ଲକ୍ଷ୍ନୌ,୧୧।୧୦: ଉତ୍ତରପ୍ରଦେଶର ବୟସ୍କ ନାଗରିକ, ନିରାଶ୍ରିତ ମହିଳା ଓ ଦିବ୍ୟାଙ୍ଗଜନଙ୍କ ପାଇଁ ବଡ଼ ଖବର। ଯୋଗୀ ଆଦିତ୍ୟନାଥ ସରକାର ଏହି ବର୍ଗର ହିତାଧିକାରୀଙ୍କୁ ମିଳୁଥିବା ପେନସନ ରାଶି ବୃଦ୍ଧି କରିବାକୁ ପ୍ରସ୍ତୁତି ଚଳାଇଛନ୍ତି। ଏଥିପାଇଁ ବର୍ତ୍ତମାନ ମିଳୁଥିବା ମାସିକ ୧୦୦୦ ଟଙ୍କା ପେନସନକୁ ବଢ଼ାଇ ୧୫୦୦ ଟଙ୍କା କରିବା ପ୍ରସ୍ତାବ ରହିଛି। ଏହି ପ୍ରସ୍ତାବକୁ ସରକାର ସୈଦ୍ଧାନ୍ତିକ ସହମତି ଦେଇଥିବା ବେଳେ ଖୁବଶୀଘ୍ର ଅନୁମୋଦନ ପାଇଁ ଏହାକୁ କ୍ୟାବିନେଟରେ ଉପସ୍ଥାପନ କରାଯିବାର ସମ୍ଭାବନା ରହିଛି।
ଏହି ପ୍ରସ୍ତାବକୁ କ୍ୟାବିନେଟ ଅନୁମୋଦନ ମିଳିଲେ ରାଜ୍ୟର ଲକ୍ଷ ଲକ୍ଷ ପେନସନ ହିତାଧିକାରୀ ଉପକୃତ ହୋଇପାରିବେ। ତେବେ ପେନସନ ବୃଦ୍ଧି ନେଇ ଏଯାଏ କୌଣସି ନିଷ୍ପତ୍ତି ଆନୁଷ୍ଠାନିକ ଭାବେ ଲାଗୁ ହୋଇନାହିଁ। ଏଥିପାଇଁ କ୍ୟାବିନେଟରେ ଅନୁମୋଦନ ସହ ଆବଶ୍ୟକୀୟ ପ୍ରକ୍ରିୟା ପୂରଣ ହେବା ବାକି ରହିଛି।
ବର୍ତ୍ତମାନ ଉତ୍ତରପ୍ରଦେଶରେ ଯୋଗ୍ୟ ବୟସ୍କ ନାଗରିକ, ନିରାଶ୍ରିତ ମହିଳା ଓ ଦିବ୍ୟାଙ୍ଗଜନଙ୍କୁ ପ୍ରତି ମାସରେ ୧୦୦୦ ଟଙ୍କା ପେନସନ ମିଳୁଛି। ସରକାର ଏହାକୁ ୧୫୦୦ ଟଙ୍କାକୁ ବୃଦ୍ଧି କରିବା ଉପରେ ବିଚାର କରୁଛନ୍ତି। ପ୍ରସ୍ତାବ କାର୍ଯ୍ୟକାରୀ ହେଲେ ହିତାଧିକାରୀମାନେ ପ୍ରତି ମାସରେ ଅତିରିକ୍ତ ୫୦୦ ଟଙ୍କା ପାଇପାରିବେ। ମହଙ୍ଗା ମାଡ଼ର ଏହି ସମୟରେ ପେନସନ ରାଶି ବୃଦ୍ଧି ହେଲେ ନିୟମିତ ଆୟର ଉତ୍ସ ନଥିବା ଲୋକଙ୍କୁ ଆଶ୍ୱସ୍ତି ମିଳିପାରେ। ବିଶେଷକରି ବୟସ୍କ ନାଗରିକ ଓ ନିରାଶ୍ରିତ ମହିଳାଙ୍କ ଦୈନନ୍ଦିନ ଖର୍ଚ୍ଚ ପରିଚାଳନାରେ ଏହି ଅତିରିକ୍ତ ଅର୍ଥ ସହାୟକ ହୋଇପାରେ। ଡିସେମ୍ବରରେ ଅନୁପୂରକ ବଜେଟ୍ରେ ହେବ ଅର୍ଥ ବ୍ୟବସ୍ଥା ପେନସନ ବୃଦ୍ଧି ଯୋଜନାକୁ କାର୍ଯ୍ୟକାରୀ କରିବା ପାଇଁ ସରକାରଙ୍କୁ ଅତିରିକ୍ତ ବଜେଟର ଆବଶ୍ୟକତା ପଡ଼ିବ। ମିଳିଥିବା ସୂଚନା ଅନୁଯାୟୀ, ଡିସେମ୍ବରରେ ଉପସ୍ଥାପିତ ହେବାକୁ ଥିବା ଦ୍ୱିତୀୟ ଅନୁପୂରକ ବଜେଟରେ ଏଥିପାଇଁ ଅର୍ଥ ବ୍ୟବସ୍ଥା କରାଯାଇପାରେ। ବଜେଟରେ ଆବଶ୍ୟକ ଅର୍ଥର ବ୍ୟବସ୍ଥା ହେବା ପରେ ଏହି ଯୋଜନାକୁ ଆଗକୁ ବଢ଼ାଇବାର ରାସ୍ତା ସ୍ପଷ୍ଟ ହୋଇପାରେ।
