କର୍ଲାମୁଣ୍ଡା,୨୮।୧୧(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକର ୩ଟି ସମବାୟ ସମିତି ଜରିଆରେ ଚାଷୀଙ୍କ ଧାନ କ୍ରୟ କରାଯିବାକୁ ଆନୁଷ୍ଠାନିକ ଭାବେ ରିଷିଡା, କର୍ଲାମୁଣ୍ଡା, ଯୋରାଡବ୍ରାଠାରେ ମଣ୍ଡି ଉଦ୍ଘାଟନ ହୋଇଛି। ମାତ୍ର ଚାଷୀଙ୍କ ଧାନ ଠିକ୍ ଭାବେ ଉଠି ପାରୁ ନ ଥିବାରୁ ଚାଷୀମାନେ ଗାଁ ଦଲାଲମାନଙ୍କ ପାଖରେ କମ୍ ଟଙ୍କାରେ ବିକ୍ରୟ କରିବାକୁ ବାଧ୍ୟ ହେଉଛନ୍ତି।
ସୂଚନାଯୋଗ୍ୟ, କର୍ଲାମୁଣ୍ଡା ମଣ୍ଡି ଭବାନୀପାଟଣା ଉପଜିଲାପାଳ ସୁଶାନ୍ତ ସିଂଙ୍କ ଦ୍ୱାରା ଉଦ୍ଘାଟନ ହେବାର ଗୋଟିଏ ସପ୍ତାହ ବିତିଯାଇଥିଲେ ହେଁ ୧୬ଜଣ ଚାଷୀଙ୍କ ୭୭୮ କ୍ୱିଣ୍ଟାଲ ୮କେଜି ଧାନ କିଣାଯାଇଛି। ସୋମବାରଠାରୁ ରିଷିଡ଼ା ମଣ୍ଡି ଉଦ୍ଘାଟନ ହେବାର ୩ଦିନ ପରେ ମଧ୍ୟ ଚାଷୀଙ୍କ ଧାନ ଉଠାଯାଇ ନ ଥିବା ଦେଖିବାକୁ ମିଳିଛି। ଅନ୍ୟପଟେ ବ୍ଲକର କର୍ଲାମୁଣ୍ଡା ସମବାୟ ସମିତି ଜରିଆରେ ୬୧ ହଜାର ୪୭୧ କ୍ୱିଣ୍ଟାଲ, ରିଷିଡା ମଣ୍ଡି ଜରିଆରେ ୪୭ ହଜାର ୧୬୨ କ୍ୱିଣ୍ଟାଲ ଓ ଯୋରାଡବ୍ରା ସମବାୟ ସମିତି ଜରିଆରେ ୪୧ ହଜାର ୪୬୧କ୍ୱିଣ୍ଟାଲ ଧାନ ଓ ଯୋରାଡବ୍ରା ପଞ୍ଚାୟତର ୧୭୬ ଜଣ ଚାଷୀଙ୍କ ଧାନ କ୍ରୟ ପାଇଁ ଲକ୍ଷ୍ୟ ଧାର୍ଯ୍ୟ ରହିଥିବା କର୍ଲାମୁଣ୍ଡା ଖାଉଟି ଯୋଗାଣ ଅଧିକାରୀ ସାନ୍ତାକର ପଧାନ କହିଛନ୍ତି। ତେବେ ରିଷିଡ଼ା ମଣ୍ଡିରୁ ଧାନ ଉଠିପାରୁ ନ ଥିବା ସମ୍ପର୍କରେ ଖାଉଟି ଯୋଗାଣ ଅଧିକାରୀଙ୍କୁ ପଚାରିବାରୁ ଗୁରୁବାର ଧାନ ଉଠାଯିବାର ବ୍ୟବସ୍ଥା କରୁଛୁ ବୋଲି କହିଛନ୍ତି।
