ବିଞ୍ଝାରପୁର, ୪।୪ (ଡି.ଏନ.ଏ) : ଯାଜପୁର ଜିଲା ରସୁଲପୁର ବ୍ଲକ ବ୍ରହ୍ମବରଦାରେ ଶୁକ୍ରବାର ଜଣେ କରୋନା ସଂକ୍ରମିତ ଚିହ୍ନଟ ହେବାପରେ ଜିଲା ପ୍ରଶାସନ ପକ୍ଷରୁ ଅଧିକ ତତ୍ପରତା ପ୍ରକାଶ ପାଇଛି। ଜିଲାପାଳ ରଞ୍ଜନ କୁମାର ଦାସଙ୍କ ନିର୍ଦ୍ଦେଶକ୍ରମେ ବିଞ୍ଝାରପୁର ବ୍ଲକର ୫ ପଞ୍ଚାୟତ ଯଥା ସୟଦପୁର, ବିଞ୍ଝାରପୁର, କଏଣା-ରଘୁନାଥପୁର, ମାଁସଡା ଓ କଲ୍ୟାଣପୁରକୁ ଶନିବାର ରାତି ୮ଟାରୁ ସୋମବାର ରାତି ୮ଟା ପର୍ଯ୍ୟନ୍ତ ୪୮ ଘଣ୍ଟା ପାଇଁ ଶଟଡାଉନ କରାଯାଇଛି। ଏଥିସହିତ କଏଣା-ରଘୁନାଥପୁର ପଞ୍ଚାୟତର ସୟଦପୁର ଛକଠାରୁ କଲ୍ୟାଣପୁର ପଞ୍ଚାୟତ ବାଳମୁକୁଳି ହାଟ ପର୍ଯ୍ୟନ୍ତ ମୁଖ୍ୟ ରାସ୍ତାକୁ ସିଲ୍ କରାଯାଇଛି। ଏ ସମ୍ପର୍କରେ ଶନିବାର ସନ୍ଧ୍ୟାରେ ଏହି ୫ ପଞ୍ଚାୟତବାସୀଙ୍କୁ ବ୍ଲକ ପ୍ରଶାସନ ତରଫରୁ ମାଇକ ଦ୍ଵାରା ଅବଗତ କରାଯାଇଛି। ସେହିପରି ଜରୁରୀକାଳୀନ ସେବା ଭାବେ ବିଞ୍ଝାରପୁର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ର ଓ ପାଖରେ ଥିବା ଔଷଧ ଦୋକାନ ସମେତ ଦମକଳ କେନ୍ଦ୍ର, ପ୍ରାଣୀ ଚିକିତ୍ସା କେନ୍ଦ୍ର, ଏଟିଏମ ଖୋଲା ରହିବ ବୋଲି ତହସିଲଦାର ଅସ୍ମିତା ଦାଶ ସୂଚନା ଦେଇଛନ୍ତି ।
