ବର୍ମିଂହାମ,୩।୭: ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ ଚଳିତ ବିଶ୍ୱକପରେ ଦ୍ୱିତୀୟ ଦଳ ଭାବେ ସେମିଫାଇନାଲରେ ପ୍ରବେଶ କରିଛି। ଏଜବାଷ୍ଟନ ଗ୍ରାଉଣ୍ଡରେ ମଙ୍ଗଳବାର ଖେଳାଯାଇଥିବା ରୋମାଞ୍ଚକ ମ୍ୟାଚ୍ ଭାରତ ୨୮ ରନରେ ବାଂଲାଦେଶକୁ ହରାଇ ଏହି ସଫଳତା ପାଇଛି। ଏହି ମ୍ୟାଚ୍ରେ ଭାରତୀୟ ଦଳର ଜଣେ ବଡ ପ୍ରଶଂସକ ଷ୍ଟାଡିୟମରେ ଉପସ୍ଥିତ ରହି ଦଳକୁ ଚିୟର କରୁଥିବା ଲକ୍ଷ୍ୟ କରାଯାଇଥିଲା। ଭାରତ ଜିତିବା ପରେ ତାଙ୍କୁ ଭେଟିଥିଲେ ଅଧିନାୟକ ବିରାଟ କୋହଲି ଏବଂ ହିଟ୍ ମ୍ୟାନ୍ ରୋହିତ ଶର୍ମା। ମହିଳା ଜଣଙ୍କ କୋହଲିଙ୍କୁ କୋଳାଗ୍ରତ କରିବା ସହ ତାଙ୍କୁ ବିଜୟ ପାଇଁ ଆଶୀର୍ବାଦ ମଧ୍ୟ ଦେଇଥିଲେ। ସମ୍ପୃକ୍ତ ମହିଳା ଜଣଙ୍କ ହେଉଛନ୍ତି ୮୭ବର୍ଷୀୟା ଚାରୁଲତା ପଟେଲ। ତାଙ୍କ ମାତାପିତା ଭାରତୀୟ ଥିଲେ। ସେ କିନ୍ତୁ ତାଞ୍ଜାନିଆ ଜନ୍ମଗ୍ରହଣ କରିଥିଲେ। ତାଙ୍କ ଦୁଇ ପୁଅ ଇଂଲଣ୍ଡରେ ସରେ ପକ୍ଷରୁ କାଉଣ୍ଟି କ୍ରିକେଟ ଖେଳୁଥିବାରୁ ସେ କ୍ରିକେଟ ପସନ୍ଦ କରନ୍ତି ବୋଲି ଚାରୁଲତା କହିଛନ୍ତି। ଭାରତ ଏଥର ବିଶ୍ୱକପ୍ ଜିତିବ, ଏଥିପାଇଁ ମୁଁ ଭଗବାନ ଗଣେଶଙ୍କୁ ପ୍ରାର୍ଥନା କରୁଛି ବୋଲି ସେ କହିଛନ୍ତି। ୧୯୮୩ରେ ଭାରତ ବିଶ୍ୱକପ୍ ଜିତିବାବେଳେ ମୁଁ ଇଂଲଣ୍ଡରେ ରହୁଥିଲି। ଚାକିରି କଲା ସମୟରେ ଭାରତୀୟ ମ୍ୟାଚ୍ ସବୁ ଟିଭିରେ ଦେଖେ। ଏବେ ସମୟ ମିଳିଲେ ଷ୍ଟାଡିୟମରେ ଆସି ଦେଖୁଛି ବୋଲି ସେ କହିଛନ୍ତି।
