ଶ୍ରୀନଗର,୨୦।୬: ଜମ୍ମୁ-କଶ୍ମୀର ଟ୍ରାଫିକ୍ ପୋଲିସ ଦ୍ୱାରା ଲଗାଯାଇଥିବା ଏକ ସାଇନ୍ ବୋର୍ଡ ନେଇ ଏବେ ଚର୍ଚ୍ଚା ଜାରି ରହିଛି। ସ୍ଥାନୀୟ ଜାତୀୟ ରାଜପଥ ମୋଗଲ ରୋଡ୍ଠାରେ ଲାଗିଥିବା ଏହି ସାଇନ୍ ବୋର୍ଡରେ ମୋବାଇଲ୍ ବ୍ୟବହାର ନ କରିବା ପାଇଁ ବିଭ୍ରାନ୍ତି ଜନକ ଲେଖା ରହିଛି। ଅନେକ ଦିନ ଧରି ଏଠାରେ ଏହା ଲାଗିଥିଲେ ମଧ୍ୟ କିଭଳି ପ୍ରଶାସନର ଦୃଷ୍ଟିକୁ ଆସି ନାହିଁ ସେନେଇ ଚର୍ଚ୍ଚା ଜାରି ରହିଛି। ଏହାର ଭିଡ଼ିଓ ଭାଇରାଲ ହେବା ପରେ ସ୍ଥାନୀୟ ପ୍ରଶାସନ ପକ୍ଷରୁ ତଦନ୍ତ ନିର୍ଦ୍ଦେଶ ଦିଆଯାଇଛି। ଏଥିରେ ଲେଖା ଯାଇଛି ‘ଡୋଣ୍ଟ୍ ୟୁଜ୍ ମୋବାଇଲ୍ ଫୋନ୍ ହ୍ବାଇଲ୍ ଡ୍ରିଙ୍କିଙ୍ଗ୍’। ଏନେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜମ୍ମୁ-କଶ୍ମୀର ଏସ୍ପି ମୋହନଲାଲ୍ ସୂଚନା ଦେଇଛନ୍ତି।
