ବାହାନଗା,୨୬।୯(ଡି.ଏନ୍.ଏ.): ବାଲେଶ୍ବର ଜିଲା ବାହାନଗା ବ୍ଲକ ଆରୁହାବାଡ଼ ପଞ୍ଚାୟତର ଦୋଳପୁର ଗ୍ରାମରେ ଗୁରୁବାର ସକାଳେ ଏକ ବିଷାକ୍ତ ସାପ କାମୁଡ଼ିଦେବାରୁ ଜଣେ ନାବାଳକଙ୍କ ଜୀବନ ଯାଇଛି। ଗ୍ରାମର ସୁଧାକର ସ୍ବାଇଁଙ୍କ ନାବାଳକ ପୁଅ ଚକ୍ରଧର(୧୩) ଘରୁ ବିଲକୁ ଯାଉଥିବା ବେଳେ ବିଲ ହିଡ଼ରେ ପଡ଼ିଯାଇଥିଲେ। ଏହା ଦେଖି ଘର ଲୋକେ ସେଠାରୁ ଚକ୍ରଧରଙ୍କୁ ଉଦ୍ଧାର କରି ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ଆଣିଥିଲେ ମଧ୍ୟ ତାଙ୍କର ମୃତ୍ୟୁ ଘଟିଥିଲା। ତେବେ ବିଲରେ ସାପ କାମୁଡ଼ିବାରୁ ତାଙ୍କର ମୃତ୍ୟୁ ଘଟିଥିବା ପରିବାର ପକ୍ଷରୁ କୁହାଯାଇଛି। ଖବର ପାଇ ବିଷ୍ଣୁପୁର ଆର୍ଆଇ ଓମ୍ ପ୍ରକାଶ ମହନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି।
