ଭୁବନେଶ୍ୱର, ୨୩।୫(କ୍ରୀଡ଼ା ପ୍ରତିନିଧି):ଇଣ୍ଡିଆନ ସୁପର ଲିଗ୍(ଆଇଏସଏଲ)ର ୭ମ ସଂସ୍କରଣ ପୂର୍ବରୁ ଭୁବନେଶ୍ୱର ଭିତ୍ତିକ ଦଳ ଓଡ଼ିଶା ଏଫସି ୨୧ ବର୍ଷୀୟ ମିଡ୍ଫିଲ୍ଡର ସାମୁଏଲ୍ ଲାଲମୁଆନପୁଇଆଙ୍କ ସହିତ ଚୁକ୍ତି କରିଛି। ଗତ ସିଜନରେ ଆଇଏସଏଲର ଅନ୍ୟତମ କ୍ଲବ କେରଳ ବ୍ଲାଷ୍ଟର୍ସ ପକ୍ଷରୁ ପ୍ରତିନିଧିତ୍ୱ କରିଥିବା ମିଜୋରାମର ସାମୁଏଲ ପୂର୍ବରୁ ଆଇ-ଲିଗ୍ କ୍ଲବ ଶିଲଂ ଲାଜଂ ଓ ମିନର୍ଭା ପଞ୍ଜାବ ପକ୍ଷରୁ ଖେଳିଥିଲେ। ସାମୁଏଲଙ୍କୁ ସ୍ବାଗତ କରିଛନ୍ତି ଓଡ଼ିଶା ଏଫ୍ସି କ୍ଲବ ସଭାପତି ରୋହନ ଶର୍ମା। ଅନେକ ଦିନରୁ ମୁଁ ଲାଲମୁଆନପୁଇଆଙ୍କ ଉପରେ ନଜର ରଖିଥିଲି। ତାଙ୍କ ସହିତ ଚୁକ୍ତି କରି ମୁଁ ବହୁତ ଖୁସି। ତାଙ୍କ ଉପସ୍ଥିତିରୁ ଆମ କ୍ଲବ ଫାଇଦା ପାଇବା ଆଶା ରହିଛି ବୋଲି ରୋହନ କହିଛନ୍ତି। ଲାଲମୁଆନପୁଇଆ ମଧ୍ୟ ଓଡ଼ିଶା ଏଫ୍ସିକୁ ଆସି ବହୁତ ଖୁସି ବୋଲି କହିଛନ୍ତି। ଏହି ଦଳର ଅନେକ ପ୍ରଶଂସକ ଅଛନ୍ତି ଏବଂ ଭୁବନେଶ୍ୱରରେ ସ୍ଥାନୀୟ ଦର୍ଶକଙ୍କ ସମ୍ମୁଖରେ ଖେଳିବାକୁ ମନରେ ଉତ୍ସାହ ରହିଛି। ଆଗାମୀ ସିଜନରେ ଦଳର ସଫଳତାରେ ମୋର ଯୋଗଦାନ ରହିବାନେଇ ବିଶ୍ୱାସ ରହିଛି ବୋଲି ଲାଲମୁଆନପୁଇଆ କହିଛନ୍ତି ।
