ଆବ୍ରାହମ୍ ବେଞ୍ଜାମିନ୍ ଡିଭିଲିୟର୍ସ କ୍ରିକେଟର ଏକ ଜଣାଶୁଣା ନାଁ। ଦକ୍ଷିଣ ଆଫ୍ରିକାର ଏହି କ୍ରିକେଟର ୩୬ ବର୍ଷରେ ପଦାର୍ପଣ କରିଛନ୍ତି। ୧୯୮୪ ମସିହା ଫେବୃୟାରୀ ୧୭ରେ ଦକ୍ଷିଣ ଆଫ୍ରିକାର ବେଲା ବେଲା ସେ ଜନ୍ମଗ୍ରହଣ କରିଥିଲେ। ଯଦିଓ କ୍ରିକେଟରୁ ସେ ୨ ବର୍ଷ ହେବ ଅବସର ନେଇସାରିଛନ୍ତି କିନ୍ତୁ ତାଙ୍କର କିଛି ବିସ୍ଫୋରକ ଇନିଂଶ ଆଜି ବି କ୍ରିକେଟ ପ୍ରଶଂସକ ମନେ ରଖିଛନ୍ତି। ୨୦୧୫ରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଜୋହାନ୍ସବର୍ଗରେ ନିଜ କ୍ୟାରିୟର ଦ୍ୱିତୀୟ ଏକଦିବସୀୟ ମ୍ୟାଚ୍ ଖେଳୁଥିଲେ। ପ୍ରଥମେ ବ୍ୟାଟିଂ କରୁଥିବା ଦକ୍ଷିଣ ଆଫ୍ରିକା ଦଳ ହାସିମ ଆମଲା ଏବଂ ରିଲି ରୋସୋଙ୍କ ଶତକ ବଳରେ ୩୮.୩ ଓଭରରେ ୨୪୭ ରନ୍ କରିଥିଲା। ଏହି ସମୟରେ ରୋସୋଉ ଆଉଟ ହେବା ପରେ ଡିଭିଲିୟର୍ସ ପଡିଆକୁ ଆସିଥିଲେ। ସେ ମାତ୍ର ୪୪ଟି ବଲ୍ ଖେଳି ୧୪୯ ରନ୍ କରିଥିଲେ। ଏହି ପାଳି ଖେଲି ସେ ବିଶ୍ୱ କ୍ରିକେଟର ଅନେକ ରେକର୍ଡ ଭାଙ୍ଗିଥିଲେ। ମାତ୍ର ୩୧ଟି ବଲରୁ ଶତକ ଅର୍ଜନ କରିବା ସହ ଏହି ଇନିଂଶରେ ସେ ୧୬ଟି ଛକା ମାରିଥିଲେ।
ନିଜର ୧୪ ବର୍ଷ କ୍ରିକେଟ କ୍ୟାରିୟରରେ ଡିଭିଲିୟର୍ସ ୧୧୪ ଟେଷ୍ଟ , ୨୨୮ ଦିନିକିଆ ଓ ୭୮ଟି ଟି୨୦ ମ୍ୟାଚ ଖେଳିଛନ୍ତି। ଦିନିକିଆରେ ସେ ୨୨୮ଟି ମ୍ୟାଚରୁ ୯ ହଜାର ୫୭୭ ରନ ସଂଗ୍ରହ କରିଛନ୍ତି। ୧୧୪ଟି ଟେଷ୍ଟ ମ୍ୟାଚ ଖେଳି ଡିଭିଲିୟର୍ସ ୮ ହଜାର ୭୬୫ରନ ସଂଗ୍ରହ କରିଛନ୍ତି। ସେହିପରି ୭୮ଟି ଟି୨୦ରୁ ୧୬୭୨ ରନ ସଂଗ୍ରହ କରିଛନ୍ତି।
