କଟକ ଅଫିସ,୧୨ା୧୧-
ସୁରଟର ଲାଲଭାଇ କଣ୍ଟ୍ରାକ୍ଟର ଷ୍ଟାଡିୟମରେ ସୋମବାର ଖେଳାଯାଇଥିବା ସୟଦ ମୁସ୍ତାକ ଅଲ୍ଲୀ ଟି୨୦ ଟୁର୍ନାମେଣ୍ଟର ଏକ ମ୍ୟାଚରେ ଓଡ଼ିଶା ୭ ଉଇକେଟରେ ସିକ୍କିମ୍କୁ ପରାସ୍ତ କରିଛି। ସିକ୍କିମ ପକ୍ଷରୁ ଧାର୍ଯ୍ୟ ୧୨୨ ରନର ବିଜୟ ଲକ୍ଷ୍ୟର ପିଛା କରି ଓଡ଼ିଶା ୧୭.୧ ଓଭରରେ ୩ ଉଇକେଟ ହରାଇ ୧୨୫ ରନ ସଂଗ୍ରହ କରି ନେଇଥିଲା।
ପ୍ରତିଯୋଗିତାରେ ଓଡ଼ିଶାର ଏହା ଥିଲା ପ୍ରଥମ ବିଜୟ। ପୂର୍ବରୁ ଝାଡ଼ଖଣ୍ଡ ଓ ଦିଲ୍ଲୀ ବିପକ୍ଷ ମ୍ୟାଚ୍ ବର୍ଷା ଯୋଗୁ ବାତିଲ ହୋଇଥିବା ବେଳେ ଉଭୟ ଦଳ ମଧ୍ୟରେ ପଏଣ୍ଟ ଭାଗ ହୋଇଛି। ମଙ୍ଗଳବାର ଜମ୍ମୁ-କାଶ୍ମୀର ବିପକ୍ଷରେ ଓଡ଼ିଶା ପରବର୍ତ୍ତୀ ମ୍ୟାଚ୍ ଖେଳିବ ।
ସିକ୍କିମ୍ ବିପକ୍ଷ ମ୍ୟାଚ୍ରେ ଉଇକେଟ କିପର ପ୍ରବୀଣ ଲୋହାଙ୍କୁ ପଦାର୍ପଣ ସୁଯୋଗ ଦିଆଯାଇଥିଲା। ସକ୍କିମ୍ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ୪ର୍ଥ ଓଭର ଶେଷ ବଲରେ ସ୍ପିନର ପପୁ ରାୟ ଓପନର ବିବେକ ଦିୱାଲିଙ୍କୁ ଉଇକେଟ କିପର ପ୍ରବୀଣଙ୍କ ଦ୍ୱାରା କ୍ୟାଚ୍ ଆଉଟ କରାଇଥିଲେ। ବିବେକ ୧୦ରନରେ ଆଉଟ ହୋଇଥିବା ବେଳେ ସିକ୍କିମ୍ର ଦଳୀୟ ସ୍କୋର ଥିଲା ୨୧। ଅନ୍ୟତମ ଓପନର ଆଶିଷ ଥାପ୍ପା ଓ ବ୍ୟାଟିଂ କ୍ରମ ୩ନଂରେ ଆସିଥିବା ଯଶପାଲ ସିଂ ସତର୍କତାର ସହ ବ୍ୟାଟିଂ କରି ଦଳୀୟ ସ୍କୋରକୁ ୫୦ ଅତିକ୍ରମ କରାଇଥିଲେ । ଆଶିଷ ଧିମା ଗତିରେ ବ୍ୟାଟିଂ କରୁଥିବା ଦେଖିବାକୁ ମିଳିଥିଲା। ୩୬ବଲରୁ ୨୬ରନ କରିଥିବା ବେଳେ ଆଶିଷ ସନ୍ଦୀପ ପଟ୍ଟନାୟକଙ୍କ ଦ୍ୱାରା ରନଆଉଟ ହୋଇଥିଲେ। ଅଧିନାୟକ ଇକବାଲ ଅବଦୁଲା ୭ରନ ଓ ପାଲଜୋର ତମାଙ୍ଗ ୫ରନରେ ଯଥାକ୍ରମେ ସୂର୍ଯ୍ୟକାନ୍ତ ପ୍ରଧାନ ଓ ଅଙ୍କିତ ଯାଦବଙ୍କ ଶିକାର ହୋଇଥିଲେ। ଯଶପାଲ ୬୩ ଓ ଇଶ୍ୱର ଚୌଧୁରୀ ୬ରନକରି ଅନ୍ତିମ ପର୍ଯ୍ୟନ୍ତ ଅପରାଜିତ ଥିଲେ। ସିକ୍କିମ୍ ୪ ଉଇକେଟ ହରାଇ ୧୨୧ରନ କରିଥିଲା। ଅଙ୍କିତ ଯାଦବଙ୍କ ୪ ଓଭର ବୋଲିଂ ସ୍ପେଲ ପ୍ରଭାବଶାଳୀ ଥିଲା। ୧୭ରନ ବିନିମୟରେ ଅଙ୍କିତ ଗୋଟିଏ ଉଇକେଟ ଦଖଲ କରିଥିଲେ। ସୂର୍ଯ୍ୟକାନ୍ତ ଓ ପପୁ ଗୋଟିଏ ଲେଖାଏ ଉଇକେଟ ପାଇଥିଲେ। ୩ ଉଇକେଟ ହରାଇବା ସହ ୧୭ଟି ବଲ ବାକି ରଖି ଓଡ଼ିଶା ବିଜୟ ଲକ୍ଷ୍ୟ ହାସଲ କରିଥିଲା। ଦଳ ପକ୍ଷରୁ ଶୁଭ୍ରାଂଶୁ ସେନାପତି ସର୍ବାଧିକ ୪୪ରନ କରିଥିଲେ। ସେ ଅପରାଜିତ ରହି ଦଳକୁ ବିଜୟୀ କରାଇଥିଲେ। ଓପନିଂରେ ଆସିଥିବା ଅଧିନାୟକ ଗୋବିନ୍ଦ ପୋଦ୍ଦାର ୨୪ ଓ ସନ୍ଦୀପ ପଟ୍ଟନାୟକ ୨୦ରନର ଦ୍ରୁତ ଇନିଂସ ଖେଳିଥିଲେ। ବିପ୍ଳବ ସାମନ୍ତରାୟ ମଧ୍ୟକ୍ରମରେ ୩୦ରନର ଉପଯୋଗୀ ଇନିଂସ ଖେଳିଥିଲେ। ସିକ୍କିମର ପାଲଜୋର ତମାଙ୍ଗ ୨୦ରନ ବିନିମୟରେ ସର୍ବାଧିକ ୨ଟି ଉଇକେଟ ଅକ୍ତିଆର କରିଥିବା ବେଳେ ଅଧିନାୟକ ଇକବାଲଙ୍କୁ ଗୋଟିଏ ଉଇକେଟ ମିଳିଥିଲା ।
