ନୟାଗଡ ଅଫିସ/ଖଣ୍ଡପଡ଼ା,୨୧ା୨(ସ୍ବ.ପ୍ର.): ନୟାଗଡ଼ ଜିଲାର କଣ୍ଟିଲୋ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଛକ ନିକଟରେ ଗୁରୁବାର ଭୋର ୫ଟାରେ ଜଣେ ଅପରିଚିତା ମହିଳାଙ୍କୁ ୧୦୨ ଆମ୍ବୁଲାନ୍ସ (ଜନନୀ ଏକ୍ସପ୍ରେସ) ଧକ୍କା ଦେଇଥିଲା। ତେବେ ଡ୍ରାଇଭର ଜଣକ ତରବରିଆ ଭାବେ ଆହତ ମହିଳାଙ୍କୁ ଗାଡ଼ିରେ ନେଇ କୁଆଡେ ଉଭାନ ହୋଇ ଯାଇଥିଲେ। ପ୍ରାୟ ୫୦୦ ମିଟର ଦୂରରେ କଣ୍ଟିଲୋ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଥିବାବେଳେ ଡ୍ରାଇଭର ଅନ୍ୟତ୍ର ନେଇଯିବା ଘଟଣା ସନ୍ଦେହ ସୃଷ୍ଟି କରିଥିଲ। ତେବେ ମହିଳା ଜଣକ ମୃତା କି ଜୀବିତ ସ୍ପଷ୍ଟ ହୋଇନାହିଁ। ଅନ୍ୟପକ୍ଷେ ଡ୍ରାଇଭର ବାରମ୍ବାର କଥା ବଦଳାଇବା ଘଟଣାକୁ ରହସ୍ୟମୟ କରିଛି। ଦୁର୍ଘଟଣା ଖବର ପ୍ରଚାରିତ ହେବା ପରେ କଣ୍ଟିଲୋରେ ଚାପା ଉତ୍ତେଜନା ଦେଖାଦେଇଥିଲା। କିଛି ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ କଣ୍ଟିଲୋ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ସନ୍ତୋଷ ପଣ୍ଡା ଚଳାଉଥିବା ଜନନୀ ଏକ୍ସପ୍ରେସ ଦୁର୍ଘଟଣା ଘଟାଇଥିଲେ। ସନ୍ତୋଷ ମଧ୍ୟ ଏହାକୁ ସ୍ବୀକାର କରିଛନ୍ତି। ତାଙ୍କ କହିବା କଥା କୁହୁଡି ଯୋଗୁ ମହିଳାଙ୍କୁ ଜନନୀ ଏକ୍ସପ୍ରେସ ଧକ୍କା ଦେଇଥିଲା। ତେବେ ଗୁରୁବାର କଣ୍ଟିଲୋ ଅଞ୍ଚଳରେ କୁହୁଡି ହୋଇ ନ ଥିଲା। ଆହତ ମହିଳାଙ୍କୁ ସେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ଓ ପରେ ସେବାଶ୍ରମରେ ଛାଡିଥିଲେ ବୋଲି କହିଥିଲେ। ପରେ କିନ୍ତୁ କଥା ବଦଳାଇ ମହିଳାଙ୍କ ଅବସ୍ଥା ଗୁରୁତର ହେବାରୁ ସିଡିଏମଓଙ୍କ ପରାମର୍ଶ ଅନୁସାରେ କ୍ୟାପିଟାଲ ହସ୍ପିଟାଲକୁ ୧୦୮ ଆମ୍ବୁଲାନ୍ସ ଯୋଗେ ସ୍ଥାନାନ୍ତର କରାଯାଇଥିବା ସନ୍ତୋଷ କହିଥିଲେ। ଘଟଣା ସମ୍ପର୍କରେ ଧରିତ୍ରୀ ପକ୍ଷରୁ ସିଡିଏମଓ ଶ୍ୱେତ ମହାପାତ୍ରଙ୍କୁ ଯୋଗାଯୋଗ କରାଯାଇଥିଲା। ତାଙ୍କ ସୂଚନା ଅନୁସାରେ ସେ ଜନନୀ ଏକ୍ସପ୍ରେସ ଧକ୍କା ସମ୍ପର୍କରେ ଅବଗତ ନୁହନ୍ତି ବୋଲି କହିଥିଲେ, ଯାହାକି ଡ୍ରାଇଭରଙ୍କ ସୂଚନାକୁ ମିଥ୍ୟା ବୋଲି ପ୍ରମାଣ କରୁଛ। ତେବେ ଶୁକ୍ରବାର ଘଟଣାର ତଦନ୍ତ କରି ପଦକ୍ଷେପ ନେବେ ବୋଲି ସିଡିଏମଓ କହିଛନ୍ତି। ସୂଚନାଯୋଗ୍ୟ ଦୁର୍ଘଟଣାର ଶିକାର ହୋଇଥିବା ମହିଳା କିଛିଦିନ ହେବ କଣ୍ଟିଲୋ ଅଞ୍ଚଳରେ ଘୂରି ବୁଲୁଥିଲେ।
