କଟକ ଅଫିସ, ୬ା୧- ଓଡ଼ିଶାର ସୁଶ୍ରୀ ଦିବ୍ୟଦର୍ଶିନୀଙ୍କ ୩ ଉଇକେଟ ସଫଳତା ବଳରେ ଇଣ୍ଡିଆ ‘ବି’ ବାରବାଟୀ ଷ୍ଟାଡିୟମରେ ଚାଲିଥିବା ମହିଳା ଚ୍ୟାଲେଞ୍ଜର ଟ୍ରଫିରେ ପ୍ରଥମ ବିଜୟ ହାସଲ କରିଛି। ରବିବାର ଅନୁଷ୍ଠିତ ମ୍ୟାଚ୍ରେ ଇଣ୍ଡିଆ-ବି’ ୪ ରନ୍ରେ ଇଣ୍ଡିଆ-ସି’କୁ ପରାସ୍ତ କରିଛି। ଉଭୟ ବ୍ୟାଟିଂ ଓ ବୋଲିଂରେ ଚମତ୍କାର ପ୍ରଦର୍ଶନ କରିଥିଲେ ସୁଶ୍ରୀ। ସୋମବାର ଇଣ୍ଡିଆ-ସି’ ଓ ଇଣ୍ଡିଆ-ଏ’ ଦଳ ମଧ୍ୟରେ ମୁକାବିଲା ହେବ।
ବେଦ କ୍ରୀଷ୍ଣମୂର୍ତ୍ତିଙ୍କ ନେତୃତ୍ୱାଧୀନ ଇଣ୍ଡିଆ-ସି’ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଇଣ୍ଡିଆ-ସି’ ଦଳରେ ଓଡ଼ିଶାର ମାଧୁରୀ ମେହେଟା ସାମିଲ ହୋଇଥିଲେ ମଧ୍ୟ ତାଙ୍କୁ ଏହି ମ୍ୟାଚ୍ର ଚୂଡ଼ାନ୍ତ ଏକାଦଶରେ ସ୍ଥାନ ମିଳି ନ ଥିଲା। ସ୍ମୃତି ମନ୍ଧାନାଙ୍କ ନେତୃତ୍ୱାଧୀନ ଇଣ୍ଡିଆ-ବି’ ଆରମ୍ଭରୁ ଆକ୍ରମଣାତ୍ମକ ବ୍ୟାଟିଂ କରିଥିଲା। ତେବେ ଅଦିନିଆ ବର୍ଷା ଯୋଗୁ ଧିମା ହୋଇଯାଇଥିବା ବାରବାଟୀ ପିଚ୍ରେ ବଡ଼ ଶଟ୍ ଖେଳିବା ସହଜ ହୋଇ ନ ଥିଲା। ୬ ରନ୍ କରିଥିବା ବେଳେ ଇଣ୍ଡିଆ-ବି’ର ଅଧିନାୟିକା ତଥା ଓପ୍ନର ସ୍ମୃତି ଆଉଟ ହୋଇଥିଲେ। ମୋନିକା ଶର୍ମାଙ୍କ ବଲରେ ଉଇକେଟ କିପର ନୁଜହତ ପରୱିନ୍ଙ୍କ ହାତରେ ଧରାପଡ଼ି ପ୍ୟାଭିଲିୟନ ଫେରିଥିଲେ ସ୍ମୃତି। ପରେ କ୍ରିଜ୍କୁ ଆସିଥିବା ଭାରତୀୟ ଦଳର ଧୂଆଁଧାର ବ୍ୟାଟ୍ସଓମ୍ୟାନ ଜେମିହା ରୋଡ୍ରିଗ୍ବେଜ ୧ ରନ୍ରେ ଅରୁନ୍ଧତୀ ରେଡ୍ଡୀଙ୍କ ବଲରେ କ୍ୟାଚ୍ଆଉଟ ହୋଇଥିଲେ। ଦଳର ମଧ୍ୟକ୍ରମ ବ୍ୟାଟ୍ସଓମ୍ୟାନ ରିଚା ଘୋଷ୍ ସର୍ବାଧିକ ୨୫ ରନ୍ କରିଥିଲେ। ଅନ୍ୟତମ ଓପ୍ନର ଭେଲାସ୍ବାମୀ ଭନିଥା ୧୧, ଅନୁଜା ପାଟିଲ ୧୧, ଶିଖା ପାଣ୍ଡେ ୧୫, ପୂଜା ବସ୍ତ୍ରକାର ୪ ଓ ତନୁଜା କନ୍ୱର ୭ ରନ୍ କରିଥିଲେ। ୯ନଂ ବ୍ୟାଟିଂ କ୍ରମରେ ଆସି ସୁଶ୍ରୀ ଗୋଟିଏ ଚୌକା ବଳରେ ଉପଯୋଗୀ ୮ ରନ୍ କରିଥିଲେ। ଫଳରେ ଇଣ୍ଡିଆ-ବି’ ୨୦ ଓଭରରେ ୮ ଉଇକେଟ ବିନିମୟରେ ୯୪ ରନ୍ କରିଥିଲା। ଇଣ୍ଡିଆ-ସି’ ପକ୍ଷରୁ ରାଜେଶ୍ୱରୀ ଗାଏକ୍ବାଡ ୪ ଓଭର ବୋଲିଂ କରି ୭ ରନ୍ ବିନିମୟରେ ସର୍ବାଧିକ ୩ଟି ଉଇକେଟ ଅକ୍ତିଆର କରିଥିଲେ। ମୋନିକା, ଅରୁନ୍ଧତୀ ଓ ତନୁଶ୍ରୀ ସରକାରଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା।
୯୫ ରନ୍ର ବିଜୟଲକ୍ଷ୍ୟ ପିଛା କରି ଇଣ୍ଡିଆ-ସି’ ପୂରା ୨୦ ଓଭର ଖେଳିଥିଲେ ହେଁ ୮ ଉଇକେଟ ହରାଇ ୯୦ ରନ୍ କରିବାକୁ ସକ୍ଷମ ହୋଇଥିଲା। ପାୱାର ପ୍ଲେ ତଥା ପ୍ରଥମ ୬ ଓଭରରେ ଇଣ୍ଡିଆ-ସି’ ୨ ଉଇକେଟ ହରାଇ ୩୨ ରନ୍ କରିଥିଲେ ସୁଦ୍ଧା ପରବର୍ତ୍ତୀ ସମୟରେ ବ୍ୟାଟିଂ ବିଫଳତା ଯୋଗୁ ପରାଜିତ ହୋଇଥିଲା। ୪୦ ରନ୍ରେ ୨ଟି ଉଇକେଟ ହରାଇଥିବା ଇଣ୍ଡିଆ-ସି’ ଦଳ ଆଉ ୧୭ ରନ୍ରେ ୩ ଉଇକେଟ ହରାଇ ସଙ୍କଟରେ ପଡ଼ିଥିଲା। ଇଣ୍ଡିଆ-ସି’ ଅଧିନାୟିକା ବେଦ କ୍ରୀଷ୍ଣମୂର୍ତ୍ତିଙ୍କୁ ଆଉଟ କରି ଇଣ୍ଡିଆ-ବି’କୁ ବଡ଼ ସଫଳତା ଦେଇଥିଲେ ଓଡ଼ିଆ ଝିଅ ସୁଶ୍ରୀ। ଏହାଛଡ଼ା ଅରୁନ୍ଧତୀ ରେଡ୍ଡୀ ଓ ଭୃଷାଲି ଭଗତ ମଧ୍ୟ ସୁଶ୍ରୀଙ୍କ ଶିକାର ହୋଇଥିଲେ। ଦଳ ପକ୍ଷରୁ ଦୟଲାନ ହେମଲତା ସର୍ବାଧିକ ୨୦, ତନୁଶ୍ରୀ ସରକାର ୧୮, ଶେଫାଳି ବର୍ମା ୧୬ ରନ୍ କରିଥିବାବେଳେ ଅନ୍ୟ କେହି ଖେଳାଳି ୨ ଅଙ୍କ ଛୁଇଁପାରି ନ ଥିଲେ। ନିଜ ୪ ଓଭର ସ୍ପେଲ୍ରେ ୧୫ ରନ୍ ବିନିମୟରେ ୩ଟି ଉଇକେଟ ନେଇଥିଲେ ସୁଶ୍ରୀ। ଶିଖା ପାଣ୍ଡେ, ଅନୁଜା ପାଟିଲ ଓ ତନୁଜା କନ୍ୱାରଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା।
