ନୂଆଦିଲ୍ଲୀ,୨୪।୪(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଅଧ୍ୟକ୍ଷ ଭାବେ ଶଶାଙ୍କ ମନୋହରଙ୍କ କାର୍ଯ୍ୟକାଳ ଆଉ ୨ ମାସ ବଢିପାରେ। ଜୁନ୍ରେ ସେ ପଦ ଛାଡିବେ ବୋଲି ଆଶା କରାଯାଉଥିଲା। ତେବେ କୋଭିଡ୍-୧୯ ମହମାରୀ କାରଣରୁ ଆଇସିସି ବୋର୍ଡ ବୈଠକକୁ ଦୁଇମାସ ଘୁଞ୍ଚାଇ ଦିଆଯାଇଛି। ଫଳରେ ତାଙ୍କ କାର୍ଯ୍ୟକାଳ ବଢିବା ସମ୍ଭାବନା ସୃଷ୍ଟି ହୋଇଛି। ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଅଧ୍ୟକ୍ଷ କଲିନ୍ ଗେଭ୍ସ ଆଇସିସି ଅଧ୍ୟକ୍ଷ ପଦ ଦୌଡରେ ସମସ୍ତଙ୍କ ଅଗାରେ ରହିଛନ୍ତି। ସେ ମନୋହରଙ୍କ ଉତ୍ତରାଧିକାରୀ ବିବେଚିତ ହେଉଛନ୍ତି।
ମନୋହର ପଦ ଛାଡିବା ଏକ ପ୍ରକାର ନିଶ୍ଚିତ। ତେବେ ସେ ଆଉ ୨ମାସ ଦାୟିତ୍ୱରେ ରହିବା ସମ୍ଭାବନା ରହିଛି । ଆସନ୍ତା ଅଗଷ୍ଟରେ ଆଇସିସିର ଜଣେ ନୂଆ ଅଧ୍ୟକ୍ଷ ଦାୟିତ୍ୱରେ ରହିବେ ବୋଲି ଆଇସିସିର ଜଣେ ବୋର୍ଡ ମେମ୍ବର କହିଛନ୍ତି। ଗ୍ରେଭ୍ସ ଆଗାମି ନଭେମ୍ବରରେ ଇସିବି ଚେୟାରମ୍ୟାନ ପଦରୁ ଇସ୍ତାଫା ଦେବେ। ସେ ଏହି ପଦ ପାଇଁ ଫେଭରାଇଟ ବିବେଚିତ ହେଉଛନ୍ତି। ମନୋହର ପଦରେ ରହିବା ବେଳେ ଭାରତର ସ୍ବାର୍ଥ ପ୍ରତି ଦୃଷ୍ଟି ଦେଉ ନ ଥିବାର ଅଭିଯୋଗ ହେଉଥିଲା। ତେଣୁ ଗ୍ରେଭ୍ସ ଦାୟିତ୍ୱ ନେବା ପରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସହିତ ଉତ୍ତମ ସମ୍ପର୍କ ରକ୍ଷା କରିବେ ବୋଲି ଆଶା କରାଯାଉଛି।
