ମୁମ୍ବାଇ: ବଲିଉଡ୍ ଇଣ୍ଡଷ୍ଟ୍ରିରେ ଖୁବ୍ କମ୍ ସମୟରେ ନିଜର ଏକ ଭିନ୍ନ ପରିଚୟ ସୃଷ୍ଟି କରିଥିବା ଟାଇଗର ଶ୍ରଫ ଏବେ ତାଙ୍କ ଆଗାମୀ ଫିଲ୍ମ ‘ବାଗି ୩’ର ପ୍ରସ୍ତୁତିରେ ବ୍ୟସ୍ତ ଅଛନ୍ତି। ଏହି ଫିଲ୍ମ ଜରିଆରେ ଟାଇଗର ତାଙ୍କ ଫ୍ୟାନମାନଙ୍କୁ ସରପ୍ରାଇଜ୍ ଦେବେ ବୋଲି ଶୁଣିବାକୁ ମିଳିଛି। କାରଣ ପ୍ରଥମଥର ଲାଗି ଏହି ଫିଲ୍ମରେ ଟାଇଗରଙ୍କ ସହ ପିତା ଜ୍ୟାକି ଶ୍ରଫ ମଧ୍ୟ ନଜର ଆସିବେ ବୋଲି ଗୁରୁବାର ଫିଲ୍ମ ନିର୍ମାତା ଘୋଷଣା କରିଥିବା ସୂଚନା ମିଳିଛି। ଏଥିରେ ଜ୍ୟାକି ପିତା ଭୂମିକାରେ ନଜର ଆସିବେ। ପ୍ରଯୋଜକ ସାଜିଦ ନାଡିୟାଡଓ୍ବାଲାଙ୍କ ଏହି ଫିଲ୍ମର ନିର୍ଦ୍ଦେଶନା ଭାର ସମ୍ଭାଳିଛନ୍ତି ଅହମ୍ମଦ ଖାଁ। ଟାଇଗର ବଲିଉଡ୍ରେ ଡେବ୍ୟୁ କରିବା ଦିନଠାରୁ ତାଙ୍କର ପ୍ରଶଂସକମାନେ ତାଙ୍କୁ ଜ୍ୟାକିଙ୍କ ସହ ଦେଖିବାକୁ ଚାହୁଁଥିଲେ। ହେଲେ ସେମିତି ଚରିତ୍ର ନ ମିଳିଲେ ଏମାନେ ଅଭିନୟ କରିବେ ନାହିଁ ବୋଲି ଶୁଣିବାକୁ ମିଳିଥିଲା। ଏବେ ଏହି ପିତାପୁତ୍ରଙ୍କ ଯୋଡିକୁ ଦେଖିବାକୁ ଦର୍ଶକେ ଅପେକ୍ଷା ରଖିଛନ୍ତି। ଏହି ଫିଲ୍ମରେ ଏମାନଙ୍କ ବ୍ୟତୀତ ଶ୍ରଦ୍ଧା କପୁର ଓ ଅଙ୍କିତା ଲୋଖଂଡେଙ୍କୁ ମଧ୍ୟ ଦେଖିବାକୁ ମିଳିବ।
