କଳିଙ୍ଗନଗର,୧୮।୮(ଡି.ଏନ.ଏ)- ଶ୍ୱଶୁର ଘରକୁ ବୁଲିବାକୁ ଆସି ଗାଡ଼ି ବ୍ୟାଟେରୀ ଓ ଯନ୍ତ୍ରାଂଶ ଚୋରି କରୁଥିବାବେଳେ ଧରାପଡ଼ି ଯଖପୁରା ପୋଲିସ ଦ୍ୱାରା କୋର୍ଟଚାଲାଣ ହୋଇଛନ୍ତି ଜ୍ୱାଇଁ। ଏଭଳି ଘଟଣା ଘଟିଛି ଡୁବୁରୀ ମାଟିଆ ସାହିରେ। ଗିରଫ ବ୍ୟକ୍ତି ହେଲେ କେନ୍ଦୁଝର ଜିଲା ପାଟଣା ଥାନା ବରଣ୍ଡିଯୋଡି ଗ୍ରାମର ବାଡିଆ ମାଟିଆ (୩୫)। ସୂଚନା ଥାଉକି, ବାଡ଼ିଆ ଡୁବୁରୀ ମାଟିଆ ସାହିରେ ଥିବା ତାଙ୍କ ଶ୍ୱଶୁର ଘରକୁ ଆସିଥିଲେ। ଶୁକ୍ରବାର ରାତିରେ ସେ ତାଙ୍କ ଶ୍ୱଶୁର ଘର ଅଞ୍ଚଳରୁ ଅରୁଣ ବେହେରା (୨୪) ନାମକ ଜଣେ ସହଯୋଗୀଙ୍କୁ ଧରି ଯଖପୁରାସ୍ଥିତ ଏକ ଢାବା ନିକଟରେ ଛିଡା ହୋଇଥିବା ଟ୍ରକଗୁଡିକରୁ ଯନ୍ତ୍ରାଂଶ ଚୋରି କରୁଥିଲେ। ଏହା ଜଣେ ଟ୍ରକ ହେଲପର ଦେଖି ନିକଟରେ ଥିବା ଗାଡି ଚାଳକଙ୍କୁ କହିଥିଲା। ଫଳରେ ସେଠାରେ ଥିବା ଚାଳକ ଓ ହେଲପର ସେମାନଙ୍କୁ କାବୁ କରି ଯଖପୁରା ପୋଲିସକୁ ଜିମା ଦେଇଥିଲେ। ଏହାପରେ ଯଖପୁରା ପୋଲିସ ସେମାନଙ୍କ ନାମରେ ଏକ ମାମଲା (ନଂ. ୫୯/୧୯) ରୁଜୁ କରି କୋର୍ଟ ଚାଲାଣ କରିଛି।
