରିବା ପରେ ମାଓବାଦୀମାନେ ସେମାନଙ୍କ ଅସଲ ରୂପ ଦେଖାଇଛନ୍ତି। ହଜାରିବାଗ୍ ଜିଲା କରିଗରା ନଦୀକୂଳରେ ପୋଲ ନିର୍ମାଣ କାର୍ଯ୍ୟ କରୁଥିବା ଏକ ଘରୋଇ କମ୍ପାନୀର ୬ଟି ଗାଡ଼ିକୁ ସେମାନେ ପୋଡ଼ିଦେଇଛନ୍ତି। ପ୍ରାୟ ୨୫ଜଣ ସଶସ୍ତ୍ର ମାଓବାଦୀ ସେଠାରେ ପହଞ୍ଚି ନିର୍ମାଣ କମ୍ପାନୀକୁ ୮ କୋଟି ଟଙ୍କା ବଟି ମାଗିଥିଲେ। ଦାଦାବଟି ଦେବାକୁ ମନାକରାଯିବାରୁ ମାଓବାଦୀମାନେ ଏଭଳି ପୋଡ଼ାଜଳା କରିଥିବା ପୋଲିସ କହିଛି। ଗତ ନଭେମ୍ବର ୨୨ରେ ପ୍ରାୟ ୧୫ ସଶସ୍ତ୍ର ମାଓବାଦୀ ଉକ୍ତି ନିର୍ମାଣ କମ୍ପାନୀ କ୍ୟାମ୍ପ ଉପରେ ଆକ୍ରମଣ କରିଥିଲେ। ସେଠାରେ କାର୍ଯ୍ୟରତ ଶ୍ରମିକଙ୍କୁ ମାଡ଼ମାରି ସେମାନଙ୍କ ମୋବାଇଲ ନେଇଯାଇଥିଲେ। ଘରୋଇ କମ୍ପାନୀ ପକ୍ଷରୁ ୧୨ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ସେଠାରେ ପୋଲ ନିର୍ମାଣ କରାଯାଉଛି। ଏଠାରେ ଉଲ୍ଲେଖଯୋଗ୍ୟ ଯେ, ୨୦୧୯ରେ ନିର୍ମାଣ କାର୍ଯ୍ୟରେ ନିୟୋଜିତ ମୋଟ ୬୦ ଗାଡ଼ିକୁ ମାଓବାଦୀମାନେ ପୋଡ଼ିବାରେ ସଫଳ ହୋଇଥିଲେ।
