ବେଙ୍ଗାଲୁରୁ, ୨୨।୩ (ପି.ଟି.) – ବିଶ୍ୱରେ ଭୟଙ୍କର ପରିସ୍ଥିତି ସୃଷ୍ଟି କରିଥିବା କରୋନା ଭାଇରସ ସତ୍ତ୍ୱେ ଭାରତୀୟ ହକି ଦଳ ‘ସୁରକ୍ଷିତ ପରିବେଶ’ରେ ଆଗାମୀ ଅଲିମ୍ପିକ୍ସ ପାଇଁ ସେମାନଙ୍କ ପ୍ରସ୍ତୁତି ଚଳାଇଛନ୍ତି। ସ୍ଥାନୀୟ ଭାରତୀୟ କ୍ରୀଡ଼ା ପ୍ରାଧିକରଣ (ସାଇ) ସେଣ୍ଟର ପରିସରରେ ଆଇସୋଲେଶନରେ ରହି ଭାରତର ଉଭୟ ମହିଳା ଓ ପୁରୁଷ ହକି ଖେଳାଳି ଟୋକିଓ ଅଲିମ୍ପିକ୍ସପାଇଁ ନିଜକୁ ପ୍ରସ୍ତୁତ କରୁଛନ୍ତି। ଭାରତୀୟ ଖେଳାଳି ଏଠାରେ ଅଭ୍ୟାସ କରୁଥିବାରୁ ସାଇ ସେଣ୍ଟରକୁ ସମ୍ପୂର୍ଣ୍ଣ ଭାବେ ପ୍ରସ୍ତୁତ କରାଯାଇଛି। ଏଥିସହ ସେଣ୍ଟର ପରିସରକୁ ବାହାର ଲୋକଙ୍କ ପ୍ରବେଶ ଉପରେ କଟକଣା ଜାରି କରାଯାଇଛି। ‘କରୋନା ଭାଇରସ ଆମର ଅଭ୍ୟାସ ସେସନକୁ ପ୍ରଭାବିତ କରିପାରିବ ନାହିଁ। ଆମେ ନିୟମିତ ଅନ୍ତରରେ ହାତ ଧୋଉଛୁ ଏବଂ ଆମ ଖେଳାଳିଙ୍କ ତାପମାତ୍ରାକୁ ମଧ୍ୟ ଚେକ୍ କରାଯାଉଛି। ଆମେ ଏକ ସୁରକ୍ଷିତ ପରିବେଶରେ ଅଭ୍ୟାସ କରୁଥିବା ନେଇ ସାଇ ପରିସରରେ ରହିଥିବା କ୍ରୀଡ଼ା ଅଧିକାରୀ କହୁଛନ୍ତି। ସାଇ ଓ ଆମ କୋଚ୍ଙ୍କ ସମର୍ଥନ ପାଇ ଆମେ ଅଲିମ୍ପିକ ଲାଗି କଠିନ ପରିଶ୍ରମ କରୁଛୁ’ ବୋଲି ଭାରତୀୟ ପୁରୁଷ ହକି ଦଳର ଅଧିନାୟକ ମନ୍ପ୍ରୀତ୍ ସିଂ କହିଛନ୍ତି। ସେହିଭଳି ଏକ ‘ସୁରକ୍ଷିତ ପରିବେଶ’ରେ ଅଭ୍ୟାସ କରିବାର ସୁଯୋଗ ପାଇଥିବାରୁ ଭାରତୀୟ ମହିଳା ହକି ଦଳର ଅଧିନାୟିକା ରାଣୀ ରାମପାଲ ଭାଗ୍ୟବାନ ମଣିଛନ୍ତି। ‘ସାଇ କ୍ୟାମ୍ପସ୍ ପରିସରରେ ଏଭଳି ସୁବିଧା ସୁଯୋଗ ପାଇଥିବାରୁ ଆମେ ବହୁତ ଭାଗ୍ୟଶାଳୀ। ଏଠାରେ ରହିଥିବା ସମସ୍ତ ଖେଳାଳି କଠିନ ପରିଶ୍ରମ କରୁଛନ୍ତି। ତେଣୁ ହକି ଟିମ୍ ଅଲିମ୍ପିକ୍ସ ପାଇଁ ପ୍ରସ୍ତୁତି ଜାରି ରଖିବ। ଆମର ସ୍ବାସ୍ଥ୍ୟକୁ ପ୍ରତିଦିନ ଚେକ୍ କରାଯାଉଛି। ଆବଶ୍ୟକୀୟ ସମସ୍ତ ସାବଧାନତା ଆମେ ଅବଲମ୍ବନ କରୁଛୁ। ଆମର ମୁଖ୍ୟ ଲକ୍ଷ୍ୟ ଟୋକିଓ ଅଲିମ୍ପିକ୍ସରେ କିଭଳି ଭଲ ପ୍ରଦର୍ଶନ କରିପାରିବୁ ସେଥିନେଇ ସାଇ ଅଧିକାରୀ ସର୍ବଦା ସାହାଯ୍ୟ କରୁଛନ୍ତି’ ବୋଲି ରାଣୀ କହିଛନ୍ତି। ଉଲ୍ଲେଖଯୋଗ୍ୟ, ଟୋକିଓ ଅଲିମ୍ପିକ୍ସର ପୁରୁଷ ବିଭାଗ ହକିରେ ନ୍ୟୁଜିଲାଣ୍ଡ ବିପକ୍ଷରେ ଖେଳି ଭାରତ ଏହାର ଅଭିଯାନ ଆରମ୍ଭ କରିବ। ସେହିଭଳି ରାଣୀଙ୍କ ଦଳ ନେଦରଲାଣ୍ଡ୍ସ ବିପକ୍ଷରେ ଏହାର ପ୍ରଥମ ମ୍ୟାଚ୍ ଖେଳିବ। ଉଭୟ ମ୍ୟାଚ୍ ଜୁଲାଇ ୨୫ରେ ଅନୁଷ୍ଠିତ ହେବ।
