ନୂଆଦିଲ୍ଲୀ,୧୧।୧୦: ପ୍ରଧାନମନ୍ତ୍ରୀ ମୋଦି ସରକାରଙ୍କ ଦ୍ୱିତୀୟ ଇନିଂସରେ ବୈଦେଶିକ ମନ୍ତ୍ରୀ ଥିବା ଏସ୍. ଜୟଶଙ୍କର ଏବେ ପୂର୍ବତନ ବୈଦେଶିକ ମନ୍ତ୍ରୀ ସ୍ବର୍ଗତାଃ ସୁଷମା ସ୍ବରାଜଙ୍କ ପଥ ଅନୁସରଣ କରୁଥିବା ଦେଖାଯାଇଛି। ଏବେ ସେ ସୁଷମାଙ୍କ ଭଳି ସୋସିଆଲ ମିଡିଆରେ ଲୋକଙ୍କ ଅଭିଯୋଗ ଶୁଣିବା ଓ ତାଙ୍କୁ ସାହାଯ୍ୟ କରିବାକୁ ଆଗେଇ ଆସୁଛନ୍ତି। ସୂଚନା ଅନୁଯାୟୀ, କୁଏଟ୍ରେ ଫଶି ରିହିଥିବା ଜଣେ ମହିଳାଙ୍କୁ ଉଦ୍ଧାର କରିବା ଲାଗି ତାଙ୍କ ପରିବାର ଲୋକେ ସୋସିଆଲ ମିଡିଆ ମାଧ୍ୟମରେ ଜୟଶଙ୍କରଙ୍କୁ ଅନୁରୋଧ କରିଥିଲେ। ଆଉ ଏହା ଜାଣିବା ପରେ ଜୟଶଙ୍କର ଭାରତୀୟ ଦୂତାବାସ ସହ ସମ୍ପର୍କ କରି ମହିଳା ଜଣଙ୍କୁ ଆଶ୍ରୟ ଗୃହରେ ରଖିବା ସହ ତୁରନ୍ତ ତାଙ୍କ ଉଦ୍ଧାର କରିବାର ପ୍ରକ୍ରିୟା ଆରମ୍ଭ କରିବେ ବୋଲି ମହିଳାଙ୍କ ପରିବାରଙ୍କୁ ଆଶ୍ୱାସନା ଦେଇଛନ୍ତି। ସୂଚନାଯୋଗ୍ୟ, ଟୁଇଟରରେ ଜଣେ ବ୍ୟକ୍ତି ବୈଦେଶିକ ମନ୍ତ୍ରୀଙ୍କୁ ଟ୍ୟାଗ କରି ଉକ୍ତ ମହିଳା ଜଣଙ୍କ ଗୁରଦାସପୁରର ଓ କୁଏଟ୍ରେ ତାଙ୍କୁ ନିର୍ଯ୍ୟାତନା ଦିଆଯାଉଥିବା କଥା ଜଣାଇଥିଲେ। ଏହାପରେ ଜୟଶଙ୍କର ଏହାର ତୁରନ୍ତ ଉତ୍ତର ଦେଇ ମହିଳାଙ୍କୁ ଉଦ୍ଧାର କରାଯିବାର ପ୍ରକ୍ରିୟା ଆରମ୍ଭ କରିଦେଇଥିବା ଜଣାପଡିଛି।
