ପରଜଙ୍ଗ, ୨୩।୮(ଡି.ଏନ.ଏ.)-ଦିବ୍ୟାଙ୍ଗଙ୍କୁ ମୁଖ୍ୟସ୍ରୋତରେ ସାମିଲ କରିବାକୁ ଅନେକ ଯୋଜନା। ଏଥିପାଇଁ ସରକାରୀସ୍ତରରେ ଖର୍ଚ୍ଚ ହେଉଛି କୋଟି କୋଟି ଟଙ୍କା। ସ୍ବତନ୍ତ୍ର ଶିବିର, ସାମାଜିକ ସଶକ୍ତୀକରଣ କାର୍ଯ୍ୟକ୍ରମ ମାଧ୍ୟମରେ ସେମାନଙ୍କୁ ସମସ୍ୟା ମୁକ୍ତ କରିବାକୁ ଯଥାସାଧ୍ୟ ଉଦ୍ୟମ କରାଯାଉଥିବା ଡିଣ୍ଡିମ ପିଟୁଛନ୍ତି ସରକାର। ହେଲେ ତୃଣମୂଳସ୍ତରରେ ପ୍ରଶାସନିକ ଅବହେଳା ଦିବ୍ୟାଙ୍ଗଙ୍କ ଜୀବନକୁ ଦୁର୍ବିଷହ କରିପକାଉଛି। ଏହାର ସଦ୍ୟତମ ଉଦାହରଣ ହେଉଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ ସରାଙ୍ଗ ପଞ୍ଚାୟତ ବାହାଣିଆ ସାହିର ବାବୁଲା ବେହେରା। ୮୦% ଦିବ୍ୟାଙ୍ଗ ହୋଇଥିଲେ ସୁଦ୍ଧା ବାବୁଲାଙ୍କ ଭାଗ୍ୟରେ ଜୁଟିନାହିଁ ଆବାସ ଯୋଜନାରେ ଖଣ୍ଡିଏ ଘର। ଏପରି କି ୭୦୦ ବଦଳରେ ୫୦୦ ଟଙ୍କା ଭତ୍ତା ଦିଆଯାଉଛି। ତଥାପି ନ୍ୟାୟ ପାଇବା ଆଶାରେ ସେ ବାରଦୁଆର ହେଉଥିବା କହିଛନ୍ତି।
ବାବୁଲାଙ୍କ କହିବା କଥା, ସେ ଜନ୍ମରୁ ଭିନ୍ନକ୍ଷମ। ତାଙ୍କ ପାଖରେ ଶତକଡ଼ା ୮୦ ଭାଗ ଦିବ୍ୟାଙ୍ଗ ବୋଲି ସାର୍ଟିଫିକେଟ ମଧ୍ୟ ରହିଛି। ସ୍ତ୍ରୀ, ୩ବର୍ଷର ଝିଅ ସହ ସେ ତାଙ୍କ ବାପାଙ୍କ ଆଜବେଷ୍ଟସ୍ ଘରେ କଷ୍ଟେମଷ୍ଟେ ରହୁଛନ୍ତି। ୨୦୧୧ରେ ସରକାରୀସ୍ତରରେ ଆବାସ ଯୋଜନାରେ ଘର ପ୍ରଦାନ କରିବାକୁ ଯୋଗ୍ୟ ହିତାଧିକାରୀଙ୍କ ତାଲିକା ପ୍ରସ୍ତୁତ କରାଯାଇଥିଲା। ଉକ୍ତ ତାଲିକାରେ ତାଙ୍କ ନାମ ସାମିଲ ହୋଇଥିଲା। ହେଲେ ଚଞ୍ଚକତା କରି କେହି ନାମକୁ ତାଲିକାରୁ କାଟି ଦେଇଛି। ଏହାପରେ ଘର ଖଣ୍ଡିଏ ପାଇଁ ସେ ପ୍ରଶାସନ ପାଖରେ ଦୌଡ଼ି ଦୌଡ଼ି ନୟାନ୍ତ ହୋଇଗଲେଣି। ୨୦୧୮ ନଭେମ୍ବର ୨୬, ଡିସେମ୍ବର ୨୪ରେ ଏ ନେଇ ଜିଲାପାଳଙ୍କ ଜନ ଶୁଣାଣି ଶିବିରରେ ଅଭିଯୋଗ କରିଥିଲେ। ତଥାପି କୌଣସି ସୁଫଳ ମିଳୁନାହିଁ। ସେ ଆହୁରି ମଧ୍ୟ କହିଛନ୍ତି, ଶତକଡ଼ା ୮୦% ଶାରୀରିକ ଦିବ୍ୟାଙ୍ଗ ହୋଇଥିଲେ ୭ଶହ ଟଙ୍କା ଭତ୍ତା ପ୍ରଦାନ କରିବାକୁ ସରକାରୀସ୍ତରରେ ନିୟମ ଅଛି। ହେଲେ ତାଙ୍କୁ ୫୦୦ ଟଙ୍କା ମିଳୁଛି। ବାକି ୨୦୦ ଟଙ୍କା କୁଆଡ଼େ ଯାଉଛି ତାହାକୁ ନେଇ ସେ ପ୍ରଶ୍ନ ଉଠାଇଛନ୍ତି। ଅବହେଳାର ଶିକାର ହୋଇଥିଲେ ମଧ୍ୟ ବାବୁଲା ନ୍ୟାୟ ପାଇଁ ସଂଘର୍ଷ ଜାରି ରଖିଥିବା କହିଛନ୍ତି।
ଏ ନେଇ ବିଡିଓ ବସନ୍ତ କୁମାର ମଲ୍ଲିକ କୁହନ୍ତି, କେଉଁ ପରିସ୍ଥିତିରେ ଏବଂ କିଏ ବାବୁଲାଙ୍କ ନାମକୁ ଯୋଗ୍ୟ ହିତାଧିକାରୀ ତାଲିକାରୁ ବାଦ୍ ଦେଇଛି ତାହାର ତଦନ୍ତ କରାଯିବ। ଏବେ ଏସିସିସି ଲିଷ୍ଟରେ ନାମ ସଂଯୋଗ କରାଯାଉଛି। ଅଭିଯୋଗକାରୀଙ୍କୁ ଏଥିରେ ସାମିଲ କରିବାକୁ ଫର୍ମ ପୂରଣ କରାଯାଇଛି। ଖୁବ୍ଶୀଘ୍ର ବାସଗୃହ କାର୍ଯ୍ୟାଦେଶ ପ୍ରଦାନ କରାଯିବ। ଏଥିସହ ବର୍ଦ୍ଧିତ ଭତ୍ତା ମଧ୍ୟ ପ୍ରଦାନ କରାଯିବ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି।
