ରଣପୁର,୯ା୮(ସ୍ବ.ପ୍ର.): ଗୁରୁବାର ଜାତୀୟ କୃମିନାଶ ଦିବସ ରଣପୁର ବ୍ଲକ ଅଞ୍ଚଳରେ ପ୍ରହସନ ପାଲଟିଥିବା ଅଭିଯୋଗ ହେଉଛି। ସରକାରୀ ସ୍କୁଲର ଛାତ୍ରୀଛାତ୍ରଙ୍କୁ କୃମିନାଶ ଔଷଧ ବଣ୍ଟନ କରାଯାଇ ଥିବାବେଳେ ବେସରକାରୀ ସ୍କୁଲ ପ୍ରତି ଅଣଦେଖା କରାଯାଇଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ଅନ୍ୟପକ୍ଷେ କୃମିନାଶ ଔଷଧ ବଣ୍ଟନ ପୂର୍ବରୁ ଶିକ୍ଷକମାନଙ୍କୁ ତାଲିମ ଦିଆଯାଇଥାଏ। ତେବେ ରଣପୁର ବ୍ଲକ ଅଞ୍ଚଳରେ ବିନା ତାଲିମରେ ଏଥର ଶିକ୍ଷକ କୃମି ଔଷଧ ବାଣ୍ଟିଛନ୍ତି। ସେହିପରି ବ୍ଲକ ଅଧୀନ ଅଧିକାଂଶ ସ୍କୁଲର ଛାତ୍ରୀଛାତ୍ର ନିଜ ସହପାଠୀଙ୍କୁ କୃମିନାଶ ଔଷଧ ଖୁଆଉ ଥିବାର ଦୃଶ୍ୟ ଦେଖିବାକୁ ମିଳିଥିଲା । ଉତ୍ତମ ସ୍ବାସ୍ଥ୍ୟ ଓ ପୁଷ୍ଟିର ବିକାଶକୁ ଆଖି ଆଗରେ ରଖି ୧ବର୍ଷର ଶିଶୁଙ୍କଠାରୁ ଆରମ୍ଭ କରି ୧୯ ବର୍ଷର ଯୁବକମାନଙ୍କ ପାଇଁ କୃମିନାଶ ଔଷଧ ଖାଇବା ପାଇଁ ନିର୍ଦ୍ଦେଶ ରହିଥିଲା। ତେବେ ସବୁ ଛାତ୍ରୀଛାତ୍ରଙ୍କ ପାଖରେ ଏହି ଔଷଧ ପହଞ୍ଚତ୍ ପାରି ନାହିଁ। ଯେଉଁ ପିଲାମାନେ ଅସୁସ୍ଥତାବଶତଃ ହେଉ ବା ଅନୁପସ୍ଥିତ ରହିବା କାରଣରୁ ବଟିକା ଖାଇ ପାରିନାହାନ୍ତି, ସେମାନଙ୍କୁ ୧୬ ତାରିଖରେ ଖୁଆଇବାକୁ ଅନୁରୂପ ନିର୍ଦ୍ଦେଶ ରହିଛି ।
