ଭୁବନେଶ୍ୱର,୨୭-୧୧(ବ୍ୟୁରୋ):ବିଧାନସଭା ସମ୍ମିଳନୀ କକ୍ଷରେ ସମ୍ବିଧାନ ଦିବସ-୨୦୧୯ ମହାସମାରୋହରେ ପାଳନ କରାଯାଇଛି। ଏହି ଉତ୍ସବରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ଆଜି ଏକ ଐତିହାସିକ ଦିବସ। ୧୯୪୯ ମସିହା ଆଜିର ଦିନରେ ଭାରତୀୟ ସମ୍ବିଧାନକୁ ସମ୍ବିଧାନ ସଭାଦ୍ବାରା ଗ୍ରହଣ କରାଯାଇଥିଲା। ଭାରତୀୟ ସମ୍ବିଧାନର ପ୍ରଖ୍ୟାତ ମାର୍କିନ୍ ବିଶେଷଜ୍ଞ ପ୍ରଫେସର ଗ୍ରାନେଭିଲ୍ ଅଷ୍ଟିନ୍ କହିଥିଲେ, ୧୭୭୭ର ଫିଲାଡେଲ୍ଫିଆ ଚୁକ୍ତିପରେ ଭାରତୀୟ ସମ୍ବିଧାନ ପ୍ରଣୟନ ବିଶ୍ବରେ ଏକ ପ୍ରମୁଖ ଘଟଣା। ଜନତାଙ୍କ ମୌଳିକ ଓ ଦଓ୍ବୋନୀ ଅଧିକାରକୁ କ୍ଷୁଣ୍ଣ ନ କରି ଦୀର୍ଘ ୭ ଦଶନ୍ଧି ଧରି ଭାରତୀୟ ସମ୍ବିଧାନ ସଫଳତାର ସହିତ ଦେଶର ସାମାଜିକ, ଅର୍ଥନୈତିକ, ଶିକ୍ଷା, ବିଜ୍ଞାନ ସମ୍ବନ୍ଧୀୟ ପ୍ରଗତିରେ ସହାୟକ ହୋଇପାରିଛି। ଏହି ସମ୍ବିଧାନ ପ୍ରଣେତାଙ୍କ ପ୍ରତି ଏକ ଶ୍ରଦ୍ଧାଞ୍ଜଳି। ସେ ଆହୁରି କହିଛନ୍ତି, ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମ ବାର୍ଷିକୀ ପାଳନ ଅବସରରେ ଅହିଂସାକୁ ସମ୍ବିଧାନର ମୁଖ ବନ୍ଧରେ ସ୍ଥାନିତ କରିବାକୁ ପ୍ରସ୍ତାବ ଦେଇଥିଲେ। ଯାହା ଜାତିର ଜନକଙ୍କ ପ୍ରତି ପ୍ରକୃତ ଶ୍ରଦ୍ଧାଞ୍ଜଳି ହେବ। ସମ୍ବିଧାନକୁ କାୟମନୋବାକ୍ୟରେ ପାଳନ କରିବାକୁ ପ୍ରତ୍ୟେକ ଭାରତୀୟ ଶପଥ ନେବା ବାଞ୍ଛନୀୟ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏହି କାର୍ଯ୍ୟକ୍ରମରେ ଅଧ୍ୟକ୍ଷତା କରି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କହିଛନ୍ତି, ୧୯୫୦ ଜାନୁୟାରୀ ୨୬ରେ ଭାରତୀୟ ସମ୍ବିଧାନ କାର୍ଯ୍ୟକାରୀ ହୋଇଥିଲେ ମଧ୍ୟ ୧୯୪୯ ନଭେମ୍ବର ୨୬ ଦିନ ଏହାକୁ ସମ୍ବିଧାନ ସଭାଦ୍ବାରା ଗ୍ରହଣ କରାଯାଇଥିଲା। ଇଂରେଜମାନଙ୍କୁ ଦେଶରୁ ବିତାଡ଼ିତ କରିବା ପାଇଁ ଜାତିର ଜନକ ମହାତ୍ମା ଗାନ୍ଧୀ ଭାରତର ସ୍ବାଧୀନତା ପୂର୍ବରୁ ଅନେକ ଆନ୍ଦୋଳନର ନେତୃତ୍ବ ନେଇଥିଲେ। ସେ ସାରା ଭାରତ ଭ୍ରମଣ କରି ଦାରିଦ୍ର୍ୟର ଚିତ୍ର ସ୍ବଚକ୍ଷୁରେ ଦେଖିଲେ। ବିନା ଯୁଦ୍ଧରେ ଭାରତ ୧୯୪୭ ମସିହାରେ ସ୍ବାଧୀନତା ହାସଲ କଲା। ଏହା ଇତିହାସର ସବୁଠାରୁ ଅବିଶ୍ବସନୀୟ ବିଷୟ। ଭାରତରତ୍ନ ବି. ଆର୍. ଆମ୍ବେଡ଼କର ଥିଲେ ଗଣତନ୍ତ୍ରର ସପକ୍ଷବାଦୀ। ତାଙ୍କ ଅଧ୍ୟକ୍ଷତାରେ ସମ୍ବିଧାନ ପ୍ରଣୟନ ସଭା ଗଠିତ ହୋଇ ସମ୍ବିଧାନକୁ ଚୂଡ଼ାନ୍ତ ରୂପରେଖ ପ୍ରଦାନ କରାଯାଇଥିଲା। ଭାରତର ସମ୍ବିଧାନରେ ଜନମଙ୍ଗଳକାରୀ, ନାଗରିକ ହିତକାରୀ ପ୍ରାବଧାନ ସହିତ ଜନସାଧାରଣଙ୍କ ମୌଳିକ ଅଧିକାର ଓ କର୍ତ୍ତବ୍ୟକୁ ସନ୍ନିବେସିତ କରାଯାଇଛି। ଐକ୍ୟ ଓ ସାର୍ବଭୌମତ୍ବର ସୁରକ୍ଷାକୁ ସୁନିଶ୍ଚିତ କରାଯାଇଛି। ଗଣତନ୍ତ୍ର ଓ ସମ୍ବିଧାନକୁ ରକ୍ଷା କରିବାକୁ ବାଚସ୍ପତି ଆହ୍ବାନ ଦେଇଛନ୍ତି। ଏହି ଅବସରରେ ଉପ ବାଚସ୍ପତି ରଜନୀକାନ୍ତ ସିଂହ, ବିରୋଧୀ ଦଳ ନେତା ପ୍ରଦୀପ୍ତ କୁମାର ନାଏକ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ପ୍ରମୁଖ ନିଜ ବକ୍ତବ୍ୟ ରଖିଛନ୍ତି। ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ ସ୍ବାଗତ ଭାଷଣ ପ୍ରଦାନ କରିଥିବାବେଳେ ସରକାରୀ ମୁଖ୍ୟ ସଚେତକ ପ୍ରମିଳା ମଲ୍ଲିକ ଧନ୍ୟବାଦ ଅର୍ପଣ କରିଛନ୍ତି।
