ଲକ୍ଷ୍ନୌ,୧ ।୧୦: ଉତ୍ତର ପ୍ରଦେଶ ହାଥରସ ଗଣବଳାତ୍କାର ମାମଲା ବେଳକୁ ବେଳ ନୂଆ ମୋଡ ନେଇଛି । ପୀଡ଼ିତାଙ୍କ ମୃତ୍ୟୁ ପରେ ଏହାକୁ ନେଇ ରାଜନୀତି ହୋଇଛି ସରଗରମ । ଗୁରୁବାର ପିଡ଼ିତାଙ୍କ ପରିବାରକୁ ଭେଟିବାକୁ ଯାଇ ଗିରଫ ହୋଇଛନ୍ତି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଓ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ । ଏବେ ଏହାକୁ ନେଇ ଉତ୍ତର ପ୍ରଦେଶ ପୋଲିସ କହିଛି ମୃତକ ଯୁବତୀଙ୍କୁ ବଳାତ୍କାର କରାଯାଇ ନାହିଁ । ଆଗ୍ରାସ୍ଥିତ ଫୋରେନସିକ୍ ସାଇନ୍ସ ଲାବୋରୋଟୋରୀରେ ଅନୁସନ୍ଧାନ ପରେ ୟୁପି ପୋଲିସର ଏଡିଜି (ଆଇନ ଏବଂ ଅର୍ଡର) ପ୍ରଶାନ୍ତ କୁମାର ଦାବି କରିଛନ୍ତି ହାଥରସ ଘଟଣା ବଳାତ୍କାର ନୁହେଁ । ସେ କହିଛନ୍ତି ଘଟଣାକୁ ଭିନ୍ନ ରୂପ ଦିଆଯାଇ ପରିବେଶକୁ ଖରାପ କରୁଥିବା ଲୋକଙ୍କ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସୂଚନାଯୋଗ୍ୟ, ଏହି ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ କଥା ହୋଇ ଦୋଷୀ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯାଉ ବୋଲି କହିଥିଲେ ।
