ଭାପୁର, ୨୬।୫(ଡି.ଏନ.ଏ.)- ସାରା ରାଜ୍ୟରେ ଜାରି ରହିଛି ଅସହ୍ୟ ଗ୍ରୀଷ୍ମପ୍ରବାହ। ଏହା କେବଳ ଜନଜୀବନକୁ ଅସ୍ତବ୍ୟସ୍ତ କରୁଛି ତାହା ନୁହେଁ, ଏଥିରେ ବିଶେଷ ଭାବେ ପ୍ରଭାବିତ ହେଉଛନ୍ତି ବନ୍ୟଜନ୍ତୁ। ପ୍ରଚଣ୍ଡ ରୌଦ୍ରତାପରୁ ରକ୍ଷା ପାଇବାକୁ ଢେଙ୍କାନାଳ ଜିଲାର ସଂରକ୍ଷିତ ଜଙ୍ଗଲରେ ବିଚରଣ କରୁଥିବା ହାତୀ ଏବେ ଜଳାଶୟମୁହଁା ହୋଇଥିବା ଦେଖିବାକୁ ମିଳିଛି। ଭାପୁର ଅଞ୍ଚଳର କଇଁଆ ତଇଲା ଅଞ୍ଚଳରେ ଥିବା ପୋଖରୀକୁ ୩୦ଟିକିଆ ହାତୀପଲ କିଛିଦିନ ହେଲା ଜଳକ୍ରୀଡ଼ା କରିବାକୁ ଆସୁଛନ୍ତି। ଜଙ୍ଗଲ ପରିବେଶରେ ହାତୀଙ୍କ ଜଳକ୍ରୀଡ଼ା ଦେଖିବାକୁ ସାଧାରଣ ଲୋକ ଭିଡ଼ ଜମାଉଛନ୍ତି। ପୋଖରୀ ହିଡ଼ରେ ରହି ଶତାଧିକ ଲୋକ ହାତୀଙ୍କ ଗାଧୋଇବା ଦୃଶ୍ୟକୁ ଉପଭୋଗ କରୁଛନ୍ତି। ଅନ୍ୟପଟେ ଏପରି ଭିଡ଼ ହାତୀଙ୍କୁ ଅଯଥାରେ ଉତ୍ତ୍ୟକ୍ତ କରୁଛି। ହାତୀଙ୍କ ସୁରକ୍ଷା ଏବଂ ସେମାନଙ୍କ ଜଳକ୍ରୀଡ଼ାରେ ଯେପରି କେହି ବାଧକ ନ ହୁଏ ସେ ନେଇ ବନ ବିଭାଗ ନଜର ରଖିଛି। ତେବେ କର୍ମଚାରୀ ଅଭାବରୁ ସମସ୍ୟା ସୃଷ୍ଟି ହେଉଛି। ହାତୀ ଜନବସତିମୁହଁା ହେବା ଆଶଙ୍କା ଥିବାରୁ ସନ୍ଧ୍ୟାପରେ ନିୟମିତ ପାଟ୍ରୋଲିଂ କରିବାକୁ ଦାବି ହେଉଛି।
