ଗଞ୍ଜାମ,୬।୫:(ବିଦ୍ୟାଧର ସାହୁ ): ସାମୁଦ୍ରିକ କଇଁଛଙ୍କ ଏନ୍ତୁଡିଶାଳ ଭାବେ ପରିଚିତ ଗଞ୍ଜାମ ଜିଲା ଋଷିକୂଲ୍ୟା ମୁହାଣ ବେଳାଭୂମିରୁ ସକାଳ ଓ ସନ୍ଧ୍ୟାରେ ଥଣ୍ଡା ପରିବେଶରେ ବିସ୍ତୃତ ବାଲୁକା ଶଯ୍ୟାରେ ପୋତି ହୋଇ ରହିଥିବା ଅଣ୍ଡାରୁ ଛୁଆ ଫୁଟିବା ଆରମ୍ଭ ହୋଇଛି । ଗତକାଲି ରାତିରେ ଏବଂ ବୁଧବାର ସକାଳରେ ହଜାର ହଜାର କଇଁଛ ଛୁଆ ବର୍ତ୍ତମାନ ସମୁଦ୍ର ମୁହାଁ ହୋଇଥିବା ରମ୍ଭା ବନପାଳ ଡି ପ୍ରଶାନ୍ତ କୁମାର ରାଓ ସୂଚନା ଦେଇଛନ୍ତି । ଉକ୍ତ ଛୁଆ କଇଁଛଙ୍କୁ ଦେଖିବା ଲାଗି ସ୍ଥାନୀୟ ଅଞ୍ଚଳ ତଥା ବାହାର ପର୍ଯ୍ୟଟକଙ୍କ ଭିଡ଼କୁ ଦୃଷ୍ଟିରେ ରଖି ବନବିଭାଗ ପକ୍ଷରୁ ସୁରକ୍ଷା ବ୍ୟବସ୍ତା କଡାକଡି କରାଯାଇଛି । ପୂର୍ବ ବର୍ଷ ଗୁଡିକ ତୁଳନାରେ ଚଳିତ ବର୍ଷ କମ୍ ସଂଖ୍ୟକ କଇଁଛ ଗଣ ଅଣ୍ଡା ଦାନ କରିଥିଲେ । ଚଳିତ ବର୍ଷ ବନ ବିଭାଗର ଗଣନା ଅନୁଯାୟୀ ୨ ଲକ୍ଷ ୫ ହଜାର ୨୯୩ କଇଁଛ ଏହି ଋଷିକୂଲ୍ୟା ବେଳାଭୂମିରେ ଗଣ ଅଣ୍ଡାଦାନ କରିଥିଲେ । ଏହାର ୪୫ରୁ ୫୦ଦିନ ମଧ୍ୟରେ ଅଣ୍ଡାରୁ ଛୁଆ ଫୁଟିବା ଆରମ୍ଭ ହୋଇଛି । ଗୋଟିଏ କଇଁଛ ପାଖାପାଖି ୧୩୦ ରୁ ୧୪୦ଅଣ୍ଡା ଦେଇଥିବା ଜଣାପଡିଛି । ଛୁଆ କଇଁଛ ସମୁଦ୍ର ଭିତରକୁ ଗଲା ବେଳେ କିଛି ଛୁଆ କଇଁଛ ଭାରସାମ୍ୟ ହରାଇ ଓଲଟି ପଡୁଥିବା ଏବଂ କିଛି ଛୁଆ ବାଟବଣା ହୋଇ ପ୍ଲାଷ୍ଟିକରେ ଗୁଡେଇ ହୋଇ ଜୀବନ ସହ ସଂଘର୍ଷ କରୁଥିବା ବେଳେ ସେଗୁଡିକ ବନ ବିଭାଗ ଓ ସ୍ଥାନୀୟ ସ୍ବେଚ୍ଛାସେବୀ ସଂଗଠନ କର୍ମକର୍ତ୍ତା ସମୁଦ୍ରକୁ ଛାଡିଛନ୍ତି। ଏଥିସହ ସେମାନଙ୍କ ସୁରକ୍ଷା ଦୃଷ୍ଟିରୁ ବନ ବିଭାଗ ପକ୍ଷରୁ ଜାଲ ବାଡ଼ ସହ ବ୍ୟାରିକେଡ ନିର୍ମାଣ କରାଯାଇଛି । ସେହିପରି ଋଷିକୂଲ୍ୟା ମୁହାଣ ନିକଟସ୍ଥ ପୁରୁଣା ପୋଡ଼ମ ପେଟା ଗ୍ରାମ ଠାରୁ ଉତ୍ତର ଦିଗ ସିଦ୍ଧାର୍ଥ ନଗର ପର୍ଯ୍ୟନ୍ତ ବନ କର୍ମଚାରୀ ଏବଂ କୋଷ୍ଟ ଗାର୍ଡ ମୃତୟନ ଥିବା ଆଞ୍ଚଳିକ ବନ ସରାଂଖ୍ୟକ ଭି ନୀଳମ୍ବରନ ସୂଚନା ଦେଇଛନ୍ତିl ସୁରକ୍ଷା ନେଇ ବ୍ରହ୍ମପୁର ବନ ଖଣ୍ଡ ଅଧିକାରୀ ଶନି ଖୋଖର ଘନ ଘନ ଋଷିକୂଲ୍ୟା ବେଳାଭୂମି ଆସି ସମୀକ୍ଷା କରୁଛନ୍ତି । ଛୁଆ କଇଁଛଙ୍କ ସୁରକ୍ଷା ଲାଗି ବନ ବିଭାଗ ସମ୍ପୂର୍ଣ ସଜାଗ ଥିବା ବନ ରକ୍ଷକ ତପନ କୁମାର ନନ୍ଦ ଗଣମାଧ୍ୟମକୁ ସୂଚନା ଦେଇଛନ୍ତି ।
