ହାଟଡିହୀ,୩୧। ୮(ଡି.ଏନ୍.ଏ.)-ପୁଅ ପାଠ ପଢ଼ିବ, ବଡ଼ ମଣିଷ ହେବ। ଗରିବ ମା’ ବାପାଙ୍କ ଦୁଃଖ ହଟିବ। ପୁଅକୁ ନେଇ ସେମାନେ କେତେ ସ୍ବପ୍ନ ଦେଖିଥିଲେ। କିନ୍ତୁ ସ୍ବପ୍ନ ସବୁ ଆଶା ମଉଳି ଯାଇଛି। ସେହି ପୁଅ ମା’ ବାପାଙ୍କ ବୋଝ ନେବା ପରିବର୍ତ୍ତେ ନିଜେ ବୋଝ ପାଲଟିଛନ୍ତି। ଚିକିତ୍ସା ଅଭାବରୁ ତାଙ୍କ ମାନସିକ ସ୍ଥିତି ବିଗିଡିବାରୁ ମା’ ବାପା ଦୀର୍ଘ ୧୭ ବର୍ଷ ହେଲା ପୁଅକୁ ହାତଗୋଡରେ ଶିକୁଳି ପକାଇ ଘରେ ବାନ୍ଧି ରଖିଛନ୍ତି। ଗରିବ ମା’ ବାପାଙ୍କ ଆଖିରୁ ଲୁହ ଶୁଖୁନି କି ଦୁର୍ଦ୍ଦଶା ଘୁଞ୍ଚି ପାରୁନି। ଅର୍ଥାଭାବରୁ ଚିକିତ୍ସା କରାଇ ନ ପାରି ଭଗବାନ ଓ ଭାଗ୍ୟକୁ ଭରସା କରି ଦିନ କାଟୁଛନ୍ତି।
କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ହାଟଡିହୀ ବ୍ଲକ ଆମ୍ବୋ ପଞ୍ଚାୟତ ଅଣତିରା ଗ୍ରାମରେ ଏଭଳି ଘଟଣା ପଦାକୁ ଆସିଛି। ଏହି ଗ୍ରାମର ଇନ୍ଦ୍ରମଣି ପରିଡା ଓ ରଜନୀ ପରିଡାଙ୍କ ପୁଅ ସନ୍ତୋଷ (୨୫)। ଜନ୍ମରୁ ତାଙ୍କ ଅବସ୍ଥା ସ୍ବାଭାବିକ ଥିଲା। ସେ ତୃତୀୟ ଶ୍ରେଣୀରେ ପଢୁଥିବାବେଳେ ହଠାତ୍ ରୋଗାକ୍ରାନ୍ତ ହୋଇ ମାନସିକ ସନ୍ତୁଳନ ହରାଇ ବସିଥିଲେ। ଗରିବ ଇନ୍ଦ୍ରମଣି ଦିନ ମଜୁରି ଲାଗି ଭଙ୍ଗା ମାଟିଝାଟି ଘରେ ଚଳୁଥିଲେ। ସେତେବେଳେ ଅର୍ଥାଭାବ କାରଣରୁ ସନ୍ତୋଷଙ୍କ ଉପଯୁକ୍ତ ଚିକିତ୍ସା କରାଇ ପାରି ନ ଥିଲେ। ତଥାପି ସେ ଧାର ଉଧାର କରି ପୁଅକୁ ବିଭିନ୍ନ ଡାକ୍ତରଖାନା ନେଇ ଡାକ୍ତରଙ୍କୁ ଦେଖାଇଥିଲେ। ସେଥିରେ ସନ୍ତୋଷ ଭଲ ହୋଇ ନ ଥିଲେ। ପରେ ଅର୍ଥାଭାବରୁ ସନ୍ତୋଷଙ୍କ ଚିକିତ୍ସା ବନ୍ଦ ହୋଇଗଲା। ଧୀରେ ଧୀରେ ସନ୍ତୋଷଙ୍କ ମାନସିକ ଅବସ୍ଥା ବିଗିଡିବାରୁ ବିଭିନ୍ନ ଅସ୍ବାଭାବିକ ଲକ୍ଷଣ ଦେଖିବାକୁ ମିଳିଲା। ତାଙ୍କ ମାନସିକ ସ୍ଥିତି ଦେଖି କାଳେ ସେ କୁଆଡେ ଚାଲିଯିବ କି ହଜିଯିବ ଏଭଳି ଆଶଙ୍କାରେ ରଜନୀ ଓ ଇନ୍ଦ୍ରମଣି ତାଙ୍କ ହାତ ଓ ଗୋଡରେ ଲୁହା ଶିକୁଳି ପକାଇ ଘର ଭିତରେ ବନ୍ଦ କରି ରଖିଥିଲେ। ସେବେଠାରୁ ଦୀର୍ଘ ୧୭ ବର୍ଷ ବିତି ଗଲାଣି। ଚିକିତ୍ସା ବିନା ସନ୍ତୋଷ ଶିକୁଳିରେ ବନ୍ଧା ହୋଇ ଜୀବନ ବିତାଉଛନ୍ତି। ମା’ ବାପା ଠାକୁରଙ୍କୁ ଡାକି ସରକାର ଓ ଜିଲା ପ୍ରଶାସନକୁ ଗୁହାରି ଜଣାଇ ଆଜି ବି ଚିକିତ୍ସା ସହାୟତାକୁ ଚାହିଁ ବସିଛନ୍ତି। ରଜନୀ ଓ ଇନ୍ଦ୍ରମଣି କହିଛନ୍ତି, ପୁଅଙ୍କ ଚିକିତ୍ସା ଲାଗି ସରକାରୀ ସାହାଯ୍ୟ ମିଳିଲେ ସେ ଭଲ ହୋଇପାରନ୍ତା। ସରକାର ଗରିବଙ୍କ ଲାଗି ବିଭିନ୍ନ ଯୋଜନା କରୁଛନ୍ତି। ତାଙ୍କ ଭଳି ଅସହାୟ ଓ ଗରିବଙ୍କ ପ୍ରତି ଦୃଷ୍ଟି ପଡିଲେ, ସନ୍ତୋଷ ନୂଆ ଜୀବନ ପାଇ ପାରନ୍ତା। ଏ ସମ୍ପର୍କରେ ପୂର୍ବତନ ଓାର୍ଡ଼ମେମ୍ବର ପ୍ରଦ୍ୟୁମ୍ନ ପଣ୍ଡା, ପଞ୍ଚାୟତ ବିଜୁ ଯୁବ ବାହିନୀର ସଭାପତି ମହେନ୍ଦ୍ର ଜେନା, ମମତାମୟୀ ମଣ୍ଡଳ, ସୌମ୍ୟରଞ୍ଜନ ସାହୁ, ବସନ୍ତ କୁମାର ମାଝି ପ୍ରମୁଖ କହିଛନ୍ତି, ଶିକୁଳିରେ ବନ୍ଧା ସନ୍ତୋଷଙ୍କ ସ୍ଥିତି ଅନୁଧ୍ୟାନ କରି ଚିକିତ୍ସା ବ୍ୟବସ୍ଥା କରାଇବା ସକାଶେ ସେମାନେ ଜିଲା ପ୍ରଶାସନକୁ ଜଣାଇଛନ୍ତି । ଏ ସମ୍ପର୍କରେ ଜିଲାମୁଖ୍ୟ ଚିକିତ୍ସାଧିକାରୀ ସୁଧାଂଶୁ ଶେଖର ବଳଙ୍କୁ ପଚାରିବାରୁ କହିଛନ୍ତି ଯେ, ଏପରି ଖବର ଆମ ପାଖରେ ନ ଥିଲା। ଅସୁସ୍ଥ ସନ୍ତୋଷଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଅଣାଗଲେ ତାଙ୍କ ଚିକିତ୍ସା ଲାଗି ବ୍ୟବସ୍ଥା କରାଯାଇ ପାରନ୍ତା।
