ମେରଠ,୫।୬: ଉତ୍ତର ପ୍ରଦେଶରେ ଏସ୍ପି-ବିଏସ୍ପି ଦୀର୍ଘ ବର୍ଷର ଶତ୍ରୁତାକୁ ଭୁଲି ଗତ ଲୋକ ସଭା ନିର୍ବାଚନରେ ଏକାଠି ହୋଇଥିଲେ। ଚଳିତବର୍ଷ ଜାନୁୟାରୀରେ ହିଁ ଦୁଇ ଦଳର ମୁଖ୍ୟ ଏକ ଖବରଦାତା ସମ୍ମିଳନୀରେ ଏକାଠି ହୋଇଥିବା ଘୋଷଣା କରିଥିଲେ। ସେତେବେଳେ ରାଜନୈତିକ ବିଶେଷଜ୍ଞ ଅନୁମାନ ଲଗାଇଥିଲେ କି ଏହା ଭାଜପା ପାଇଁ କଣ୍ଟା ହେବ। କିନ୍ତୁ ଠିକ୍ ୫ ମାସ ପରେ ପୁଣିଥରେ ଏହି ବନ୍ଧୁତା ଅଡୁଆରେ ପଡିଯାଇଛି। ଲୋକ ସଭା ନିର୍ବାଜନରେ ବିଜୟ ଲାଭ ନ କରିବା ପରେ ମାୟାବତୀ ମେଣ୍ଟ ଉପରେ ଅସ୍ଥାୟୀ ବ୍ରେକ୍ ଲଗାଇଛନ୍ତି। କାରଣ ଦର୍ଶାଯାଇଛି ଏସ୍ପିର ଭୋଟର ବିଏସ୍ପିର ସାଥ ଦେଲାନାହିଁ। ହେଲେ ଏବେ ପୁଣିଥରେ ଅନୁମାନ ଲଗାଯାଇଛି କି ମାୟାବତୀ ମେଣ୍ଟରୁ ସମ୍ପୂର୍ଣ୍ଣ ମୁହଁ ମୋଡି ନ ଥିବା ବେଳେ ଆଗାମୀ ଦିନରେ ସେ ମୁଖ୍ୟମନ୍ତ୍ରୀ ହେବାକୁ ଇଚ୍ଛା ରଖିଛନ୍ତି। କାରଣ ପୂର୍ବରୁ ମାୟାବତୀ ପ୍ରଧାନମନ୍ତ୍ରୀ ଦୌଡରେ ଥିବା ବେଳେ ଅଖିଳେଶ ଆଶା କରି ବସିଥିଲେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ହେବେ ବୋଲି। ହେଲେ କେନ୍ଦ୍ରରୁ ସେମିତି କିଛି ସଫଳତା ନ ମିଳିବା ପରେ ଏବେ ମାୟାବତୀ ମୁଖ୍ୟମନ୍ତ୍ରୀ ଆସନକୁ ଆଖେଇଛନ୍ତି ବୋଲି ଆଲୋଚନା ହେଉଛି।
