କେନ୍ଦୁଝର, ୨୦ା୧୧ (ସ୍ବ.ପ୍ର./ଡି.ଏନ.ଏ.)-କେନ୍ଦୁଝର ଜେଲରେ ବିଚାରାଧୀନ କଏଦୀ ପ୍ରଦୀପ ବେହେରାଙ୍କ ଆତ୍ମହତ୍ୟା କରିବାର ୨୪ ଘଣ୍ଟା ପରେ ତାଙ୍କ ପରିବାର ଲୋକଙ୍କ ଉପସ୍ଥିତିରେ ମୃତଦେହକୁ ଉଦ୍ଧାର କରାଯାଇଛି। ଏହି ଆତ୍ମହତ୍ୟା ଘଟଣାରେ ସେମାନଙ୍କ ପରିବାରବର୍ଗ ସନ୍ଦେହ ପ୍ରକାଶ କରି ଏହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ମୃତକ ପ୍ରଦୀପଙ୍କ ବାପା ପ୍ରଭାକର ବେହେରା ଓ ଗ୍ରାମବାସୀ ଏନେଇ ଟାଉନ ଥାନାରେ ଏତଲା ଦେବାସହ ଜିଲାପାଳ ଆଶୀଷ ଠାକ୍ରେଙ୍କୁ ଅତିରିକ୍ତ ଜିଲାପାଳଙ୍କ ଜରିଆରେ ଏକ ଦାବିପତ୍ର ପ୍ରଦାନ କରିଛନ୍ତି। ଜେଲରେ କଡ଼ା ସୁରକ୍ଷା ସତ୍ତ୍ୱେ ପ୍ରଦୀପଙ୍କ ଆତ୍ମହତ୍ୟା ଘଟଣା ସେମାନଙ୍କୁ ଚକିତ କରିଛି। ଏଥିପାଇଁ ମୃତକଙ୍କ ପରିବାରକୁ କ୍ଷତିପୂରଣ ଦିଆଯାଉ ବୋଲି ଗ୍ରାମବାସୀ ଦାବି କରିଛନ୍ତି।
ଉଲ୍ଲେଖନୀୟ ଯେ, ତେଲକୋଇ ଥାନା ଅଞ୍ଚଳର ପ୍ରଦୀପଙ୍କୁ ପୋଲିସ ଏକ ବଳାତ୍କାର ମାମଲାରେ ଗିରଫ କରି ଗତ ଜୁଲାଇରେ କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ସେ ଜେଲ ହାଜତରେ ରହିଆସୁଥିଲେ। ସୋମବାର ସନ୍ଧ୍ୟାରେ ସେ ଜେଲ ପରିସରରେ ଥିବା ଷ୍ଟାଫଙ୍କ ବିଶ୍ରାମ କୋଠରିରେ ପଶି ଏକ ଫ୍ୟାନରେ ଝୁଲି ଆତ୍ମହତ୍ୟା କରିଥିବା ଦେଖିବାକୁ ମିଳିଥିଲା। ଏନେଇ ଜେଲ କର୍ତ୍ତୃପକ୍ଷ ଟାଉନ ଥାନାକୁ ଜଣାଇବା ସହ ତେଲକୋଇ ପୋଲିସ ଜରିଆରେ ପରିବାର ଲୋକଙ୍କୁ ଜଣାଇଥିଲେ। ଟାଉନ ଥାନା ପୋଲିସ ଦୀର୍ଘ ୨୪ ଘଣ୍ଟା ପରେ ପରିବାର ଲୋକଙ୍କ ଉପସ୍ଥିତିରେ ମଙ୍ଗଳବାର ସନ୍ଧ୍ୟାରେ ଜଣେ ମାଜିଷ୍ଟ୍ରେଟଙ୍କ ଉପସ୍ଥିତିରେ ଉକ୍ତ କୋଠରି କବାଟ ଭାଙ୍ଗି ମୃତଦେହ ଉଦ୍ଧାର କରିଥିଲା। ପରେ ମୃତଦେହକୁ ବ୍ୟବଚ୍ଛେଦ ପାଇଁ ମେଡିକାଲ ପଠାଯାଇଛି। ଜେଲ ଡିଆଇଜି (ସମ୍ବଲପୁର) ଅମୀୟ ପଟ୍ଟନାୟକ ଅପରାହ୍ନରେ କେନ୍ଦୁଝର ଜେଲ ପରିଦର୍ଶନ କରି ଘଟଣା ଅନୁଧ୍ୟାନ କରିଛନ୍ତି।
