ନୂଆଦିଲ୍ଲୀ,୨୭ା୫(ପି.ଟି.)-ଭାରତର ଡବଲ୍ସ ଟେନିସ ବିଶାରଦ ରୋହନ ବୋପାନ୍ନା ମଙ୍ଗଳବାର ଉଚ୍ଚାଭିଳାଷୀ ଟେନିସ୍ ସ୍କଲାରଶିପ୍ ପ୍ରୋଜେକ୍ଟ ଆରମ୍ଭ କରିଛନ୍ତି। ଏଥିରେ ଉଭୟ ଟେନିସ ଓ ଏକାଡେମିକ୍ ଶିକ୍ଷା ପ୍ରଦାନର ବ୍ୟବସ୍ଥା ରହିଛି। ଏଥିରେ ଏକକାଳୀନ ୬୦ଜଣ ପିଲାଙ୍କୁ ପ୍ରାୟୋଜିତ କରାଯିବ। ଜଣକ ପିଛା ବାର୍ଷିକ ୧୦ ଲକ୍ଷ ଟଙ୍କା ଖର୍ଚ୍ଚ କରାଯିବ। ରୋହନ ବୋପାନ୍ନା ଟେନିସ ଏକାଡେମୀ (ଆରବିଟିଏ) ଏବଂ ଦି ସ୍ପୋଟର୍ସ ସ୍କୁଲର ମିଳିତ ସହଯୋଗରେ ସ୍କଲାରଶିପ୍ ପ୍ରୋଗ୍ରାମ୍ ଚାଲିବ। ବେଙ୍ଗାଲୁରୁସ୍ଥିତ ଟ୍ରେନିଂ ସେଣ୍ଟର ଏହାର ମୁଖ୍ୟ ସ୍ଥଳ ରହିବ। ପ୍ରଥମାବସ୍ଥାରେ ୧୨ବର୍ଷରୁ କମ୍, ୧୪ବର୍ଷରୁ କମ୍ ଓ ୧୬ବର୍ଷରୁ କମ୍ ୩ କାଟେଗୋରୀ ପିଲା ସ୍କୁଲ ଓ୍ବେବ୍ସାଇଟ ଜରିଆରେ ସ୍କଲାରଶିପ୍ ପାଇଁ ଆବେଦନ କରପାରିିବେ। ସେମାନଙ୍କର ମୂଲ୍ୟାଙ୍କନ ହେବ। ଲକ୍ଡାଉନ୍ ଉଠିବା ପରେ ମନୋନୀତ ଖେଳାଳିମାନେ ରେସିଡେନ୍ସିଆଲ ପ୍ରୋଗ୍ରାମ୍ରେ ଯୋଗ ଦେବେ। ଅନ୍ଲାଇନ୍ରେ ଏକ ଖବରଦାତା ସମ୍ମିଳନୀରେ ବୋପାନ୍ନା କହିଛନ୍ତି, ମୁଁ ଯେତେବେଳେ ଜଣେ ଜୁନିୟର ଖେଳାଳି ଥିଲି ସେତେବେଳେ ଯେଉଁସବୁ ସୁବିଧା ଉପଲବ୍ଧ ନ ଥିଲା ତାହା ପିଲାମାନେ ପାଆନ୍ତୁ ବୋଲି ମୁଁ ଚାହେଁ। ଏହି ପ୍ରୋଜେକ୍ଟ ଭାରତୀୟ ଟେନିସକୁ ଆହୁରି ଆଗେଇ ନେବ ବୋଲା ଆଶା। ମାତାପିତାମାନେ ସବୁବେଳେ ପିଲାମାନଙ୍କ ପାଠପଢା କଥା ଚିନ୍ତା କରିଥାନ୍ତି। ପାଠପଢା ଓ ଖେଳ ଏକ ସଙ୍ଗରେ ହୋଇପାରିବ ବୋଲି ଆମେ ଏହି ପ୍ରୋଗ୍ରାମ ମାଧ୍ୟମରେ ପ୍ରମାଣ କରି ଦେଖାଇଦେବାକୁ ଚାହୁଁ। ବୋପାନ୍ନା କହିଛନ୍ତି, ସମ୍ଭବତଃ ଏହା ବିଶ୍ୱର ସବୁଠାରୁ ବଡ଼ ସ୍କଲାରଶିପ୍ ପ୍ରୋଗ୍ରାମ୍। କେହି ଏକକାଳୀନ ୬୦ ପିଲାଙ୍କୁ ଶତ ପ୍ରତିଶତ ସ୍କଲାରଶିପ୍ ଦେଉନାହାନ୍ତି। ଏପରିକି ୟୁଏସ୍ କଲେଜ୍ ଟେନିସ ପ୍ରୋଗ୍ରାମ୍ରେ ୭୦ ଅବା ୮୦ ପ୍ରତିଶତ ସ୍ପନସରଶିପ୍ ବ୍ୟବସ୍ଥା ରହିଛି ବୋଲି ଭାରତର ୪ର୍ଥ ଖେଳାଳି ହିସାବରେ ଏକ ଗ୍ରାଣ୍ଡସ୍ଲାମ ଟାଇଟଲ ଜିତିଥିବା ବୋପାନ୍ନା ପ୍ରକାଶ କରିଛନ୍ତି। ଭାରତର ଟପ୍ ସିଙ୍ଗଲ୍ସ ଖେଳାଳି ପ୍ରଜନେଶ ଗୁଣେଶ୍ୱରନଙ୍କ କୋଚ୍ ବାଲଚନ୍ଦ୍ରନ ମଣିକାଥ୍ ସେଣ୍ଟରେ ମୁଖ୍ୟ କୋଚ୍ ରହିବେ। ତାଙ୍କୁ ଅନ୍ୟ ୬ଜଣ କୋଚ୍ ସହାୟତା କରିବେ।
