ମାଲକାନଗିରି, ୩।୬(ଡି.ଏନ୍.ଏ./ସ୍ବ.ପ୍ର.)
ମାଥିଲି ଥାନା ପୋଲିସ ଓ ବିଏସ୍ଏଫ୍ ରବିବାର ରାତିରେ ଜଣେ ମାଓବାଦୀଙ୍କୁ ଗିରଫ କରିଛି। ସେ ହେଲେ ମାଥିଲି ଥାନା ତୁଳସୀ ପାହାଡ ଅଞ୍ଚଳ କଟିପାଲୀ ଗାଁର ତ୍ରିନାଥ ଭୂମିଆ(୨୫)। ତ୍ରିନାଥ ଗତ ୨ ବର୍ଷ ମଧ୍ୟରେ ଛତିଶଗଡ ରାଜ୍ୟ ଦରଭା ଡିଭିଜନ ପକ୍ଷରୁ ମାଥିଲି ଥାନା ଅଞ୍ଚଳରେ ହୋଇଥିବା ୪ଟି ବଡ ଧରଣର ମାଓବାଦୀ ହିଂସାକାଣ୍ଡରେ ସାମିଲ ଥିଲେ। ଜିଲା ପୋଲିସ ମୁଖ୍ୟାଳୟରେ ସୋମବାର ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଏସ୍ପି ଜଗମୋହନ ମୀନା ଏହି ସୂଚନା ଦେଇଛନ୍ତି। ତ୍ରିନାଥ ବିଶେଷକରି ଲ୍ୟାଣ୍ଡମାଇନ ଖଞ୍ଜିବାରେ ସିଦ୍ଧହସ୍ତ ଥିଲେ। ସେ ବିଭିନ୍ନ ସ୍ଥାନରେ ଲ୍ୟାଣ୍ଡମାଇନ ଖଞ୍ଜି ପଞ୍ଚାୟତ କାର୍ଯ୍ୟାଳୟ, ବିଦ୍ୟାଳୟ ଗୃହ, କଲଭର୍ଟ ଉଡାଇବା ସହ ଅନେକ ହତ୍ୟାକାଣ୍ଡରେ ଜଡିତ ଥିଲେ ବୋଲି ଏସ୍ପି ମୀନା କହିଛନ୍ତି। ଖବରଦାତା ସମ୍ମିଳନୀରେ ମାଥିଲି ଆଇଆଇସି ଜନ୍ କୁଜୁରଙ୍କ ସମେତ ଅନ୍ୟ ପୋଲିସ ଅଧିକାରୀ ଉପସ୍ଥିତ ଥିଲେ।
