ଭୁବନେଶ୍ୱର, ୨୬ା୧୧(ବ୍ୟୁରୋ): ଆସନ୍ତା ଡିସେମ୍ବର ୧୦ରୁ ପିଆଜ ଦର କମିବା ସମ୍ଭାବନା ରହିଛି। କାରଣ ଇଜିପ୍ଟରୁ ସରକାର ପ୍ରାୟ ୧ ଲକ୍ଷ ୨୦ ହଜାର ଟନ୍ ପିଆଜ ଆମଦାନୀ କରିଛନ୍ତି। ଏହା ରବିବାର ଦେଶରେ ପହଞ୍ଚତ୍ ସାରିଛି। ଖୁବ୍ଶୀଘ୍ର ସାରା ଦେଶର ବଜାରରେ ଏହା ମିଳିବ। ସେହିପରି ନାସିକରୁ ଓଡ଼ିଶାକୁ ଆସନ୍ତା ୧୦ତାରିଖରୁ ନୂଆ ଅମଳ ପିଆଜ ଆସିବା ସମ୍ଭାବନା ରହିଛି। ଦୁଇ ସ୍ଥାନର ପିଆଜ ଉପଲବ୍ଧ ହେଲେ କିଲୋଗ୍ରାମ ପିଛା ଶହେ ଟଙ୍କା ଛୁଇଁଥିବା ଦର ପ୍ରାୟ ୪୦ଟଙ୍କା ହୋଇପାରେ ବୋଲି ଓଡ଼ିଶା ବ୍ୟବସାୟୀ ମହାସଂଘ ସାଧାରଣ ସମ୍ପାଦକ ସୁଧାକର ପଣ୍ଡା କହିଛନ୍ତି।
ରାଜ୍ୟରେ ପିଆଜର ସ୍ଥିତି କିପରି ଅଛି, କେବେ ସୁଦ୍ଧା ଦର ନିୟନ୍ତ୍ରଣକୁ ଆସିବ ତାହା ଜାଣିବା ପାଇଁ ସୋମବାର ରାଜ୍ୟ ସରକାରଙ୍କ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ବ୍ୟବସାୟୀ ସଂଘ ସହିତ ଆଲୋଚନା କରିଥିଲା। ଆଲୋଚନା ପରେ ସୁଧାକର ପଣ୍ଡା କହିଥିଲେ ଯେ, ବର୍ତ୍ତମାନ ରାଜ୍ୟରେ ଯଥେଷ୍ଟ ପରିମାଣର ପିଆଜ ଗଚ୍ଛିତ ଅଛି। କାରଣ ଉଚ୍ଚା ଦର ଯୋଗୁ ପିଆଜ ବିକ୍ରି କମ୍ ହେଉଛି। ଅନ୍ୟପକ୍ଷରେ ନାସିକ୍ରୁ ଆସନ୍ତା ଦୁଇ ତିନି ଦିନ ଭିତରେ ନୂଆ ଅମଳ ପିଆଜ ଅନ୍ୟତ୍ର ପଠାଯିବ। ତାହା ଓଡ଼ିଶା ଆସିବା ପାଇଁ ପ୍ରାୟ ୮/୧୦ ଦିନ ଲାଗିବ। ତେଣୁ ଆମେ ଆଶା ରଖିଛୁ ଆସନ୍ତା ୧୦ତାରିଖ ସୁଦ୍ଧା ପିଆଜ କିଲୋଗ୍ରାମ ପିଛା ୪୦ଟଙ୍କାରେ ପହଞ୍ଚତ୍ ଯାଇପାରେ। ସେହିପରି ଇଜିପ୍ଟରୁ ପିଆଜ ଆସିବା ଓ ଅଧିକ ଆସିବା ସମ୍ଭାବନା ଥିବା କାରଣରୁ ରବିବାର ଅପେକ୍ଷା ସୋମବାର ପିଆଜର ହୋଲ୍ସେଲ୍ ପ୍ରାଇସ୍ ୫୦୦ ଟଙ୍କା କମ୍ ରହିଛି। ଆସନ୍ତା ୧୦-୧୫ ଦିନ ଭିତରେ ନିଶ୍ଚିତ ଭାବେ ଏକ ଯୁକ୍ତିଯୁକ୍ତ ମୂଲ୍ୟ ଉପରେ ପିଆଜ ମିଳିବା ଆଶା ରହିଥିବା ପଣ୍ଡା କହିଛନ୍ତି।
ସୂଚନାଯୋଗ୍ୟ, ଗତମାସର ଅନିୟମିତ ବର୍ଷା ଫଳରେ ଦେଶରେ ପିଆଜ ଉତ୍ପାଦନ ପ୍ରଭାବିତ ହୋଇଥିଲା। ତେଣୁ ବଜାରରେ ଏହାର ଅଭାବ ସୃଷ୍ଟି ହୋଇଥିଲା। ବେଙ୍ଗାଲୁରୁ, ମହାରାଷ୍ଟ୍ରର ନାସିକ, ଆନ୍ଧ୍ରପ୍ରଦେଶର କର୍ନୁଲରୁ ଓଡ଼ିଶାକୁ ମୁଖ୍ୟତଃ ପିଆଜ ଆସିଥାଏ। କିନ୍ତୁ ଅନିୟମିତ ବର୍ଷା ପିଆଜ ଉତ୍ପାଦନକୁ ଗୁରୁତର ଭାବେ କମାଇ ଦେଇଛି। ଅନ୍ୟପଟେ ଡିସେମ୍ବର ପ୍ରଥମ ସପ୍ତାହରେ ଦେଶରେ ନୂଆ ପିଆଜ ଅମଳ ହୋଇଯିବ। ଫଳରେ ଆଉ ପିଆଜର ଅଭାବ ରହିବ ନାହିଁ ବୋଲି ଆଶା କରାଯାଉଛି। ଗତ କିଛି ଦିନ ହେଲା ରାଜ୍ୟର ବିଭିନ୍ନ ସହରରେ ପିଆଜ ଦର କିଲୋଗ୍ରାମ ପିଛା ୯୦ରୁ ଅଧିକ ରହିଛି। ଫଳରେ ସାଧାରଣ ଖାଉଟି ହନ୍ତସନ୍ତ ହେଉଛନ୍ତି। ଓଡ଼ିଶାରେ ଦୈନିକ ପ୍ରାୟ ୬ଶହରୁ ୭ଶହ ଟନ୍ ଅର୍ଥାତ୍ ୬ଲକ୍ଷରୁ ୭ ଲକ୍ଷ କିଲୋଗ୍ରାମ ଯାଏ ପିଆଜ ବିକ୍ରି ହୋଇଥାଏ। କିନ୍ତୁ ଦର ଅଧିକ ରହିଥିବାରୁ ମାତ୍ର ୨ଲକ୍ଷରୁ ଅଢ଼େଇ ଲକ୍ଷ କିଲୋଗ୍ରାମ ଯାଏ ପିଆଜ ବିକ୍ରି ହେଉଛି ବୋଲି ଜଣାପଡ଼ିଛି।
