ମୁମ୍ବାଇ, ୨୫ା୩ (ପି.ଟି.): ଭାରତର ସବୁଠାରୁ ସଫଳ ଘରୋଇ କୋଚ୍ ବୋଲି କୁହାଯାଉଥିବା ଚନ୍ଦ୍ରକାନ୍ତ ପଣ୍ଡିତ ଆସନ୍ତା ସିଜନରେ ମଧ୍ୟ ପ୍ରଦେଶ କ୍ରିକେଟ କୋଚ୍ ଭାବେ କାର୍ଯ୍ୟ କରିବେ। ପଣ୍ଡିତ୍ ୩ବର୍ଷ ଧରି ବିଦର୍ଭ ରଣ୍ଜୀ ଦଳର କୋଚ୍ ଭାବେ କାର୍ଯ୍ୟକରିଛନ୍ତି। ତାଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ବିଦର୍ଭ ପଛକୁ ପଛ ରଣଜୀ ଟ୍ରଫି ଏବଂ ଇରାନୀ ଟ୍ରଫି ହାସଲ କରିପାରିଛି। ସୂଚନାଯୋଗ୍ୟ, ପଣ୍ଡିତ୍ ପ୍ରଥମ ଶ୍ରେଣୀ କ୍ରିକେଟରେ ମୁମ୍ବାଇ ଦଳ ପକ୍ଷରୁ ପ୍ରତିନିଧିତ୍ୱ କରିଛନ୍ତି। ଦଳ ପକ୍ଷରୁ ତାଙ୍କର ପ୍ରଦର୍ଶନ ମଧ୍ୟ ଉଲ୍ଲେଖନୀୟ ରହିଛି। କିଛି ସମୟ ପାଇଁ ସେ ଆସାମ ଦଳ ପାଇଁ ଖେଳିଛନ୍ତି। ସେ ତାଙ୍କ କ୍ୟାରିୟରର ଶେଷ ପର୍ଯ୍ୟାୟରେ ଜଣେ ପ୍ରଫେସନାଲ ଖେଳାଳି ଭାବେ ମଧ୍ୟପ୍ରଦେଶରୁ ମଧ୍ୟ ପ୍ରତିନିଧିତ୍ୱ କରିଛନ୍ତି। କୋଚ୍ ଭାବେ ମଧ୍ୟ ପ୍ରଦେଶକୁ ସେ ଟ୍ରଫି ଜିତାଇବେ ବୋଲି ଦୃଢତାର ସହିତ କହିଛନ୍ତି। ମୁଁ ବହୁତ ରାଜ୍ୟ ସହ କାର୍ଯ୍ୟକରିଛି। ପୂର୍ବରୁ ମଧ୍ୟ ପ୍ରଦେଶ ତରଫରୁ ଜଣେ ପ୍ରଫେସନାଲ ହିସାବରେ କୋଚ୍, ଖେଳାଳି ଏବଂ ଅଧିନାୟକ ଭାବେ ଦାୟିତ୍ୱ ନିର୍ବାହ କରିସାରିଛି। ତେଣୁ ଏଠିକାର ପରିବେଶ ସହିତ ମୁଁ ଅଭ୍ୟସ୍ତ ବୋଲି ପଣ୍ଡିତ କହିଛନ୍ତି।
