ନୂଆଦିଲ୍ଲୀ/ଓ୍ବାଶିଂଟନ,୨୪ା୪: କରୋନା ଭାଇରସ୍ର ଉତ୍ପତ୍ତିସ୍ଥଳ କୁହାଯାଉଥିବା ଉହାନ ଭିତରକୁ ଯିବା ପାଇଁ ଆମେରିକୀୟ ବୈଜ୍ଞାନିକମାନଙ୍କୁ ମନା କରିଦେଇଛି ଚାଇନା। ଉହାନ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜି କିମ୍ବା ଚାଇନାର ଅନ୍ୟ କୌଣସି ସ୍ଥାନକୁ ତଦନ୍ତ ନିମନ୍ତେ ଆମେରିକାର କେହି ଯାଇପାରିବେ ନାହିଁ ବୋଲି ରୋକ୍ଠୋକ୍ ମନାକରିଦେଇଛି ବେଜିଂ।
ଆମେରିକାର ପରରାଷ୍ଟ୍ର ସଚିବ ମାଇକ୍ ପମ୍ପିଓ ଗୁରୁବାର ଏକ ଟିଭି ଚ୍ୟାନେଲକୁ ସାକ୍ଷାତ୍କାର ଦେଇ କହିଛନ୍ତି, ଏବେ ମଧ୍ୟ ଚାଇନା ସରକାର ଆମେରିକୀୟ ବୈଜ୍ଞାନିକମାନଙ୍କୁ ଚାଇନା ଭିତରକୁ ଯିବାକୁ ଅନୁମତି ଦେଇନାହାନ୍ତି। କେବଳ ଉହାନ ଲାବ୍ ନୁହେଁ, ଭାଇରସ୍ ସମ୍ପର୍କରେ ଜାଣିବା ପାଇଁ ଯେଉଁ ସବୁ ସ୍ଥାନକୁ ସେମାନେ ଯିବାକୁ ଚାହିଁଛନ୍ତି ଚାଇନା ବାଧା ଦେଇଛି। ସେଠାରୁ ହିଁ ଭାଇରସ୍ ଅନ୍ୟ ସବୁଆଡ଼େ ବିସ୍ତାର ଲାଭ କରିଥିବା ନେଇ ଟ୍ରମ୍ପ୍ ପ୍ରଶାସନ ନିକଟରେ ସୂଚନା ରହିଛି। ତେବେ ଏନେଇ ଆମେ ସ୍ପଷ୍ଟ ଭାବେ ଜାଣିବାକୁ ଚାହୁଁ। ଜି ଜିନ୍ପିଙ୍ଗ୍ ସରକାର ଏନେଇ ଅଧିକ ସ୍ବଚ୍ଛତାର ପ୍ରମାଣ ଦେବା ଦରକାର ବୋଲି ପମ୍ପିଓ କହିଛନ୍ତି। ସେହିପରି ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ମଧ୍ୟ ଏହି କ୍ଷେତ୍ରରେ ସ୍ବଚ୍ଛତା ଅବଲମ୍ବନ କରୁନାହିଁ। ତେଣୁ ଡବ୍ଲ୍ୟୁଏଚ୍ଓକୁ ବି କରୋନା ସଂକ୍ରମଣ ବୃଦ୍ଧି ପାଇଁ ଉତ୍ତରଦାୟୀ କରାଯିବା ଦରକାର। ଅନ୍ୟ ରାଷ୍ଟ୍ରଗୁଡ଼ିକ ଡବ୍ଲ୍ୟୁଏଚ୍ଓର ବିଫଳତାକୁ ନେଇ କିପରି ପ୍ରତିକ୍ରିୟା ପ୍ରକାଶ କରୁଛନ୍ତି ତାହା ଦେଖିବାର କଥା ବୋଲି ପମ୍ପିଓ କ୍ଷୋଭବ୍ୟକ୍ତ କରିଛନ୍ତି। ପ୍ରକାଶ ଯେ, ଏହି ସଙ୍ଗଠନ ଲୋକଙ୍କ ଜୀବନରକ୍ଷା ପରିବର୍ତ୍ତେ ଚାଇନାକୁ ରାଜନୈତିକ ସୁରକ୍ଷା ଦେବାରେ ଅଧିକ ତତ୍ପରତା ଦେଖିାଉଥିବା ଦର୍ଶାଇ ଗତ ସପ୍ତାହରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଡବ୍ଲ୍ୟୁଏଚ୍ଓକୁ ପାଣ୍ଠି ଯୋଗାଇବା ବନ୍ଦ କରିଦେଇଥିଲେ।
