ପୁରୀ ଅଫିସ/ନିମାପଡ଼ା, ୧୪ା୧୦(ଡି.ଏନ୍.ଏ.): ମା’, ବାପା ଉଭୟ ପୋଲିସ ଅଧିକାରୀ। ମାତ୍ର ସେମାନଙ୍କର କଲେଜ ପଢୁଆ ପୁଅ ଜଣେ ନିଶା ବେପାରୀ। ବ୍ରାଉନସୁଗାର କାରବାର ଅଭିଯୋଗରେ ସୋମବାର ଅବକାରୀ ବିଭାଗ ହାତରେ ସମ୍ପୃକ୍ତ ଯୁବକ ଧରାପଡ଼ିବା ପରେ ଏହି ଘଟଣା ପଦାକୁ ଆସିଛି। ନିମାପଡ଼ା ବଜାରସ୍ଥ ଜୟଶ୍ରୀ ଛକ ନିକଟରେ ୨ଜଣ ଯୁବକ ଗ୍ରାହକଙ୍କୁ ବାଉନସୁଗାର ବିକ୍ରି କରୁଥିବା ସୂଚନା ପାଇ କଟକ ଗୋଇନ୍ଦା ଓ ପୁରୀ ଅବକାରୀ ବିଭାଗ ମିଳିତ ଭାବେ ଚଢାଉ କରିଥିଲେ। ସେଠାରୁ ପୁରୀ ଅଞ୍ଚଳର ଶାନ୍ତନୁ ଶେଖର ଦାସ ଓ ସତ୍ୟରଞ୍ଜନ ଦାସଙ୍କୁ ଗିରଫ କରିଥିଲେ। ସେମାନଙ୍କ ନିକଟରୁ ୨୪ଗ୍ରାମ ବ୍ରାଉନସୁଗାର, ଗୋଟିଏ ବାଇକ (ଓଡି ୧୩ବି-୨୬୨୧) ଜବତ ହୋଇଛି। ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୨ଲକ୍ଷ ୪୦ହଜାର ଟଙ୍କା ହେବ ବୋଲି ଅବକାରୀ ବିଭାଗ ସୂତ୍ରରୁ ଜଣାପଡ଼ିଛି। ଅଭିଯୁକ୍ତ ଶାନ୍ତନୁ ସାମନ୍ତ ଚନ୍ଦ୍ରଶେଖର ସ୍ବୟଂଶାସିତ ମହାବିଦ୍ୟାଳୟର ଯୁକ୍ତ ୩ ଶେଷ ବର୍ଷର ଛାତ୍ର ହୋଇଥିବା ବେଳେ ତାଙ୍କ ମା’ ନିମାପଡ଼ା ଥାନା ଏବଂ ବାପା ଡେଲାଙ୍ଗ ଥାନାରେ ଏସ୍ଆଇ ଭାବେ କାର୍ଯ୍ୟ କରୁଥିବା ଜଣାପଡ଼ିଛି। ଏ ନେଇ ତଦନ୍ତକାରୀ ଅଧିକାରୀ ବନ୍ଦନା ପଟ୍ଟନାୟକଙ୍କ ଅଭିଯୋଗ କ୍ରମେ ନିମାପଡ଼ା ଅବକାରୀ ଥାନାରେ ଦଫା ୨୧ ବି କ୍ରମେ ଏକ ମାମଲା (ନଂ.୭୨/୧୯) ରୁଜୁ ହୋଇଛି। ଏହି ଚଢ଼ାଉ ବେଳେ ନିମାପଡ଼ା ଅବକାରୀ ଏସ୍.ଆଇ. ବନ୍ଦନା ପଟ୍ଟନାୟକ, ଜିତେନ୍ଦ୍ର ବେହେରା, ଏସ୍.କେ ଓ୍ବାରିସ ପ୍ରମୁଖ ସାମିଲ ଥିଲେ।
