ସାଉଥାମ୍ପଟନ,୨୧।୬- ସ୍ଥାନୀୟ ସ୍ପ୍ରିଙ୍ଗହିଲ ସ୍କୁଲର ୩୦ ଛାତ୍ରୀଛାତ୍ରଙ୍କ ଲାଗି ଗୁରୁବାର ଥିଲା ସ୍ବତନ୍ତ୍ର ଦିନ। କାରଣ ଭାରତୀୟ କ୍ରିକେଟ ଦଳର ଅଧିନାୟକ ତଥା ନଂ ୧ ଦିନିକିଆ ବ୍ୟାଟ୍ସମ୍ୟାନ ବିରାଟ କୋହଲି ସେମାନଙ୍କ ସହ ଖେଳିଥିଲେ। ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପ୍ରୋଗ୍ରାମ ଅବସରରେ ଉକ୍ତ ସ୍କୁଲର ଛାତ୍ରୀଛାତ୍ର କୋହଲିଙ୍କୁ ଭେଟିବାକୁ ସୁଯୋଗ ପାଇଥିଲେ। ୩୦ ବର୍ଷୀୟ ବ୍ୟାଟ୍ସମ୍ୟାନ କୁନି ପ୍ରଶଂସକଙ୍କୁ ନିରାଶ ନ କରି ଫଟୋ ଉଠାଇବା ସହ ପ୍ରତ୍ୟେକଙ୍କୁ ଅଟୋଗ୍ରାଫ ଦେଇଥିଲେ। ୯ ବର୍ଷୀୟ ଶିଭେନ କୁମାର ନାମକ ଛାତ୍ର ନିଜ ବ୍ୟାଟ୍ରେ ଦୁଇ ଫେଭରାଇଟ୍ ଖେଳାଳି କୋହଲି ଓ ମହେନ୍ଦ୍ର ସିଂ ଧୋନୀଙ୍କ ଅଟୋଗ୍ରାଫ ନେଇଥିଲା। କୋହଲି ବହୁତ ଦୟାଳୁ ବୋଲି ଭାରତୀୟ ଅଧିନାୟକଙ୍କ ସମ୍ପର୍କରେ ଶିଭେନ କହିଥିଲେ। ଏହି କାର୍ଯ୍ୟକ୍ରମରେ ଭାରତୀୟ ଦଳର ସଦସ୍ୟ ଲୋକେଶ ରାହୁଲ ଓ ହାର୍ଦ୍ଦିକ ପାଣ୍ଡ୍ୟା ମଧ୍ୟ ଉପସ୍ଥିତ ଥିଲେ।
