ମାଲ୍‌ ପରିବହନରେ ଖୋର୍ଦ୍ଧାରୋଡ୍‌ ରେଳ ମଣ୍ଡଳ ଶୀର୍ଷରେ
7:27 amOctober 7, 2022 / 07

ଜଟଣୀ,୭ା୧୦(ଡି.ଏନ୍‌.ଏ.): ଖୋର୍ଦ୍ଧାରୋଡ୍‌ ରେଳ ମଣ୍ଡଳ ୨୦୨୨ ସେପ୍ଟେମ୍ବରରେ ଭାରତୀୟ ରେଳ ମଧ୍ୟରେ ମାଲ୍‌ ପରିବହନରେ ଶୀର୍ଷ ସ୍ଥାନ ହାସଲ କରିଛି। ଚଳିତ ଆର୍ଥିକ ବର୍ଷରେ ଦ୍ୱିତୀୟ ଥର ପାଇଁ ଖୋର୍ଦ୍ଧାରୋଡ୍‌ ରେଳ ମଣ୍ଡଳ ଶୀର୍ଷ ସ୍ଥାନ ହାସଲ କରିଛି। ସେପ୍ଟେମ୍ବରରେ ଏହି ମଣ୍ଡଳ ୧୨.୪୬ ମିଲିୟନ ଟନ୍‌ ମାଲ ପରିବହନ କରିଛି। ଯାହା ୨୦୨୧ ସେପ୍ଟେମ୍ବର ଠାରୁ ୬.୦୪% ଅତିରିକ୍ତ ଲୋଡିଂ ଏବଂ ରାଜସ୍‌ ବାବଦ ୧୧୯୩ କୋଟି ଟଙ୍କା ଆୟ ହୋଇଛି। ଚଳିତ ଆର୍ଥିକ ବର୍ଷରେ ଅର୍ଥାତ୍‌ ୧ ଏପ୍ରିଲ୍‌ -୨୦୨୨ରୁ ୩୦ ସେପ୍ଟେମ୍ବର-୨୦୨୨ ମଧ୍ୟରେ ଖୋର୍ଦ୍ଧା ରୋଡ୍‌ ରେଳ ମଣ୍ଡଳ ମୋଟ ୭୬.୩୫ ମିଲିୟନ୍‌ ଟନ୍‌ ମାଲ ଲୋଡ୍‌ ପରିବହନ କରିଛି। ୨୦୨୨-୨୦୨୩ ବର୍ଷ ସମନ୍ବିତ ଲୋଡିଂରେ ଭାରତୀୟ ରେଲଓ୍ବେରେ ତୃତୀୟ ସ୍ଥାନ ହାସଲ କରିଛି। ସେପ୍ଟେମ୍ବର ୨୦୨୨ ରେ, ତାଳଚେର, ପାରାଦୀପ, ଧାମରା, ମେରାମଣ୍ଡଳୀ ଆଦି ବିଭିନ୍ନ ଲୋଡିଂ ପଏଣ୍ଟରୁ ଡିଭିଜନ୍‌ ଦ୍ୱାରା ଦୈନିକ ହାରାହାରି ୧୧୨ ରେକ୍‌ ମାଲ ପରିବହନ କରାଯାଇଥିଲା। ଲୋଡ୍‌ ହୋଇଥିବା ବିଭିନ୍ନ ସାମଗ୍ରୀ ମଧ୍ୟରେ କୋଇଲା, ସାର, ସିମେଣ୍ଟ, ଲୁହା ପଥର, କଞ୍ଚାମାଲ ଆଦି ବିଭିନ୍ନ ପାଓ୍ବାର ହାଉସ୍‌, ଉତ୍ପାଦନକାରୀ କମ୍ପାନୀ, ଉତ୍ପାଦନ ୟୁନିଟ୍‌ ଏବଂ ଇଣ୍ଡଷ୍ଟ୍ରିଜ୍‌କୁ ପରିବହନ କରାଯାଇଥିବା ମଣ୍ଡଳ ରେଳ ପ୍ରଶାସନ ପକ୍ଷରୁ କୁହାଯାଇଛି। ମାଲ ପରିବହନରେ ଜଡିତ ସମସ୍ତ ଅଧିକାରୀ ଏବଂ କର୍ମଚାରୀଙ୍କୁ ଖୋର୍ଦ୍ଧାରୋଡ୍‌ ମଣ୍ଡଳ ରେଳ ପ୍ରବନ୍ଧକ ରିଙ୍କେଶ ରୟ ଉତ୍ସାହର ସହିତ କାର୍ଯ୍ୟ କରିବାକୁ କହିଛନ୍ତି।